Agay 1
1
Diyus Nalong te, “Dogi Awati Ku Bale”
1Ebi gina taguna fag menit sis faunumk magdanun, gina faduwak banwa Daryus nu gmagurang sis talun Persiya, Yawi nasugu at taglong at ngayan Agay laman nanlong sas Sirubabel ay sas Uswe at longan. Ginanya, Sirubabel sik gubernadur sis talun Uda, ay at tama Sealtiyel. Ay Uswe sik fun taganyun, ay at tama Eusadak.
2-3Katatuy Yawi at Madaragang at longan: “Am fag ngay taw, glong am te, bunya katsi at lungud nu gdog kawat ku bale. 4Go sangay manabayan tuwa nu gbanwan am si ay bale at masine dewa ku bale marasrasan? 5Faamatanganuni at ngay kin-gurungan sa ayu. 6Dewa ngayu ay natanum wa ngayu ay naani. Ay dewa am e fakonun ay e fanginum ya kasakan. Ay dewa am e balukas, kariyos yay am. Ay dewa am e nabul fansali ya kasakan. 7Nu katanya, faamatanganuni at ngay kin-gurungan sa ayu. 8Katsi, loi wa sas muyud. Fangkayui ay dogi awati ku bale, laman gfauseganan angku ay at ngay taw gseg tuwa angku. Aw wan Yawi tagelongan.”
9Yawi at Madaragang nalong yangay te, “Gfanseg am te, ngayu ban takafabul siginan ay tanuman, roro wa ngayu. Ay ay nauba sa ay bale nafamin kway sigad. Fakatanyaun ku nafagbulun, nafabayanan am ku bale nu marasrasan, ay gasubuwan way am gfasine ay bale mandi. 10Katanya wayay, banwa wa gfe damug ay daga wa gfatugbung ngay tanum. 11Gfatat aw daga ay ngay muyud. Ay gfagong kwan anggan ngay butul buwadan, ay wat ubas safa, ay langis, ay e tiba yak tanum. Nu katanya, ngay taw ay at ngay balan we fakonun, fagayu tanum infanggalutan wan.”
12Sirubabel, ay Uswe, ay anggan fagayu taw Israel at kinfoli sas talun Israel siginan at fakatabanan sas talun Babilunya nafaning wa fiya at Diyus suguwan at nadungug siginan at taglong Agay. Fakatanyaun at nafagbulun teway gafanud tuwa sas Yawi.
13Agay, Yawi at tagfoyung, nalong sa sangay taw Israel te, “Katatuy Yawi at longan: ‘Gufud aktuwa ayu.’ ” 14Ay Yawi nafatvngvd Sirubabel ay Uswe amatanganan, ay anggan fagayu taw Israel at kinfoli sas talun Israel, laman gdog yay nangawat Yawi bale, at Madaragang fag Diyus. 15Kanya nu gfasigad kawat ebi sis fa-24k menit sis faunumk magdanun, sis faduwak banwa Daryus nu gmagurang.
Currently Selected:
Agay 1: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines