Sakariyas 2
2
Sik Ama at ke Ubanan sik Fansukat
1Ay e nalag aw sik ama e ubanan sik fansukat. 2Nainto aw anya te, “Dada ro o?” Ay kanya nabalus angku te, “Sa akway Erusalem; nansukat aw at kadaulan ay at kabaan.” 3Ay ka fag tagfabarita tagfasulitanan angku nalo wan, ay sadi yak tagfabarita nafablang anya 4ay nalong te, “Mafalii tuwa, longi kanya fag baguwama at ke ubanan fansukat te: Erusalem umsik fulan at yud e alad, anway inkayu wa dawdaw at taw ay anggan at ngay balan. 5Ay Yawi glong te, ‘Aw wa ban fiya fiya at alad afuy sa sangaba tigyangan fulan Erusalem, ay aw yangay at ke fagmadaragangun sanya fag fulan.’ ”
Yawi Gdog yay Gfafoli at ngay Taw sa at ngay Talun
6-7Yawi nalong sa sangay taw Israel te, “Nafasaruwayan aw ayu sas fagdaul daga. Ay katsi, lagyui wan, anggan yangay am at kintaban sas talun Babilunya, ay afolii wa sas Siyun.”
8Ay nu nalag aw katanya Yawi at nafalag sa angku, Yawi nasugu angku te, “Elongani mauri sa sangay tagfauri ayu ay tagbul ay ngay nanuranan, anway nus nga sinu tagfagbulun mauri sa ayu kata wa nafagbulun mauri sas Yawi at fakesugun fag taw.” Katatuy Yawi at Madaragang at longan sa tagfauri ayu: 9“Nanfauri aw ka fag ngay taw; ay at ngay fanuguwan nanfabarangyan anya ay mul wan at ngay nanuranan.”
Ay nu mgurungan wa katanya, sumaful wam te, Yawi at Madaragang at nasugu angku.
10-11Yawi nalong te, “Am tagbanwan sis Siyun,#2:10-11 ngay tagbanwan sis Siyun: Sis Fangebriyu, Siyun at unga fag mangena. useganani fangurowani, anway kadasug aw ay manwan aw maful ayu. Ay ginanya ban fag lungud ngayuk talun at nanfababaun sa angku. Ay kanya ban ku ngay taw.”
Nu mgurungan wa ban katanya, sumaful wam te, Yawi at Madaragang at nasugu angku ste si ayu. 12Ay Yawi gdog yangay magbilug talun Uda laman anya fag afud siginans Israel at mafilian fag talun. Ay gdog yangay gfili Erusalem at fulan.
13Fagayu am, maragangani sas Yawi at daga salubangan, anway kanya gadasugun siginan at mafasamanan fag fagbanwanan.
Currently Selected:
Sakariyas 2: TAWEAST
Highlight
Share
Compare
Copy
Want to have your highlights saved across all your devices? Sign up or sign in
Copyright © 2023 by OMF International, Philippines
