Markus 10

Isus At Longan sa baliwa at Naubun at Mangena

(Mat. 19:1-12; Lukas 16:18)

1Ay Isus nalo wan siginans fulan Kapernaum ay nalo wa sa sik ngay fulan sas talun Udiya, anggan nadife Safa Urdan. Ay ngay taw gdog yay nafangadasugan sa anya. Ay Isus nafoyung kata ebi ginan at fagbulun.

2Ay tibak taw Parisiyu nkakbang sas Isus ay gfaskud anya te, “Go sik mangama nu naubun at mangena, go katanya gfaning manga Muisis at longan?” 3Ay Isus nabalus te, “Tain ebi Muisis at suguwan sa ayu?” 4Ay ka fag ngay Parisiyu nabalus te, “Muisis nalong wa te, sik mangama nu gaubunun wa at mangena, riruki sik famatuyan te, gudgubunan wan, ay rodi masine wan gubun at mangena.” 5Ay Isus nabalus te, “Muisis at fagnarirukun sa ayu katanya, anway gfaning way am gugat ay fasadan. 6Ay siginan ngays fagsigadan, gina kawat tam fagdaul daga, ‘Diyus naawat sik ama ay sik ina.’ 7‘Ay anway katanya, sik mangama mubun ban at tama ay at tina, ay nanfaudgufudan sat mangena. 8Ay kanya fag duwa nsadi wan.’ Bunwa duwa; sadi wan. 9Nu katanya, Diyus at nafasadi, we taw mafafasaruwayan.”

10Ay nu ndasug wa sat bale, Isus at ngay tagadal nainto yay aro ataw at foyungan at masuwad. 11Ay Isus nalong te, “Nus nga sinu at naubun at mangena ay nangadaduwa yay sa tibak ina, kanya kamayun way, ay gasalanan way sat mangena dan anway sat nafagbulun. 12Ay anggan sik mangena nu naubun way at mangama ay nu ndaduwa yay sa tiba ama, kanya kamayun yangay.”

E Nataban sik ngay Sisiyan sas Isus

(Mat. 19:13-15; Lukas 18:15-17)

13Ay rodi tibak taw nataban at ngay sisiyan sirut sas Isus, laman Isus gted ay gdarangin anya fagayu. Ay Isus at ngay tagadal nasalag ngay tagtaban ka fag ngay sisiyan. 14Ay Isus nu nalag at ngay tagadal at fagbulun, indotama ay nalong te, “Fabayani wan ka fag ngay sisiyan nu kakbang sa angku. Lag gsalag, anway takatanya fag ngay sisiyan katap sas Diyus at fagmagurangan taw. 15Matuyan iglong aw ayu te, nus nga sinu fag taw at yud kaumsig Diyus at fagmagurangan taw kata sik sisiyan sirut nu kaumsig, ka fag taw wa ban umful sanya.” 16Ay gina Isus nasalilian ka fag ngay sisiyan, nafatungkud at daluwap sat alfuyu ay nadarangin.

Sik Mabalan fag Baguwama Nangakbang sas Isus

(Mat. 19:16-30; Lukas 18:18-30)

17Ay gina Isus galoun sanya ginan, sik baguwama matarung nu kakbang sa anya, ay natudan. Ay ginto sas Isus te, “Matuyan fag Takamoyung, tain manga ban ku fagbulun, laman e leleg aktuwa ban at yud katabu?” 18Ay Isus nabalus te, “Taw ro am fagnalongun angku te, ‘Matuyan? We matuyan, dasday Diyus fag sadi! 19Gsaful wo at ngay suguwan te, lag gfate, ay lag kamayun, ay lag kamul, ay lag kamuwagan nu gfoyung o sa am iba tibak taw at fagbulun, ay lag gfanluk laman gfabul o am iba at fagagbilugun, ay esugi tuwa am mama ay am mina.’ ” 20Ay ka fag baguwama nalong sas Isus te, “Takamoyung, gfaning kwan fagayu kanya siginan ngay aw sisiyan.” 21Ay Isus nu glinggat ka fag baguwama, kesug tuwa anya. Ay nalong te, “Sadi ya am yud nafaning. Loi wan ay fabilii am ngay nanuranan, ay faafudani am nafabul sa sangay taw at yud e kwa. Ay e fagmabalanun ban o sas banwa. Ay nu intabu wan, stei wan ay aloi wa angku.” 22Ka fag baguwama nu nadungug Isus at longan, kabalu, ay nalo wan mabaluwanan, anway mabalan dawdaw.

23Ay Isus nalingaman sat ngaba dayu ay nalong sat ngay tagadal te, “Mataka dawdaw sik mabalan fag taw nu kaful sas Diyus at fagmagurangan taw.” 24Ay at ngay tagadal nadulawan nu nadungug Isus at longan. Ay Isus gdog yay nalong te, “Ku ngay sisiyan, mataka dawdaw nu kaful sas Diyus at fagmagurangan taw. 25Nu mataka sik kamelyu nu gsulun sa sik fansulbung at sulung, amataka yap sik mabalan fag taw nu kaful sas Diyus at fagmagurangan taw.” 26Ay at ngay tagadal nadulawan dawdaw, ay gidgintoan te, “Nu katvngvd wa anya, sinu ban at kumlangfe?” 27Ay Isus nalinggat sat ngay tagadal ay nalong te, “Nu taw way, wa mafafabul. Ay roro di katanya sas Diyus, teway Diyus mafafabul fagayu.”

