Uan 9

Isus Nafafiya sik Taw at yud Glag

1Ay Isus kaduge glo, e nalag sik taw at yud glag siginan ngay bagu kasalug. 2Ay Isus at ngay tagadal ginto anya te, “Em Takamoyung, sinu at ke asalanan, nin fag ama ay ate at magurang?” 3Ay Isus nabalus te, “Bunwa kanya ay ate at magurang at ke asalanan. At masuwad at fagyudun glag, antuwa te, laman umsure Diyus at fagmadaragangun nu gfafiya anya. 4Kaduge mamenit, masine nu nanfagbulun tam sa at nasugu angku at fagbulun, teway nu nyabi wan wa kafagbulunan. 5Kaduge aw ste swa daga, aw wan at salung sa sangay taw sfagdaul daga.” 6Ay Isus nu nalong wa katanya, kanya natufe sas daga ay nafalifak, ay nararus ka fag lifak sat yud glag at mata. 7Ay Isus nalong sat yud glag te, “Loi wan ay fegusi am mata sas Siluam fag fagigusan.” (Siluam at masuwad te, “Nasugu”.) Ay ka fag taw nalo wa fiya ay nafegus at mata. Ay nu kafoli, glag wan.

8Ay at ngay fasabale ay anggan at ngay taw at nalag anya ebi gina get nalong te, “Go kanya wa siring ebi at yud glag ay malunggung get?” 9Ay tibak taw nalong te, “Kanya wa fiya.” Ay tibak taw nalong yangay te, “Yaya! Sik taw way kata anya nu gmatan.” Ay ka fag ama glong te, “Aw wan.” 10Ay ka fag ngay taw ginto anya te, “Tain ngap daw am mata nu kafiya?” 11Ay kanya nabalus te, “Sik ama at ngayan Isus naawat lifak ay nararus sa ku mata, ay nalong angku te, ‘Loi wan sas Siluam fag fagigusan ay fegusi am mata.’ Ay nalo akwa fiya. Ay nafegus aw ku mata ay glag akwan.” 12Ay ka fag ngay taw ginto anya te, “Dada wan katsi ka fag ama?” Ay nabalus te, “Safulun long.”

Taw Parisiyu Gyasafulun te, “Tain nu Kafiya?”

13Ay tiba nataban ka fag taw at yud glag ebi sa sangay taw Parisiyu. 14Ginanya Fakamatoun fag Menit Isus nu nafalifak ay nu nafafiya ka fag taw at mata. 15Ay ka fag ngay taw Parisiyu ginto sa ka fag taw te, “Taw ro am faglagun wan?” Ay ka fag taw gbalus te, “Sik ama nararus lifak sa ku mata. Ay nu nafegus akwa ku mata, glag akwan.” 16Ay tibak taw Parisiyu nalong te, “Ka fag ama bunwa Diyus at fanuguwan, anway kanya wa gfaning tam ugali madyay nu gfafiya si ways Fakamatoun fag Menit.” Ay tiba nalong yangay te, “Ka fag ama nu sik tagasalanan way, setain nu mafafagbulun at madulawan fag ngay fagbulun?” Ay ka fag ngay taw at amatanganan wa gdiyuganan.

17Ay ka fag ngay taw Parisiyu gdog yay fiya nainto sa ka fag taw te, “Tain am famayamag sa emi sa anya baliwa, anway kanya at nafafiya am mata?” Ay ka fag taw nabalus te, “Kanya Diyus at taglong at sadi.” 18Ay taw Udyu at ngay tagmagurang wa kalong gafanud te, ebi fag taw at yud glag katsi glag wan, yap ngay nafat sanya kanya fag taw at magurang fag duwa. 19Ay ka fag ngay taw Udyu ginto sat magurang fag duwa te, “Go tuy ay baguwama? Ay go siginan ngay bagu kasalug wa glag wan? Ay tain katsi at faglagun tuwa?” 20Ay at magurang gbalus te, “Tuy ngaro em baguwama wa fiya. Ay nasaful wami te, wa glag siginan ngay bagu kasalug. 21Ay wami nasaful te, taw katsi faglagun tuwa, ay sinu at nafafiya anya. Intoi wa anya, anway kanya gtogdungug wan ay mafabalus wa mandi.” 22Katanya at magurang famalus, fakatanyaun, kalimu taw Udyu at ngay tagmagurang, teway ebi nadiyuganan te, sik taw nu nafoyung way te, “Isus, tam Diyus at nafili fag Fun”, ayani wan ka fag taw siginans tam bale fakafulan. 23Katanya at magurang fag duwa at fagnalongun te, “Intoi wa anya, anway kanya gtogdungug wan.”

