Sakariyas 14
14
Yawi Umdasug ay Nanmagurang
1Umdasug ban Yawi at faurianan fag menit. Kaduge am fag ngay taw Erusalem glinggat, ay ngay fabarangyan nu gafudan at nabul ay ngay nanuranan. 2Anway Yawi nanfaful fagayu talun at ngay taw laman nanfabarangyan ayu. Ka fag ngay taw nanbul ay fulan, ay ngay nanuranan sa ay bale, ay suma ay ngay mangena. Ay at kalati ay ngay taw e fabulun tumaban sa tibak talun, ay at sawad sanya way. 3Ay Yawi nu nanfabarangyan ka fag ngay talun at ngay taw, kata ebi at fagbulun nu gfabarangyan. 4Ginanya ban fag menit, kanya umlindug sis tungud Bugsul Ulibu sas fulan Erusalem sas fakamenitan baliwa. Ka fag bugsul umkafud siginans fakamenitan anggan sas fakayabian. Ay sadik afud malin sas siyun ay at sadi malin sas wala. Ay sanya sad buknga umke datag daul. 5Am fag ngay taw Erusalem sanyai ay dalan nu glagyu am, teway ka fag datag anggan wa umdasug sas fulan Asel. Lumagyu am kata ebi ay ngay aguyangan nu glagyu gina e faleleg. Kadugenya at fun sis talun Uda, Usiya. Ay Yawi, ku Diyus, umdasug gasfuwan at ngay tagfabarita. 6Ginanya ban fag menit, wa masugba ay wa matis. 7Ka fag menit mafilian fag menit, teway wa kayabi; mayamag way gugat. Ay Yawi way fag sadi tagsaful te, ginanya nu kagurungan.
8Ginanya ban fag menit, at masine fag safa kalimus siginans Erusalem. Ka fag safa at sadik saranganan nu kalimus sas Dagat Matean#14:8 Dagat Matean: Sis Fangebriyu, dagat sis fakamenitan. ay at sadik saranganan sas Dagat Mediteraniyu,#14:8 Dagat Mediteraniyu: Sis Fangebriyu, dagat sis fakayabian. ay gtunglusanan tuwa nu kalimus dewa mangune ay anite. 9Ay Yawi wan tagmagurang sas fagdaul daga. Kanya way fag sadi at fagtoglagun fag Diyus, we tiba.
10-11Nanfadatag fagdaul talun siginans Geba sas wala baliwa fag tigyangan anggan sas Rimun sas siyun baliwa Erusalem fag tigyangan. Nu katanya, Erusalem taglabi tibak fulan at kabatan. Ay ka fag ngay taw at fagbanwanan gfasigad siginan sis sakbawan at nangayan te Benamin anggan indasug sas taguna fag sakbawan ay anggan sasad suluk fag sakbawan. Ay siginans Kananel at Ngabat Fagbantayan fag Bale anggan sas fun faglafian ubas. Erusalem wa ban gdog e rumasras, ay at ngay taw sanya manabayan tuwa nu gbanwan, ay di e nalimuwan.
12Ay at ngay talun at ngay taw at nananfabarangyan fulan Erusalem Yawi nanfadasug katatuy fag mason fag famatakan: umruwas at ngay bilug, ay at mata, ay at dila dewa gleleg. 13-15Ay katanya yangay at famatakan at kumdasug sa at ngay balan sa at fagmafulan, dewa ngay kabayu, mola,#14:13-15 mola: kata sik kabayu. kamelyu, ay asnu.
Ginanya ban fag menit, Yawi nanfaligbatan ka fag ngay taw. Ay ka fag ngay taw gfabarangyan wa mandi at tiba, ay tibak fulan sis Uda gfabarangyan yangay sas fulan Erusalem. Kanya mul ay faful fagayu fagmabalanun siginan tibak talun tagsafungan anya — ngayu dawdaw fag gintu, ay pilak, ay balukas.
16Ay at sawad fag ngay taw siginan ka fag ngay talun at nananfabarangyan fulan Erusalem kayu banwa nangadasug sas fulan Erusalem laman nanseg sas Fun, Yawi at Madaragang, ay laman nangaful nanguseganan sa baliwa nu Kawat Bale Sirut. 17At ngay taw at yud glo sas fulan Erusalem laman nanseg sas Fun, Yawi at Madaragang, we moyan sa ka fag ngay taw at talun. 18Ay taw Iptu at yud glo sas fulan Erusalem, Yawi nanfadasug at faurianan kata at fagafadasugun sa sangay talun at yud nangalo laman nangaful nanguseganan sa baliwa nu Kawat Bale Sirut. 19Katanya at fanfauri sas talun Iptu ay sas fagayu talun at yud glo sas fulan Erusalem laman nangaful gina Kawat Bale Sirut.
20Ginanya ban fag menit ka fag ngay talun at ngay taw nu sumeg sas Yawi, riruki sat famadkalingan sis kabayu sik ngay longan te, “Nafaagbilug sas Yawi.” At ngay fagsewudan sas Yawi bale at kamafanudan katvngvd yangay at ngay taya sas fagyagoan. 21Fagayu at fagsewudan sas fulan Erusalem ay sas talun Uda sik mafasamanan wan laman sas Yawi at Madaragang. Kanya wan at ngay taganyun at fagsewudan at anyun. Ginanya ban fag menit, we taw gfe sali sanya sas Yawi at Madaragang at bale.
Currently Selected:
Sakariyas 14: TAWEAST
Highlight
Share
Compare
Copy
Want to have your highlights saved across all your devices? Sign up or sign in
Copyright © 2023 by OMF International, Philippines