Uan 10
10
Isus Nafafaskudanan sa baliwa sik Tagtanud Tupa
1Matuyan iglong aw ayu te, “Sik taw tagsakbo nu dway sas tupa sakbawan, nu gulul way sas alad, kanya sik takamul way ay takamate. 2Ay tagsakbo nu sa tuwa tupa sakbawan, kanya sik tagtanud tupa wa fiya. 3Ay tagulit sakbawan naluwang ay nafasakbo ka fag tagtanud tupa, ay at ngay tupa gtogdungug tuwa at tagtanud nu gelongan. Ay igngayan at ngay tupa ay gtaban sad talun. 4Ay nu sad talun wan, at tagtanud tuwa taguna ay at ngay tupa galo tuwa anya, anway gtogdungug tuwa at tagtanud nu gelongan. 5Ay at ngay tupa kayayu way ay wa nangalo nut sa way tibak taw, anway at ngay tupa wa gtogdungug at elongan.”
6Isus nafoyung ka fag fafaskudanan sanya fag ngay taw, ay roro wa nasaful Isus foyungan at masuwad.
Isus Nafafaskudanan Anya te, “Aw wan ngay Tupa at Sakbawan”
7Ay Isus gdog yay nalong te, “Matuyan iglong aw ayu te, aw wan ngay tupa at sakbawan. 8Fagayu at naguna angku nasakbo, sik takamul ay takamate. Ay ku ngay tupa wa gdungugan anya. 9Aw wan at sakbawan. Nus nga sinu tagsakbo sasad sakbawan, umlangfe wa fiya. Ay kanya kata sik tupa, ay glaklo, ay lumag at fagfangonan, ay guli. 10Ay sik takamul at fagindasugun laman nanfamul way, ay nanrasras, ay nanfate. Ay aw, ku fagindasugun laman ngay taw umke leleg wa fiya ay kasakan tuwa.”
11“Aw wan at matuyan fag tagtanud tupa. Anway at matuyan fag tagtanud tupa mabayan tuwa dewa te, e gananfateun wa anya, laman at ngay tupa e fanambagun ban. 12Sik yud matuyan fag tagtanud tupa at fasadan anway fagtvngvd te, gbul way at nalufuyan. Ay wa nangasaful at tupa at ugali, teway bunwa ngani kanya tagbilug tupa. Ay nu nabantay wa long sik idu talun, ka fag tagtanud naubun wan at ngay tupa ay nalagyu wan. Ay ka fag idu talun naagat wan at tibak tupa ay tiba nafansaruwayanan wan. 13Kanya fag tagtanud glagyu way, teway kanya sik yud way matuyan fag tagtanud ay wa kafanyu at ngay tupa. 14-15Aw wan at matuyan fag tagtanud tupa. Kata ku Mama nu gsaful angku ay kata yangay nu gsaful aw ku Mama, katanya yangay nu gsaful aw ku ngay tupa, ay anggan ku ngay tupa gsaful yangay angku. Ay mabayan aktuwa dewa te, e gananfateun wa angku, laman ku ngay tupa e fanambagun tuwa. 16Ay e tibak tupa akyay, bundi am fagtvngvd. Ay nanfaful akyangay ban ka fag ngay tupa, laman kanya sumaful yangay ban nu gelongan aw. Ay nanfasadi akyay ban ku ngay tupa ayuwayu laman sadi tuwa tagbilug.
17“Ku Mama kesug tuwa angku anway mabayan aktuwa dewa te, e gananfateun wa angku, ay gdog akyangay ban gleleg. 18We mafafate angku nu dakway kaumsig kate. Aw, mabayan aktuwa dewa e gananfateun wa angku. Ay roro e fagmadaragangun aw gfon ku leleg ay e fagmadaragangun kyangay nangaleleg. Katanya ku Mama at suguwan angku.”
