Sakariyas 1
1
Sik Longan Famafoli sas Yawi
1Ebi sis fawaluk magdanun ay sis faduwak banwa Daryus nu gmagurang sis talun Persiya, Yawi e longan sas Sakariyas sik taglong. At tama Berekiya ay at fufuwama Iddu. 2-3Yawi at Madaragang nasugu sas Sakariyas te, foyungi sa sangay taw Israel te,
“Kadotama aw dawdaw sa ay ngay aguyangan. Nu katanya, afolii wa sa angku ay anggan aw umfoli kyangay sa ayu. 4Lag am gfaning ay ngay aguyangan at nafagbulun. Ebi nasugu aw sik ngay taglong sa ay ngay aguyangan te, ‘Ubuni wan ay ngay fagbulun at mauri,’ ay roro kanya wa nadungugan ay wa nafaning angku. 5Ay ngay aguyangan ay ka fag ngay taglong inkate wan. 6In-gurungan wa fiya sa ay ngay aguyangan ku ngay longan ay anggan ku ngay famatagak siginan ku ngay fanuguwan fag ngay taglong. Ay kanya naubun at ngay asalanan ay nalong te, ‘Yawi at Madaragang nafauri antam katvngvd tam ngay nafagbulun, kata at fasadanan at fagbulun sa antam.’ ”
Sakariyas e Nalag sik ngay Kabayu
7-8Ebi sis fa-24k menit, sis Sebat fag magdanun (falabi sadik magdanun), gina sis faduwak banwa Daryus nu gmagurang Yawi e nafalag sas Sakariyas. Katatuy Sakariyas at foyungan:
Ebi sik yabi, nalag aw sik taw nu gsakay sis kabayu maraska ay inlindug sisad datag sis wa kayu mirtu. Ay sit faguyanan e gsakay si sangay kabayu maraska, ay anggan yangay sis kabayu maraska bangan ay sis kabayu malagsi. 9Ay nainto aw sa tagfasulitanan angku fag tagfabarita te, “Ku fun, taw manga at masuwad kanya fag ngay tagkabayuwan?” Ay kanya nabalus angku te, “Nanfayamag aw sa emu at masuwad.”
10Ka fag taw at kinlindug sis wa kayu mitru, kanya at nafayamag sa angku. Ay nalong te, “Ka fag ngay tagkabayuwan Yawi at nasugu laman nansafungan sas fagdaul daga.”
11Ay ka fag ngay tagkabayuwan nalong sas Yawi at tagfabarita at kinlindug sis wa kayu mitru te, “Nasafungan wami fagdaul daga ay nu glag ami mabayan tuwa.”
12Yawi at tagfabarita nalong te, “Yawi at Madaragang, seduge ya ban nu kafanyu o fulan Erusalem ay tiba yak fulan sis Uda? Fituk safulu wak banwa nu kadotama o sanya.” 13Ay Yawi at famalus sik ngay masine ay famatvngvd sat amatanganan fag ngay elongan sas tagfabarita tagfasulitanan angku.
14Ay at tagfabarita nalong angku te, “Longi Yawi at Madaragang at longan: ‘Kesug aktuwa fulan Erusalem (at ngayan at sadi, Siyun). 15Roro matvngvd nu kadotama aw sa sangay talun tagfaning at fakaumsigun mandi. Ebi dakdi bangan kadotama anya, ay roro kanya yay at nafaugat nu kadotama aw sa anya. 16Nu katanya, umfoli aw e fakafanyuun sas fulan Erusalem, ay gdog kyangay fiya nangawat fulan Erusalem ay anggan ku bale.’ ”
17At tagfabarita nalong yangay fiya sa angku te, longi Yawi at Madaragang at longan: “Gdog yangay ban fiya umke nanuranan ku ngay fulan sas Uda. Ay gdog kyangay ban fiya nanfataluwan Siyun, at masuwad te, fulan Erusalem, ay gdog kyangay ban fiya gfili ku fulan.”
Sakariyas e Nalag Ufat Sunge ay Ufat Takawat Bale
18Ay e nalag aw ufat sunge. 19Ay nainto aw sa tagfasulitanan angku fag tagfabarita te, “Nataw manga at masuwad ka fag ufat sunge?” Ay kanya nabalus angku te, “Ka fag ufat sunge at nafarapyag taw Israel, ay taw Uda, ay anggan taw Erusalem.”
20Ay Yawi nafalag yangay angku ufat takawat bale. 21Ay nainto aw te, “Nataw manga kanya at fagafagbulunun?” Ay kanya nabalus angku te, “Kanya nanfaudkulugan ay nanlifung ka fag ngay sunge. Ay ka fag ngay sunge at narasras fiya fiya talun Uda ay at nafarapyagan at ngay taw.”
Currently Selected:
Sakariyas 1: TAWEAST
Highlight
Share
Compare
Copy
Want to have your highlights saved across all your devices? Sign up or sign in
Copyright © 2023 by OMF International, Philippines
