Sefanyas 3
3
Fulan Erusalem at Fakadasugan
1Sefanyas nalong te, “Sek Erusalem! At ngay tagbanwan sanya kamabo way Diyus ay at fagbulun mafurat. At ngay tagmagurang takamalingun way fag ngay taw. 2Kanya wa kaumsig gfaning sa tibak taw, ay wa kaumsig dewa e gatul anya. Ay wa gafanud sas Yawi dewa at Diyus, ay wa nangakbang anya. 3At ngay fun sirut kata way liyun nu guni. At ngay tagmagurang kata way idu talun nu gsarap at fakonun gina sad yabi ay we fasawadan sis balabag. 4At ngay taglong mafadfalian nu gfagbulun ay roro wa mafatvngvdun. Ay at ngay taganyun gfe mafurat Yawi bale ay wa gfaning Diyus at suguwan. 5Dewa katanya Yawi at fagmasineun sanya yay gugat si at fulan. Yawi at fagbulun masine ay di gfagbulun mauri. Kayu menit kayu menit gfalag at fagmatuyanun, ay tunglusan tuwa gugat. Roro at mauri fag ngay taw gfatunglus way nu gfagbulun mauri ay wa kapla.”
6Yawi nalong te, “Nafamin kwan fagayu talun; narasras kwan at ngay fulan anggan at ngay alad ay at ngay ngabat fagbantayan fag bale. Ay we sawad at ngay taw, ay we glo sa sangaba dalan. 7Ku fagnafagbulun katanya nu gfasad aw ku ngay taw gumalang angku ay kaumsig ku fangatulun, laman kwa rumasras at fulan kata ebi ku fasadan sa anya. Roro inkugat yay baliwa nu gfagbulun sat mauri.
8“Nu katanya, am at matuyan fag ngay taw Erusalem, fanyai yap at menit nu gfauri aw at ngay talun. Anway namatangan kwan nanfaful at ngay talun ay at ngay fagmagurangan laman nanfalag aw sa anya at mason ku fandotaman kata wa sik afuy nu gbatas fagdaul daga. 9Ay gfabali aw ngay taw at amatanganan, laman kanya fagayu umkakbang sa angku ay nangasadi nanfaning sa angku. 10Ku ngay taw at kinrapyag sa sangay fulan sas dife safa Itiupya#3:10 Itiupya: Sis Fangebriyu, Kus. muba at ngay anyun sa angku.
11“Ginanya ban fag menit, am fag ngay taw Erusalem, wam kapla sa ay ngay nafagbulun sa angku ay asalanan, anway mayan kwan siginan ayu tagfalabi ay tagfandaragang fag ngay taw. Ay we gfandaragang sanya sa ku mafilian fag muyud. 12Roro gfasawad kyay sas fulan Erusalem tagfalingunan ay at yud e kwa fag ngay taw. Kanya met sa angku tarabang. 13Kanya fag ngay taw Israel at sawad di nanfagbulun mauri, ay di kamuwagan, ay di gfanluk. Ay gfangon ay gtiyug mabayan ay di e nafanawaan.”
Taw Israel Museganan
14Sefanyas nalong te, “Am tagbanwan sis talun Israel, useganani. Am tagbanwan sis Siyun, fulan Erusalem,#3:14 tagbanwan sis Siyun, fulan Erusalem: Sis Fangebriyu, Siyun at unga fag mangena ... Erusalem at unga fag mangena. danyui useganani dawdaw, 15anway Yawi di nanfauri ayu. Kanya wan tagfayayu ay ngay fabarangyan. Yawi, taw Israel at Fun, tagufud ayu, ay di ban am e fakalimuun.
16“Ginanya ban fag menit, tibak taw lumong sa sangay taw Erusalem te, ‘Lag am kalimu ay fatvngvdi ay amatanganan. 17Anway Yawi tam Diyus gufud tuwa ayu. Kanya kata wa sik madaragang fag sundalu tagfalangfe ayu. Kanya guseganan ban dawdaw sa ayu. Teway kesug ayu, nanfon ayu sik bagu fag leleg. Ay guseganan dumanyu ban dawdaw anway sa ayu, 18kata sik taw nu guseganan dawdaw gina e fagmafulun.’
“Yawi nalong yangay fiya te, ‘Gfalangfe aw ayu siginan ay fagatakanun laman di ban am e fakaplaun. 19Ginanya ban fag lungud, gfaurianan aw fagayu tagfalingun ayu. Kata am sik ngay tupa tagfilayan nafangarapyagan, ay roro gfalangfe aw ayu ay gdog kyay faful ayu. Ebi nkapla wam, ay dewa katanya, umdungug ban am sa sangay taw sas fagdaul daga ay kanya nanfauseganan ban ayu. 20Ay ginanya ban fag menit, faful kwa fiya ayu ay fafoli sa ay ngay talun. Fauseganan aw ayu ay umdungug wam sas fagdaul daga. Kanya umgurungan ban gina aw gfaayu ay ngay nanuranan nus nge wain kata ebi ataw. Lumag wam fiya. Aw wan Yawi tagelongan.’ ”
Currently Selected:
Sefanyas 3: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines