Agay 2
2
Yawi Bale at Kamasinean
1-2Ebi sis fa-21k menit sit fadogan fag magdanun, Yawi nasugu at taglong Agay laman nanlong sas Sirubabel, sas Uswe, ay sa sangay taw Israel at kinfoli sas talun Israel te: 3“Sinu am at nalag ebi taguna ku bale at kamasinean? Tain katsi nu glag am nu gfaladlabian am ebi taguna? Labon lumong wam te, katsi wa kamasine ebi ay we fanambagun. 4Roro fatvngvdi tuwa ay amatanganan! Ay fatunglusi nu kawat am ku bale anway aw, Yawi at Madaragang, gufud kwa ayu. 5Katatuy yangay ku fatuyanan sa ay ngay aguyangan ebi gina aw gfalfas anya siginans talun Iptu. Ay katsi, ku falad si wa gugat ayu, ay nu katanya lag am kalimu.
6“Aw wan Yawi at Madaragang. Glong aw te, wa lumugo sayginan kya muwig banwa, ay fagdaul daga, ay anggan dagat. 7Ay muwig aw fagayu talun laman at ngay taw muba fagayu fagmabalanun ste si ku bale. Ay umkayu at mafanud fag ngay nanuranan sa ku bale. 8Aw wan tagbilug ngay pilak ay ngay gintu. 9Ay katsi, ku bale nu masine glabi yay at dan. Ay nanfanabayan aw ste fag talun. Aw wan, Yawi at Madaragang, at nalong.”
Yawi e Famanyun
10Ebi sis fa-24k menit sis fasiyamk magdanun, sis faduwak banwa Daryus nu gmagurang, Yawi nalong sas taglong Agay te, 11“Intoi sa sangay taganyun te, go tain at masuwad tuy fag suguwan: 12Sik taw nu e ubanan sit balukas sik karni at mafasamanan,#2:12 karni at mafasamanan: At masuwad te, mafasamanan teway naanyun sas Yawi. ay at balukas nu natayuk sa sik tinafay, sa sik sabo, sa sik fanginum, sa sik langis, ay nus nge wain fag fakonun, go manga ka fag ngay fakonun sik mafasamanan yay?” Ngay taganyun nabalus te, “Yaya.” 13Ay Agay ginto yay fiya te, “Sik taw mafurat galay nated sik matean ay nu natayuk ka fag ngay fakonun, go manga ka fag ngay fakonun mafurat yangay?” Ngay taganyun nabalus te, “Kin.” 14Ay Agay nalong te, “Yawi gfatuyan te, katanya yangay ebi taw Israel, anway mauri way nu gugalian. Nus nge wain at ngay fagbulun ay at ngay anyun mafurat way sas Yawi at daga salubangan. 15Ay katsi, faamatanganuni at ngay kin-gurungan sa ayu bagu am gfasigad nangawat Yawi bale. 16Anway ebi, nu nanlo am sas fafulan ay ngay fare ay gfanseg am te, kumfaful ban 20k gatang, roro ay nabul safuluk gatang way. Ay nu nanlo am sas faglafian wat ubas ay gfanseg am te, kumfaful 50k galun safa ubas, roro ay nabul 20k galun way. 17Yawi nafafanggalutan ay ngay tanum siginan sik masugba fag tagmara, ay sik ngay famate, ay sik moyan yelu kata sik ngay batu ayu sirut, ay roro wam kafoli sa anya. 18Katsi fa-24k menit sis fasiyamk magdanun, ginanya nu katabu nu kawat Yawi bale at fagfatungkudan. Siginan katsi fag menit linggati te, go tain at kumgurungan. 19Dewa namin at ngay fare, ay we buwadan at ngay ubas, kayu igus, pumegranata, ay ulibu, siginan katsi Yawi mamanyun wa ayu.”
Yawi e Fatuyanan sas Sirubabel
20Ginanya yangay fag menit, Yawi gdog yay nalong sas Agay. 21Glong te, “Nanlongi sas Sirubabel te, ‘Muwig aw banwa ay fagdaul daga. 22Ay rumasras aw at ngay fagmagurangan ay gfalyam akyangay at ngay fagmadaragangun. Gfabungle aw at ngay karwai ay at ngay tagsakay sanya. Umkate at ngay kabayu, ay at ngay tagkabayuwan gfadfatean wan.’ 23Ay nanlongi yangay sas Sirubabel ku fanuguwan te, ‘Ginanya ban fag menit, o wa ban tagmagurang teway o wan ku nafili. Aw wan, Yawi at Madaragang, at nalong.’ ”
Currently Selected:
Agay 2: TAWEAST
Highlight
Share
Compare
Copy
Want to have your highlights saved across all your devices? Sign up or sign in
Copyright © 2023 by OMF International, Philippines