Markus 11

Isus nu Kadasug sas Erusalem kata wa sik Fun

(Mat. 21:1-11; Lukas 19:28-40; Uan 12:12-19)

1Isus ay at ngay tagadal indasug wan sas fulan Betfage ay sas fulan Betaniya, makbang sas Bugsul Ulibu. Ay nu gadasugun wan sas fulan Erusalem, Isus nasugu at tagadal at duwa. 2Glong te, “Loi wan sam dayu fag fulan. Ay nu mdasug am sanya, lumag ro am sik asnu masiyukan. Ay ya batang e nasakay sanya. Ay luwasi at siyuk, ay tabani ste. 3Ay gina am gluwas, nu e gsalag ayu te, ‘Taw ro ay fagluwasun?’ Balusi te, ‘Em Fun gayudan at fagsakayan katsi. Ay gfafoli yay ro ste rodi.’ ” 4Ay ka fag duwama nalo wa fiya. Ay nalag wa fiya sik asnu masiyukan si sik sakbawan sis day dalan, ay igluwas wan. 5Ay at ngay malindug sanya ginto sas duwama te, “Taw ro ay fagluwasun?” 6Ay ka fag duwama gbalus kata Isus at longan, ay nu katanya, wa nasalag nu gbul. 7Ay ka fag duwama nataban wa fiya ka fag asnu sas Isus. Ay nasagmak at ngay falefe sas asnu tungud guyuy, ay Isus nasakay wa sanya. 8Ay ngayuk taw at nasagmak at falefe sa sangaba dalan. Ay at tiba nasagmak sik ngay sanga kayu at ke don at nalifung siginan at ngay gamasun.

9Ay ngay taw, dewa sis Isus fagunaan ay sit guyan, gfanguroan te, “Segi tam Diyus! Tam Diyus gtarabang tuwa sa takadasug fag fun.#11:9 Danyu 118:25-26. 10Tam Diyus tumarabang tuwa tam aguyangan, fun Dabid, at fagmagurangun at takadasug ban. Segi tam Diyus!”

11Ay Isus indasug wa sas Erusalem ay nasakbo sas Diyus bale. Ay nu nalingaman wan fagayu, kanya nalo wa sas fulan Betaniya gfaudgufudan at Nasugu fag Labi Duwa, anway inyabi wan.

Isus Nafayango sik Kayu at yud e Buwadan

(Mat. 21:18-19)

12Ay balabag di, Isus ay at ngay tagadal nalo wan siginans fulan Betaniya. Ay Isus kalunus wan. 13Ay Isus nu nabantay sik kayu marabung nu gdonan, nangakbang yama nanlinggat te, go e buwadan. Roro manlag di, we buwadan, at don wadi. Anway ya ndasug famuwadanun. 14Ay Isus nalong sa ka fag kayu te, “Wa ban e umon am buwadan faggugat.” Ay at ngay tagadal nadungug nu glong.

Isus Nalanu Diyus Bale

(Mat. 21:12-17; Lukas 19:45-48; Uan 2:13-22)

15Ay Isus ay at ngay tagadal indasug sas Erusalem. Ay Isus nasakbo sas Diyus bale ay naayan at tagfabili ay anggan at tagbili sas Diyus bale. Ay Isus nafalub at ngay tagfabangsi singku at ngay fagfatungkudan, ay anggan at ngay tagfabili linatad at ngay faglunggungan. 16Ay Isus nalong sanya fag ngay taw te, “Lag gdalan ste, am at ke ngay uba famabili.” 17Ay Isus nafoyung sa sangay taw te, “Sis Diyus at longan marirukan te, ‘E nafangayan wa ku bale sik Bale Daranginan, anway sanya fagayu talun at ngay taw nu nandarangin.’ Ay roro mangaro ku bale nafasik fagsuksuwan way am ngay takamul.”

18Ay at ngay taganyun daul ay at ngay tagfoyung Muisis at Suguwan nadungug Isus at longan. Ay igsarap te, tain ban nu gfafate Isus. Anway kanya kalimu Isus, teway at ngay taw nadulawan nu nadungug Isus at foyungan. 19Ay nu kayabi wan, Isus ay at ngay tagadal nalo wan siginans Erusalem.

At yud e Buwadan fag Kayu Nyango wan

(Mat. 21:20-22)

20Ay balabag di sdaga kamenit, Isus ay at ngay tagadal nalo wan. Ay manlag di egmenit at nalag fag kayu at yud e buwadan inyango wan anggan wa sa at lalid. 21Ay Pedru namatang egmenit ataw Isus at longan sas kayu, ay nalong sas Isus te, “Em Takamoyung. Linggati nin egmenit am fakalimataun fag kayu at yud buwadan, inyango wan.” 22Ay Isus nalong sat ngay tagadal te, “Afanudi ngani sas Diyus! 23Matuyan iglong aw ayu te, ‘Nus nga sinu at lumong ban ste fag muyud te, e falin emu ay e mukas emu sasad dagat,’ ay ka fag taglong nu gdi gadayuwan sat amatanganan, ay nu gafanud tuwa, umgurungan wa fiya kata at longan. 24Nu katanya, glong aw ayu te, nus nge wain ay fagetun gina am gdarangin, afanudi tuwa te, fabul wam. Ay gfafabul yangay ban am fiya. 25Ay gina am malindug igdarangin, falyami ay iba nus nge wain at mauri at fagbulun sa ayu, laman anggan ay Tama sas banwa gfalyam yangay ban ay ngay asalanan. [26Nu dway am gfalyam ay iba at asalanan sa ayu, anggan ay Tama sas banwa wa ban gfalyam ay ngay asalanan.”]

Sinu at Nasugu Isus?

(Mat. 21:23-27; Lukas 20:1-8)

27Ay Isus ay at ngay tagadal gdog yay indasug sas Erusalem. Ay kaduge Isus iglo sa sangaba Diyus bale, ngay taganyun daul ay ngay tagfoyung Muisis at Suguwan, ay anggan taw Udyu at ngay tagmagurang inkakbang sas Isus. 28Ay kanya nainto sas Isus te, “Daginan am fagmadaragangun nu gfagbulun o takatanya? Sinu at nasugu emu te, fagbuluni takatanya?” 29Ay Isus nabalus anya te, “E fagintoun akyangay sa ayu. Balusi ro angku. Ay nu nabalus tuwa ro am angku, gbalus akyangay ayu te, kanya at nasugu angku ku fagmafafagbulunun katanya. 30Ay katatuy ku fagintoun sa ayu. Go daginan Uan Tagfasurung at fagmadaragangun nu gsurungun taw? Go siginans banwa? Ay go siginans taw? Balusi angku!” 31Ay ka fag ngay taw igsulitanan yay gadayuwan sit dayu te, “Nu lumong tam te, siginans banwa, kanya malus ro antam te, ‘Ay taw madyay ay fagyudun gafanud sas Uan at longan?’ 32Ay nu lumong tam te, siginans taw, at ngay taw manlimata antam.” (Katanya ka fag ngay taw at longan, anway ngay taw gafanud te, Uan Tagfasurung sik taglong siginans Diyus.) 33Ay nu katanya, ka fag ngay taw nabalus sas Isus te, “Yaya, wami nasaful te, go daginan.” Ay Isus nalong yangay te, “Ay kin. Anggan aw, dakwa gfoyung ayu te, kanya at nasugu angku ku fagmafafagbulunun katanya.”

Currently Selected:

Markus 11: TAWEAST

Highlight

Copy