Sefanyas 2
2
Sik Longan te, Ubuni at ngay Asalanan
1Sefanyas nalong sa sangay taw Uda te, “Am fag ngay taw at yud e naplan, afuli ay ubuni ay ngay asalanan 2bagu umdasug at menit nu gayan ayu kata nu gfalayug sik nagyayusan. Ubuni ay ngay asalanan bagu Yawi nanfalag sa ayu at mason fag fandotaman. 3Am fag ngay tagfababaun ay tagfaning Yawi at ngay suguwan, akbangi sa anya. Fatunglusi nu gfagbulun am at matuyan ay nu gfababaun am. Labon Yawi malabag yay ayu gina gfalag at fandotaman.”
At Faurianan sa sangay Taw Filistiyu
4Taw Gasa ay taw Askelun we sawad. Taw Asdud e mayan wan sik day tangali way. Ay e mayan yangay taw Ekrun siginan at fulan. 5Sek am fag ngay taw Filistiyu tagbanwan sas tigyangan dagat. Katatuy Yawi at longan sa ayu baliwa: “Am fag ngay taw Filistiyu sas talun Kanaan gfamin kwayu ay kwa gfasawad.” 6Ay ay ngay daga sas tigyangan dagat sik fagfasabsaban way ban at ngay balan ay at ngay tupa fagtiyugan. 7Ay at sawad fag ngay taw Uda magbilug wa ban ka fag daga. Sanya wan nu gfafangon at ngay balan ay sad yabi sanya nu gtiyug sas fulan Askelun at ngay bale. Yawi, kanya at Diyus, gdog yay kafanyu anya ay gdog yay gfaayu nus nge wain kata ebi ataw.
At Faurianan sa sangay Taw Muab ay Taw Amun
8-9Yawi at Madaragang, taw Israel at Diyus, nalong te, “Nadungug kwan taw Muab ay taw Amun nu glong mauri ay nu gfalingun ku ngay taw. Kanya gfandaragang te, ‘Nangagbilug watam Israel at daga.’ Nu katanya, nafatvngvd aw ku longan te, nanrasras kwa ban fiya fiya talun Muab ay talun Amun kata talun Suduma ay talun Gumura. Ay at ngay daga wa ban e fanambagun faggugat ban. At ngay madugi fag ngay makmak tumugbung sanya, ay umkayu at fakawatan asing. Ay at sawad ku ngay taw nanfabarangyan ban sanya ay mul wan at ngay fagnuwan.”
10Sefanyas nalong te, “Kanya at famabali sa sangay taw Muab ay taw Amun nu gfandaragang. Anway kanya gfaplan ay gfalingun Yawi at Madaragang at ngay taw. 11Yawi falimuwanan ka fag ngay taw anway kanya gfamin wan fagayu fagsegan sas fagdaul daga. Ay fagayu talun at ngay taw sumeg Yawi sat ngay fulan mandi.”
At Faurianan sa sangay Taw Itiupya ay Taw Asirya
12Yawi nalong te, “Am yangay fag ngay taw Itiupya,#2:12 Itiupya: Sis Fangebriyu, Kus. e fate ayu sas fagbarangyanan.
13“Fauri kyangay taw Asirya tagsis wala baliwa fag tigyangan. Ay Ninibi umkata way sigad sik malanu fag talun ay umgong kata sik talun at yud e taw. 14Sanya wan ngay baka, ngay kambing, ay nus nge wain fag ngay balan nu gfangon. Ngay manuk siraw sumubuk sa sangay turuk marasrasan, ay nu guni kadungug sa sangay fagbantayan. At ngay sakbawan umrasras ay anggan at ngay kayu sidru mangatastasan. 15Katanya at kumgurungan sas fulan Ninibi tagfandaragang te, ‘We gfabarangyan antam ay we glabi antam.’ Roro umrasras wa fiya fiya ka fag fulan, ay at ngay mangimut way tagbanwan sanya. Ay nus nga sinu at dumalan sanya mase ay gfalingun sat kin-gurungan sanya.”
Currently Selected:
Sefanyas 2: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines