Sefanyas 1
1
1Katatuy Yawi at longan sas Sefanyas ebi gina Usiya, at tama Amun, at fun sis talun Uda. Sefanyas tama Kusi. Ay Kusi tama Gidalya. Ay Gidalya tama Amariya. Ay Amariya tama Esekiya.
Yawi Gfadasug ban at Faurianan
2Yawi nalong te, “Gfamin kwa ban fiya fiya fagayu nus nge wain ste swa daga: 3ngay taw, ay ngay mangimut, ay ngay manuk tungud, ay ngay uyang. Ay gfalyam kwa ban tagfaamatangan sas taw laman sumalan, ay anggan at ngay tagasalanan. Gfamin kwa ban ngay taw ste swa daga. Aw wan Yawi tagelongan.
4“Nanfaurianan aw taw Uda, anggan fagayu taw Erusalem. Gfamin kwa ban at ngay sawad tagseg sas Baal fag fagsegan, anggan at ngay taganyun tagfaning sanya, laman malyam wan. 5Gfamin kwa ban ngay taw tagsas tungud bale laman nanseg sas menit, sas magdanun, ay sa sangay galeme. Gfamin kwa ban at ngay tagseg ay tagfatvngvd at longan te, gfaning angku, ay roro nafatvngvd yangay at longan te, gfaning sas Mulek#1:5 Mulek: Sis Fangebriyu, Malkum, Mulek at ngayan at sadi. fag fagsegan. 6Gfamin kwa ban nus nga sinu at kinfoli sat dan fag ugali ay wa kakbang angku.
7“Maragangani wadi si ku daga salubangan, anway makbang wan at menit nu nanfauri aw. Nafamasadan kwan ku ngay taw laman nanfate kata sik fanganyun fag balan. Nafamasadan kyangay at ngay fabarangyan ku nafili laman nanfabarangyan sas Uda. 8Ginanya ban fag menit, gfate kwan ka fag ngay taw Uda kata sik fanganyun fag balan. Gfaurianan kwan at ngay fun sirut, ay anggan at fun ngay sisiyan, ay fagayu tagfaning tibak talun at ugali mauri. 9Ginanya ban fag menit, gfaurianan kyangay fagayu at maful laman gseg sa sangay fagsegan, ay anggan at ngay tagfangadotama ay tagfanluk laman gfapnu at fun bale at ngay nafamul tibak taw fagnuwan.
10“Ginanya ban fag menit, sisad sakbawan Erusalem at nangayan te Uyang, ay anggan at bagu nkawat fag lungud, e maguywayan ayuwayu kadungug dewa ngayayu. Ay kadungug yangay nu gfanguroan gina karasras at ngay bale sa sangay tungud muyud. 11Am tagbanwan sit mababa fag lungud fulan Erusalem, uywayi wan anway umkate wan fagayu ay ngay tagfabili.
12“Ginanya yangay ban fag menit, gfasarapun kwa fiya fiya ngay taw sas Erusalem ay gfauri aw at ngay taw at marananan ay gamatangan te, ‘Yawi we fagbulun masine ay mauri.’ 13Ay tibak taw mul wa ban at ngay fagmabalanun ay rumasras at ngay bale. Ay bunwa ban kanya at manwan sat awatan fag ngay bale. Ay bunwa ban kanya at minum wat ubas safa siginan at tanum ubas.”
At Malimu fag Menit Yawi nu Gfaurianan
14Makbang wan at malimu fag menit Yawi nu gfaurianan. Wa glugo gadasugun wan! Mason nu malimu ka fag menit, dewa at madaragang fag sundalu muro wan laman get tarabang. 15Ginanya ban fag menit, Diyus gfalag at fandotaman. Ka fag menit mataka, ay mabalu, ay mafanggalutan. Marum ay malinyabu dawdaw fag menit. 16Ay umdungug at awang nu gfanbudyungan ay ngay sundalu nu gfanguroan nu gfabarangyan sa sangay fulan at maaladan ay sa sangay ngabat fagbantayan fag bale.
17Yawi nalong te, “Gfadalan aw fagatakanun sa sangay taw, ay kanya lumo kata at yud glag, anway kanya nasalan sa angku. At taguk umlimus kata sik safa ay at ngay bilug umruwas kata sik bap. 18At ngay pilak ay ngay gintu wa mafafalangfe anya gina aw gfalag ku fandotaman kata wa sik afuy nu gbatas fagdaul daga, anway mafali nu gfamin aw fagayu tagbanwan ste swa daga.”
Currently Selected:
Sefanyas 1: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines