Markus 9

1Ay Isus nalong sanya fag ngay taw te, “Matuyan iglong aw ayu te, am tiba at malindug ste, yam kate yap ngay lumag Diyus nu gmagurang taw nu kadasug e fagmadaragangun.”

Isus At Bilug Inbali yay Sirut

(Mat. 17:1-13; Lukas 9:28-36)

2Ay nu nlangfe wan unumk menit, Isus nataban Pedru, ay Santiagu, ay Uan sa sik tungud muyud ngabat, ay kanya way fag ufat tagsanya. Ay Isus at bilug wa kata aro ataw, 3ay at balukas masulo dawdaw katvngvdan nu malagsi. Ay ste swa daga we taw mafafalagsi takatvngvd anya. 4Ay rodi tv, Elyas ay Muisis insure ay gfasulitanan Isus. 5Ay Pedru nalong sas Isus te, “Em Takamoyung, fadi fadi ste tuwami! Nangawat yay ami tuluk fagfanlanbungan. At sadi sa emu. Ay at sadi sas Muisis. Ay at sadi sas Elyas.” 6Pedru at fagnalongun katanya teway wa nasaful at fagalongunun, anway kanya fag tulu inlimu dawdaw. 7Ay rodi sik linyabu nalanbung sanya fag ngay taw. Ay e naelongan siginan sad linyabu te, “Kanya ku fakesugun ku baguwama. Dungugani tuwa anya!” 8Ay rodi tv, ka fag tuluk tagadal nalingaman sat ngaba dayu, ay at nalag Isus way sesadi, we nalag at duwama.

At Foyungan sa baliwas Elyas

(Mat. 17:9-13)

9Ay kaduge Isus ay at tuluk tagadal kadaga siginans muyud, Isus nalong te, “Lag gfoyung sa tibak taw aro ay nalag yap ngay ban aw, Taw at Baguwama, gdog yay gleleg.” 10Ay at tuluk tagadal gfaning wa fiya Isus at longan, ay gfangintoan way sat sadi te, “Nataw manga at masuwad at nalong te, gdog yay ban gleleg?” 11Ay kanya nainto sas Isus te, “Nataw at masuwad at ngay tagfoyung Muisis at Suguwan at fagnalongun te, Elyas gumuna yay ban umdasug bagu ban Diyus at nafili fag Fun umdasug?” 12Ay Isus nabalus te, “Matuyan ebi at longan te, umdasug yay ban Elyas, laman taguna nanfamasadan yay fagayu. Ay nu katanya, taw ro at Rirukan at fagnalongun te, ngayuk mataka ban Taw at Baguwama fagdalanun, ay anggan ngay taw gfalingun ban anya?” 13Ay iglong aw ayu te, “Elyas indasug wan. Ay ka fag ngay taw nafagbulun wa sa anya nus nga setaw at fagafagbulunun, kata at marirukan ebi sa anya baliwa.”

Isus Nafafiya sik Baguwama at ke Mafurat fag Falad

(Mat. 17:14-21; Lukas 9:37-43)

14Ay Isus ay at tuluk tagadal nu ndasug wa sa tibak tagadal, nalag sik ngay taw ayuwayu nu kaful sanya. Ay tibak tagfoyung Muisis at Suguwan sanya yangay ay gfaringangan Isus at ngay tagadal. 15Ay ka fag ngay taw nu nalag Isus, inlipsik daw, ay mafali nu nkakbang sas Isus ay nafasulitanan anya. 16Ay Isus ginto at ngay tagadal te, “Nataw ay fagaringanganun?” 17Ay e sik taw sanya nabalus Isus te, “Em Takamoyung, nataban aw ku baguwama ste sa emu, anway e mafurat fag falad ay wa mafaelongan. 18Ay kayu ginan ka fag mafurat fag falad sa ku baguwama, gfafulid anya sas daga, ay at bibig glafas, ay gfaringgit at bagang ay taba wa katigas at bilug. Ay aro naet akyama sa am ngay tagadal laman gayan ka fag falad, ay wa mafafaayan.” 19Ay Isus nalong te, “Am katsi fag ngay sugfun taw, at yud way am gafanud! Seduge ya ban nu gufud aw ayu? Ay seduge ya ban nu gsungatan aw gfaygaluwan ayu? Tabani ste sa angku ka fag baguwama!” 20Ay at tiba nataban wa fiya. Ay ka fag mafurat fag falad nu nalag Isus, nafafadfarangan ka fag baguwama, ay nafafulid, ay nafainfulidan sa sangaba daga glafas at bibig. 21Ay Isus nainto sa ka fag baguwama tama te, “Seduge wan nu katanya?” Ay at tama gbalus te, “Siginan wa alay. 22Ay ngayu ginan wan ka fag mafurat fag falad nu gfafulid ku baguwama sas afuy ay sasad safa, laman igfate anya. Ay nu mafafagbulun tuwo, afanyui yap emi ay tarabangi emi!” 23Ay Isus nalong te, “Taw ro am fagnalongun te, ‘Nu mafafagbulun tuwo’? Sik taw nu gafanud tuwa sa angku, nus nge wain umsure wa fiya sa anya.” 24Ay mafali at tama nu gbalus sas Isus te, “Gafanud aktuwa, ay tarabangi yap angku faugati ku fagafanudun!”

