Uan 8

Sik Takamayun fag Mangena

1Ay Isus nalo wa sas Bugsul Ulibu. 2Ay balabag di sbalabag sirut, Isus infoli wa sas Diyus bale. Ay ngayuk taw at nalo sanya. Ay Isus malunggung ay kamoyung sa sangay taw. 3Ay ngay tagfoyung Muisis at Suguwan ay ngay taw Parisiyu nataban sik takamayun fag mangena. Fakatanyaun, teway tiba nalag nu kamayun ka fag mangena. Ay nafalindug ka fag mangena sis wa fagngayuwan taw. 4Ay ka fag ngay taw nalong sas Isus te, “Em Takamoyung, tuy fag mangena e nalag nu kamayun. 5Sis Muisis at Suguwan nafoyung antam te, nus nga sinu fag mangena takatanya at ugali, falangi anya batu. Ay tain emu am fasadan sa anya?” 6At fagintoun katanya, anway at fakaumsigun nanfe asalanan Isus, laman e kafoyung Isus at asalanan. Ay Isus naarungan ay griruk sas daga. At sumyu wan at fanriruk. 7Ay ka fag ngay taw gfaladlayunan wan nu ginto Isus. Ay Isus inlindug ay nalong te, “Nus nga sinu at yud e asalanan, kanyai taguna tagfalang anya batu.” 8Ay Isus gdog yay fiya naarungan ay griruk sas daga. 9Ay ka fag ngay taw nu nadungug Isus at longan, nalo wa nasadsadian, ay taguna at nalo at ngay mafufuwama anggan wa te fagayu nalo wan. Isus way ay ka fag mangena tagsanya. 10Ay Isus inlindug ay ginto sanya fag mangena te, “Sena, dada wan ka fag ngay taw? Go di e nafauri emu?” 11Ay ka fag mangena nabalus Isus te, “Igdi, ku Fun.” Ay Isus nalong te, “Anggan aw, dakdi gfauri emu. Loi wan, ay lag gdog nangasalanan.”

Isus Nafafaskudanan Anya, Sik Fagmayamagun

12Ay Isus gdog yangay fiya nafoyung sanya fag ngay taw te, “Aw wan at fagmayamagun sas fagdaul daga. Nus nga sinu at tagalo angku, di ban glo sad marum, antuwa kanya e fagmayamagun tuwa tagfon leleg.” 13Ay ngay taw Parisiyu glong sas Isus te, “O way mandi tagfatuyanan sa emu. Ay nu katanya, am longan we masuwad.” 14Ay Isus nabalus te, “Dewa aw mandi tagfatuyanan sa angku, matuyan tuwa ku longan, anway nasaful aw te, sanya ginan aw, ay sanya ban nu glo aw. Ay roro ngap wam nasaful te, sanya ginan aw ay sanya ban nu glo aw. 15Nu gfauri way am sik taw, ay fagfaningun sa way sik taw at amatanganan. Aw, dakdi gfauri nus nga sinu. 16Ay dewa aw gfauri sik taw, kanya kasakan tuwa sat nafagbulun, anway dakdi gsesadian, ami tuwa ku Mama at nasugu angku tagfauri. 17Marirukan sa ay suguwan te, nu duwa wak taw at nadiyuganan at longan, matuyan wa fiya. 18Aw wan tagfatuyan sa ayu ku ugali. Ay anggan ku Mama, at nasugu angku gfatuyan yangay. 19Ay ka fag ngay taw Parisiyu ginto sas Isus te, ‘Dada am Mama?’ ” Ay Isus nabalus te, “Wam nasaful te, sinu aw, ay sinu ku Mama. Nu nasaful tuwam angku, nasaful yangay am ku Mama.”

20Isus nu kamoyung katanya, makbang sis ke fagsuwadan singku, sis Diyus bale. Ay we taw nagamat anya, anway Isus at menit ya ndasug.

Wa ban Am Masud sa Ku Fagnangadasugan

21Ay Isus gdog nalong sa sangay taw Udyu at ngay tagmagurang te, “Lumo kwa ban ste ginan, ay sumarap ban am angku, ay roro umkate wa ban am yud nafalyam ay ngay asalanan. Ay wa ban am masud sa ku fagnangadasugan.” 22Ay ka fag ngay taw Udyu gsulitanan te, “Go sangay Isus nangate wa mandi?” Madyay kanya nalong sa antam te, “Wa ban am masud sa ku fagnangadasugan.” 23Ay Isus nalong te, “Am, tagste way am swa daga. Ay aw tagsiginan tungud. 24Nu katanya, glong aw ayu te, umkate ban am yud nafalyam ay ngay asalanan, anway wam gafanud te, ‘Aw wa fiya,’ ay umkate ban am yud nafalyam ay ngay asalanan.” 25Ay ka fag ngay taw Udyu ginto te, “Sinu o sangay?” Ay Isus gbalus te, “Kata wa ebi ku longan ayu siginans fagsigadan. 26Ngayu yay ku fagananlongun ayu. Ay ngayu yay ku fagananfoyungun ay asalanan. Matuyan at nasugu angku at longan. Ay nanfoyung aw sas fagayu taw ste swa daga ku nadungug siginan at nasugu angku.”

27Ay ka fag ngay taw Udyu wa gsaful te, Isus foyungan at Tama wan at nasugu anya. 28Ay Isus nalong sa ka fag ngay taw Udyu te, “Nu nafaabat wa ban am angku, Taw at Baguwama, sumaful wam te, aw wa fiya. Ay anggan sumaful yangay am te, kwe nafagbulun gsesadian. Ku foyungan ku Mama tuwa ngay foyungan. 29Gufud tuwa gugat angku at nasugu angku. Kanya di gubun angku sesadi, anway faggugat gfaning aktuway at fakaumsigun.” 30Gina Isus nafoyung katanya, ngayuk taw at nafanud sa anya.