28Ay Pedru nalong sas Isus te, “Ami, naubun wami fagayu ay naalo wami emu.” 29Ay Isus nalong te, “Matuyan iglong aw ayu te, nus nga sinu fag taw at naubun at bale, ay at ngay fadugsay, ay at tina ay tama, ay at ngay sisiyan, ay anggan at ngay gamasun laman gfaning angku ay sat Masine fag Barita, 30katsi wa fag ngay menit gfafaful tuwa ayu yap ebi ataw at naubun: ngay bale, ay ngay fadugsay, ay tina, ay ngay sisiyan, ay anggan ngay gamasun, dewa dumalan ngay faurianan. Ay bandi kanya mul yangay ban leleg at yud katabu. 31Ngayuk taw at tiba tungud katsi, ay roro kanya wa ban at tiba daga. Ay ngayuk taw at tiba daga katsi, ay roro kanya tuwa ban at tiba tungud.”

Isus At Fatulu Ginan nu Gfoyung nu Mkate ban

(Mat. 20:17-19; Lukas 18:31-34)

32Ay Isus ay at ngay tagadal gina glo sa sangaba dalan tagsas Erusalem, Isus taguna tibama. Ay at ngay tagadal gafanawa. Ay at ngay taw tagalo kalimu. Ay Isus gdog yay nafaful sa anya at Nasugu fag Labi Duwa, ay nafoyung at kumgurungan ban sa anya. 33Ay glong te, “Dungugani, katsi sa watams Erusalem. Ay sanya e moyung ban angku, Taw at Baguwama, sa sangay taganyun daul ay sa sangay tagfoyung Muisis at Suguwan. Ay ka fag ngay taw wa ban at lumong te, ‘Fatei kanya fag taw!’ Ay gfanusetaw wa angku sat yud Udyu fag ngay taw. 34Ay ka fag ngay taw yud Udyu malingun ban angku, ay tumufe angku, ay malang angku, ay fate angku. Ay dewa katanya, nu nlangfe wa ban tuluk menit, gdog kyay gleleg.”

Santiagu ay Uan e Fagetun sas Isus

(Mat. 20:20-28)

35Ay Sebidiyu at baguwama Santiagu ay Uan inkakbang sas Isus ay glong te, “Em Takamoyung, satu e fagetun ami sa emu.” 36Ay Isus ginto sas dugsay te, “Nataw ay fagetun sa angku?” 37Ay dugsay nabalus Isus te, “Satu nu gmagurang wa ban o, falunggungi emi sam siyun baliwa at sadi ay sam wala baliwa at sadi.” 38Ay Isus nalong sas dugsay te, “Wam nasaful ay fagetun at masuwad. Go sangay mafabaris ban am ku fagnanbarisun? Ay go sangay maasungatan ban am ku fagdalanun fag mataka?” 39Ay dugsay nabalus Isus te, “Kin.” Ay Isus nalong yangay te, “Kin, nu tengap maabaris way am. 40Ay roro bunwa ban aw tagfili te, sinu ban at kumlunggung si ku siyun ay si ku wala baliwa fag tigyangan. Ku Mama tuwa tagsaful te, sinu ban at kumlunggung sanya.”

41Ay at safuluk tagadal nu nadungug katanya, indotama Santiagu ay Uan. 42Ay Isus nafaful yay at ngay tagadal, ay nalong te, “Saful wam at yud Udyu fag ngay fun ay anggan tiba daga fag fun matvngvd dawdaw nu gsugu. 43Ay roro dangay am katanya. Nus nga sinu am takaumsig nanmagurang, afanuguwanani ay iba. 44Ay nus nga sinu am takaumsig at tiba tungud ban, kanya katai sik fanuguwan sas fagayu. 45Anway aw, Taw at Baguwama, ku fagindasugun bundi te, ku iba nantarabang angku. Ku fagindasugun antuwa te, laman nantarabang aw at ngay taw. Ay nanfon aw ku leleg, laman nanfalangfe ngayuk taw.”

Isus Nafafiya sik Ama at yud Glag

(Mat. 20:29-34; Lukas 18:35-43)

46Ay Isus ay at ngay tagadal indasug wa sas fulan Eriku. Ay kaduge Isus ay at ngay tagadal ay anggan sik ngay taw ayuwayu glo sanya ginan, e sik taw at yud glag malunggung sis day dalan ay gfanget. At ngayan Bartimeus ay at tama Timeus. 47Ay Bartimeus nu nadungug te, Isus sik taw Nasaret gdalan, kanya nauro te, “Isus, fun Dabid at kadagdagan, afanyui angku!” 48Ay ngayuk taw sanya gsalag anya te, lag garingang. Ay fangkabat di ro inragangan, glabi yay aro ataw nu guro te, “Fun Dabid at kadagdagan, afanyui angku!” 49Ay Isus intuwas yay nu glo, ay nalong sa tiba te, “Tabani ste.” Ay tiba nalong sas Bartimeus te, “Alindugi ay useganani, Isus glong emu te, sanyai.” 50Ay kanya naukas wan at fagumutanun fag falefe, ay gasubuwan wa dawdaw nangakbang sas Isus. 51Ay Isus ginto sas Bartimeus te, “Tain am fakaumsigun ku fagbulun ro sa emu?” Ay Bartimeus nabalus te, “Takamoyung, kaumsig aw glag.” 52Ay Isus nalong te, “Loi wan, am fagafanudun wan at nafafiya emu.” Ay rodi daw glag wan, ay kanya gfaygaluwan yay Isus si sangaba dalan.

Currently Selected:

Markus 10: TAWEAST

Highlight

Copy