Malakyas 1
1
1Katatuy Yawi at foyungan sa sangay taw Israel at nalong sas Malakyas.
Yawi Kesug tuwa Taw Israel
2Yawi nalong te, “Taw Israel, kesug aktuwa ayu. Ay roro e fagintoun yay am te, ‘Setain nu kesug o emi?’ Amatangani te, dewa Akub ay Isaw sik dugsay, ku nesugan antuwa Akub, 3ay kwa kesug Isaw. Ay Isaw at tagbudbugsulanun fag ngay talun kwa nafe fanambagun, ay tagbanwan sanya sik ngay idu talun way.
4“Taw Idum#1:4 Taw Idum: at masuwad te, Isaw at ngay kadagdagan. labon lumong te, ‘Dewa e narasras tam fulan, gdog yay ban tam nangawat.’ Ay aw, Yawi at Madaragang, glong aw te: Dewa ban gdog nangawat at fulan, rumasras kyay ban fiya. Ay at ngay taw fangayan ban te, ‘mauri fag fulan’ ay ‘Yawi at nalimatan gugat fag ngay taw.’ 5Lumag wam ka fag fulan nu mrasras ay lumong am te, ‘Yawi madaragang wa fiya dewa sas day Israel.’ ”
Yawi Nasalag ngay Taganyun
6Yawi at Madaragang nalong sa sangay taganyun te, “Sik sisiyan gfaning tuwa at tama, ay sik fanuguwan gfaning tuwa at fun. Ay dewa aw ay tama ay ay fun, wam gfaning angku. Gfalingun way am angku. Ay e fagintoun yay am te, ‘Tain nu gfalingun ami emu?’ 7Nu gfalingun am angku, anway te, ganyun am at mafurat fag anyun#1:7 mafurat fag anyun: at masuwad te, at yud masine fanganyun sas Diyus. sa ku fagyagoan. Ay e fagintoun yay am te, ‘Tain em anyun nu mafurat?’ Fagmafuratun ay anyun teway glong am te, we fanambagun ku fagyagoan. 8Ganyun way am sa angku ay ngay balan at yud glag, ay at yud bangan maalafang, ay at mafanalo. Katanya wa masine. Faskudi nu kin, foni sa ay fun takatanya fag ngay balan, go museganan tuwa ro?”
9Malakyas nalong te, “Am fag ngay taganyun, eti yap sas Diyus te, afanyui yap antam. Nu katanya way ay ngay anyun sa anya, wa ro fauseganan ayu. Katanya Yawi at Madaragang at longan.”
10Yawi at Madaragang nalong yay te, “Am fag ngay taganyun at sadi dingdingi ku bale at ngay sakbawan, laman wam nanfaigang at yud e fanambagun fag afuy sa ku fagyagoan. Dakwa kaumsig ay ngay anyun, anway dakwa kaumsig ayu. 11At matuyan, siginans fakamenitan anggan sas fakayabian at ngay taw sa tuwa ku ngayan nu gfauseganan. Dewa nus nganday at ngay taw nu gbatas famabebanglu ay ganyun at masine fag ngay anyun sa tuwa angku, Yawi at Madaragang. 12Ay gfaplan way am angku nu glong am te, mafurat ku fagyagoan ay we fanambagun at ngay naanyun sanya. 13Ay iglong yay am te, ‘Kauri wami nanganyun sa emu, Yawi at Madaragang.’ Ay wam fe fanambagun ku fagyagoan. Ay ay fanganyun sa angku anway sik ngay balan tagafamaga, ay at yud bangan maalafang, ay at mafanalo. Nu gfasad am kaumsig aw takatanya? 14Gfauri aw at ngay tagfanluk si ayu, at nafatuyanan te, nanganyun ban at taglabi nu masine fag balan, ay roro at naanyun anway at ke fanlonganan. Gfauri aw anya, anway aw wan at madaragang fag Fun ay at ngay taw fakalimuun sa sangay talun. Aw wan Yawi at Madaragang tagelongan.”
Currently Selected:
Malakyas 1: TAWEAST
Highlight
Share
Compare
Copy
Want to have your highlights saved across all your devices? Sign up or sign in
Copyright © 2023 by OMF International, Philippines