19Ay taw Udyu at ngay amatanganan wa gdiyuganan, anway Isus at nalongan. 20Ay ngayuk tagelongan te, “Kanya e mafurat fag falad. Taw ro ay fagdunguganun anya?” 21Ay tibak taw glong tuwa te, “Igdi. Madyay nu gelongan di kata nu e mafurat fag falad. Laman ro nu anway e mafurat fag falad, wa mafafiya sik taw at yud glag.”
Taw Udyu Kalimata Isus
22Ay gina matis fag lungud, indasug at fagmafulun sa baliwa Nu Gfanakbo Diyus bale sis Erusalem. 23Ginanya Isus gayayag sis Diyus bale, sanya sis maugunan fag dalan, at ngayan te, Sulumun. 24Ay taw Udyu nasafungan Isus ay ginto te, “Seduge ro nu gfoyung o emi at matuyan te, go o wan Diyus at nafili fag Fun? Foyungi wemi katsi wan, laman sumaful wami te, o wa ngaro fiya.” 25Ay Isus nabalus sanya fag ngay taw te, “Ebi batang kwa gfoyung ayu anway te, wam gafanud. Ku nafagbulun fag ngay fagbulun sa ku Mama at fagmadaragangun at tagfatuyan te, matuyan ku longan. 26Ay roro wam gafanud, teway bunwa am ku ngay tupa. 27Ku ngay tupa gtogdungug tuwa nu gelongan aw. Ay gsaful aw te, kanya ku ngay tupa. Ay ku ngay tupa galo tuwa angku. 28Ay gfon aw leleg at yud katabu sa ku ngay tupa. Ay di ban kate faggugat. Ay we mafafaago angku. 29Ku Mama nafon angku ka fag ngay tupa. Ay ku Mama wan tiba tungud. Ay we mafafaago siginan ku Mama. 30Sadi tuwa ami, aw ay ku Mama.”
31Ay ka fag ngay taw Udyu gdog yay fiya nabul batu, ay gafalangun sas Isus. 32Ay Isus nalong te, “Nafalag kwa ayu ku Mama at nafafagbulun sa angku at masine. Taw ro ay fakalimataun ku fagbulun ay ay fagafalangun batu sa angku?” 33Ay taw Udyu nabalus Isus te, “Wami gafalangun emu teway masine tuwa am fagbulun. Em fagafalangun emu anway te, nu gfasad ami am longan mauri way sas Diyus baliwa. Anway nu gfasad o sik Diyus o, dewa o sik taw.” 34Ay Isus nalong te, “Marirukan sa ay Suguwan te, Diyus nalong te, sik ngay diyus wam. 35Nasaful watam te, tam Diyus at longan e masuwad tuwa faggugat. Ay ebi Diyus nafangayan ka fag ngay taw at fagfoyungan at longan te, ‘diyus’. 36Nu katanya, taw ro ay fagnalongunun angku te, mauri way ku longan sas Diyus baliwa sa ku nalongan te, aw wan Diyus at Baguwama? Diyus wan at nafili angku ay at nasugu angku ste swa daga. 37Nu dakway ro gfaning ku Mama at nafafagbulun sa angku, lag am gafanud ku longan. 38Ay nu gfaning aktuwa ku Mama at nafafagbulun sa angku, afanudi tuwa sa ku Mama at fagbulun, dewa am gyud gafanud sa angku, laman sumaful am te, ku Mama si wa angku ay aw si kwa ku Mama.”
39Ay ka fag ngay taw Udyu gdog yay fiya gagamatun Isus. Ay Isus wa nasudan, nasuksuwan wan.
40Ay Isus infoli yay fiya sas dife Safa Urdan sas Uan fagfasurungan at talun, ay gbanwan yay sirut sanya. 41Ay ngayuk taw at nangakbang sas Isus. Ay ka fag ngay taw igsulitanan sit dayu te, “Uan dewa yud e nafagbulun at madulawan, matuyan tuwa fagayu at longan sas Isus baliwa.” 42Ay sanya ngayuk taw tagafanud sas Isus.
Currently Selected:
Uan 10: TAWEAST
Highlight
Share
Copy
Want to have your highlights saved across all your devices? Sign up or sign in
Copyright © 2023 by OMF International, Philippines