24Nu katanya, ka fag taw Udyu at ngay tagmagurang gdog yay fiya nagewan ka fag taw ebi at yud glag. Ay nalong sanya te, “Sis Diyus at daga salubangan foyungi sa emi at matuyan. Nasaful wami te, aro fag tagfafiya emu sik tagasalanan way.” 25Ay ka fag taw nabalus te, “Dakwa gsaful te, go ka fag taw sik tagasalanan way, ay go igdi. Ku nasaful sadi way te, madyay aro ataw kwa glag, ay katsi glag aktuwa.” 26Ay ka fag ngay taw ginto yangay te, “Go tain at fagbulun sa emu? Ay tain nu gfafiya emu?” 27Ay ka fag taw nabalus te, “Nafoyung kwa ayu aro, ay wam gdungugan. Ay taw ya ro katsi ay fagyadungugun fag famalus? Ay go ate kaumsig wam at tagadal?” 28Ay ka fag ngay taw inlimata anya ay nalong te, “O way at tagadal, ay ami, Muisis tuwami at tagadal. 29Anway nasaful wami te, Diyus naelongan sas Muisis. Ay kanya aro fag taw, wami nasaful te, daginan.” 30Ay ka fag taw nalong te, “Katanya ngani at madulawan. Wam nasaful te, daginan ka fag taw, dewa nafafiya tuwa ku mata. 31Ay nasaful watam te, Diyus wa gdungug sik tagasalanan. Ay roro ngap nus nga sinu tagseg anya ay tagfaning, Diyus nadungug wa fiya anya. 32Ya tam batang e nadungug siginan ngay ebi ebi sfagsigadan te, sik taw nafafiya sik taw at yud glag siginan ngay bagu kasalug. 33Kanya fag taw nu bunway siginans Diyus, wa ro mafafagbulun takatanya.” 34Ka fag ngay taw nalong te, “Insalug o sik tagasalanan. Ay katsi wo kapla kamoyung emi.” Ay ka fag ngay taw naayan wan ka fag taw siginans bale fakafulan.

At Bagu Glag fag Taw Gafanud wa sas Isus

35Isus nadungug te, taw Udyu at ngay tagmagurang naayan wan at bagu glag fag taw. Nu katanya, Isus nasarap ka fag taw, ay nu nalag wan nainto te, “Go gafanud tuwo sas Taw at Baguwama?” 36Ay ka fag taw nabalus te, “Ku Fun, sinu kanya, Taw at Baguwama? Kaumsig aw gafanud sa anya.” 37Ay Isus nabalus te, “Nalag wo anya. Ay kanya wa tagfasulitanan emu katsi.” 38Ay ka fag taw nalong te, “Ku Fun, gafanud aktuwa sa emu!” Ay kanya natudan ay naseg Isus.

39Ay Isus nalong te, “Ku fagindasugun ste swa daga laman nanfoyung aw te, fagayu taw e asalanan. Ay laman at yud glag, glag tuwa ban. Ay at taglag, laman ban wa glag.” 40Ay tibak Parisiyu at makbang Isus nu nadungug at longan, nainto te, “Go am longan at masuwad anggan ami, wami glag?” 41Ay Isus nabalus te, “Nu glong di am te, wam glag katsi, satu di am e asalanan. Ay roro ngap glong am te, ‘Iglag tuwami.’ Ay nu katanya, gasalanan yay am.”

Currently Selected:

Uan 9: TAWEAST

Highlight

Copy