At Nasaful at Matuyan, Bundi ban sik Fanuguwan

31Isus nalong sa sangay taw Udyu tagafanud sa anya te, “Nu gfaning tuwam gugat ku foyungan, am wa fiya ku ngay tagadal. 32Sumaful am at matuyan, ay di ban am gafanuguwanan.” 33Ay ka fag ngay taw Udyu nabalus Isus te, “Abrayam ami at kadagdagan. Ay di ami batang ka sik fanuguwan. Taw ro am fagnalongun emi te, di ami ban gafanuguwanan?” 34Ay Isus nalong te, “Matuyan iglong aw ayu te, nus nga sinu fag taw nu gasalanan way, kanya asalanan wa fiya at fanuguwan. 35Sik talanan at fanuguwan bunwa faggugat nut sanya fag talanan. At ngay unga tuwa tagsanya faggugat. 36Ay Diyus at Baguwama nu nafalfas tuwa ayu, matuyan nalfas wam. 37Nasaful kwa te, am wan Abrayam at kadagdagan. Dewa katanya, gananfateun way am angku, anway wam kaumsig gfaning ku foyungan. 38Igfoyung aw ayu ku Mama at nafoyung angku. Ay am, ay fagfaningun sa way mandi ay tama at foyungan ayu.”

39Ay ka fag ngay taw Udyu nalong sas Isus te, “Abrayam em tama!” Ay Isus nabalus te, “Nu Abrayam wam fiya at ngay unga, nu gfagbulun am kata tuwa nangus at ngay fagbulun. 40Ay roro ngap katsi kaumsig way am gananfateun angku, dewa aw sik taw tagfoyung ayu at matuyan, ku nadungug siginans Diyus. Bunwa katanya Abrayam at fagbulun. 41Ay fagfaningun ay tama way fagbulun.” Ay ka fag ngay taw Udyu nabalus Isus te, “Bundi ami sik nafamayun at unga. Diyus tuwa em Tama.” 42Ay Isus nabalus te, “Ay tama nu Diyus tuwa, kesug tuwam angku, anway indasug aw ste swa daga siginans Diyus. Ay ku fagindasugun kwa gfaning ku fakaumsigun. Ku fagfaningun sa tuwa at nasugu angku at fakaumsigun. 43Taw ro ay fagyudun gsaful ku longan? Fakatanyaun wa mangaro am gdungugan ku longan. 44Satanas way ay tama. Ay nus nga setaw ay tama fakaumsigun, katanya yangay ay fagfaningun. Siginan ngays fagsigadan kanya sik takamate wa taw. Ay wa gfaning at matuyan, teway at matuyan wa si anya. Kanya kamuwag way ay gfaning at ugali. Ay kanya takamuwag fag ngay taw at tama. 45Ay dewa aw nafoyung at matuyan, wam gafanud angku. 46Sinu am nu kin at mafafoyung angku ku asalanan? Ay nu matuyan tuwa ku foyungan, taw way ay fagyudun gafanud angku? 47Diyus at ngay unga gdungugan tuwa Diyus at longan. Ay ay fagyudun kaumsig gdungugan bunwa am Diyus at ngay unga.”

Isus ay Abrayam

48Ay ka fag ngay taw Udyu nalong sas Isus te, “Go matuyan em longan aro te, sik taw o Samarya at ke mauri fag falad?” 49Ay Isus nabalus te, “Dakdi e mafurat fag falad. Gfauseganan aktuwa ku Mama. Ay kalimata way am dawdaw angku. 50Ay aw, kwa gsarap dawdaw te, laman e gseg angku. Ku mama tuwa at ke fasadan laman e gseg tuwa angku. Ay kanya gsaful tuwa te, ku longan matuyan wa fiya. 51Matuyan iglong aw ayu te, nus nga sinu tagfaning ku longan, di ban kate faggugat.” 52Ay ka fag ngay taw Udyu nalong sas Isus te, “Katsi nasaful wami fiya te, e mafurat way o fag falad. Madyay inkate wan Abrayam, ay anggan ebi Diyus at ngay taglong. Ay nalong yay o te, ‘Nus nga sinu tagfaning ku longan, di ban kate faggugat.’ 53Go o tuwa taglabi em aguyangan Abrayam at kinkate, ay anggan ebi Diyus at ngay taglong at kinkate? Tain nu gfoyung o emu sa tibak taw?” 54Ay Isus nabalus te, “Nu aw way ro mandi tagfauseganan angku, we masuwad. Ku Mama tuwa tagfauseganan angku. Ay am, glong am te, ‘Kanya em Diyus.’ 55Wam nasaful anya. Aw way at nasaful anya. Nu nalong akway ro te, kwa nasaful anya, sik takamuwag akway kata ayu. Ay roro aw, nasaful akwa anya ay gfaning aw at longan. 56Ay aguyangan Abrayam guseganan dawdaw ebi nu lumag di ban nu kadasug aw fag menit. Ay kanya nalag wa fiya, ay nauseganan wa dawdaw.” 57Ay ka fag ngay taw Udyu glong sas Isus te, “Bunya 50 am banwa. Taw ro am fagnalongun te, nalag wo Abrayam?” 58Ay Isus nabalus te, “Matuyan iglong aw ayu te, ‘Gina Abrayam yud insalug, Aw, aw wan.’ ” 59Nu katanya, ka fag ngay taw Udyu nafuyut batu laman nanfalang Isus. Ay roro Isus nasuksuwan wan, ay nalo wan siginans Diyus bale.

Currently Selected:

Uan 8: TAWEAST

Highlight

Copy