25Ay Isus nu nalag te, kaayu wa dawdaw at taw takaful, nabaya ka fag mafurat fag falad te, “O fag mafurat fag falad tagyud gfafaelongan ay tagfabungul, gsugu aw emu te, alfasi wan sanya ginan fag baguwama ay lag kafoli sa anya faggugat!” 26Ay rodi ka fag mafurat fag falad nauro, ay matvngvd nu gfafadfarangan ka fag baguwama, ay nalfas wan. Ay ka fag baguwama kata wa nu matean, ay ngayuk taw at nalong te, “Inkate wan!” 27Ay roro Isus nated ka fag baguwama at daluwap ay nafalindug anya, ay inlindug wan.

28Ay Isus nu nasakbo wa sat fagtiyugan fag bale, at ngay tagadal ginto sas Isus sat dayu te, “Taw way manga em fagyudun mafafaayan ka fag mafurat fag falad?” 29Ay Isus nabalus te, “Darangin wadi at mafafaayan takatanya fag mafurat fag falad.”

Isus Gdog yay Nafoyung nu Mkate ban

(Mat. 17:22-23; Lukas 9:43-45)

30Isus ay at ngay tagadal nalo wan ay nadalan wa talun Galiliya. Ay Isus wa kaumsig nu e sumaful te, sanya wa sis Galiliya, 31anway gfoyung at ngay tagadal te, “Aw, Taw at Baguwama, e tumaban ban angku sa sik ngay taw anggan fate ban angku. Ay nu mkate akwan, sis fatuluk menit gdog kyay ban gleleg.” 32Ay at ngay tagadal wa nasaful at longan at masuwad. Ay kalimu way ngap nanginto sas Isus.

Sinu ban Tam at Tiba Tungud?

(Mat. 18:1-5; Lukas 9:46-48)

33Isus ay at ngay tagadal indasug wa sas fulan Kapernaum. Ay gina sad bale, Isus nainto sat ngay tagadal te, “Taw aro ay fagbadbaboanun si sangaba dalan?” 34Ay at ngay tagadal wa gbalus, maragangan way, teway at sulitanan anway te, “Sinu ban tam tiba tungud?” 35Ay Isus inlunggung ay nafaful sa anya at Nasugu fag Labi Duwa. Ay nalong te, “Sik taw nu kaumsig tiba tungud, katai way tiba daga fag taw, ay fagayu taw at fanuguwan.” 36Ay Isus nabul sik sisiyan, ay nafasat buknga. Ay nafalunggung sit tungud balangbang ay nalong sat ngay tagadal te, 37“Nus nga sinu fag taw nu gfasakbo tuwa sik sisiyan sat bale anway kanya gseg angku, kata wa nu gfasakbo angku sat bale. Ay bundi aw fag sadi, kata wa nu gfasakbo at nasugu angku.”

Sik Taw nu Gdi Gsalag Antam, Igtarabang tuwa Antam

(Mat. 10:42; Lukas 9:49-50)

38Ay Uan nalong sas Isus te, “Em Takamoyung, nalag ami sik mangama nu gayan at mafurat fag falad sa am fagmadaragangun. Ay nasalag ami anya, teway kanya wa gufud antam.” 39Ay Isus nalong te, “Lag gsalag anya, anway sik taw nu gfagbulun at madulawan sa ku ngayan, di ban glong mauri sa angku baliwa. 40Nus nga sinu fag taw nu gdi gsalag antam, kanya gtarabang tuwa antam. 41Matuyan iglong aw ayu te, nus nga sinu fag taw at nafon ayu sik taya mamam, anway am wan Diyus at nafili fag Fun at taw, matuyan kanya mul wa ban fiya sik famanyun.”

Saruyi Tagfe Asalanan

(Mat. 18:6-9; Lukas 17:1-2)

42“Ay nus nga sinu tagfe asalanan sa sangay sisiyan tagafanud sa angku, amasine yap nu e sumiyuk at liyug sa sik batu daul fanligis fare ay ukasi sasad dagat. 43-44Ay am take at sadi nu gfe asalanan way emu, lifungi wan! Amasine yap dewa sadi am take nu e leleg tuwo at yud katabu, dewa ngap ro duwa am take roro am fakadasugan sa ways lino afuy at yud kalayung. 45-46Ay am darafa at sadi nu gfe asalanan way emu, lifungi wan! Amasine yap dewa sadi am darafa nu e leleg tuwo at yud katabu, dewa ngap ro duwa am darafa roro am fakadasugan sa ways lino afuy at yud kalayung. 47Ay am mata at sadi nu gfe asalanan way emu, guladi wan! Dewa sadi am mata nu kaful tuwa ban sas Diyus at fagmagurangan taw, glabi yay kamasine nu duwa am mata, am fakadasugan nu sa ways lino afuy. 48Sanya at ngay ulud wa kate ay at afuy wa kalayung.

49“E fanfaskud ban sas fagayu taw katvngvd sik afuy ay asing, nus nga te, umfasine ay umfauri. 50Masine sik asing. Ay roro sik asing nu dway e tamis, tain ya ro nu gdog yangay tam gfatamis? Fasinei ay ugali kata sik asing nu gfayayum sik fakonun. Tadtarabangani laman mabayan tuwa nu gbanwan am.”

Currently Selected:

Markus 9: TAWEAST

Highlight

Copy