1 Wakorintho 10
10
Maonyo ighulu ya milungu
1Wana wakwetu, nanashaile mukumbuke kamba wana ake weluwanyo na Musa, wose weluo isi ya ulindiri ghwa iwengu, na wose wakawambuka banana Bahari ya Shamu. 2Nawo kele iwengu na kele bahari wakabatizo wose sa wairimi wa Musa. 3Wose wakalya chakulya chilya chenyi cha kiroho. 4Na wakanwa kindu chilya chenyi chenwa cha kiroho. Wakanwa kufuma iwe lya roho lyilya lyeghendanye nawo, nalyo lyilya iwe lyeluo ni Kristo mwenyi. 5Ela hata nyuma ya agha ghose, Mlungu saboelelo ni wengi wa wana ake, na kwa hung'u mili yawe ifwile ikasaghiso kireti.
6Ndamu, malagho agha ghose ni fwana kwetu, ghationya sitashaye malagho ghawase selyi weshaile, 7hata sitatase milungu, selyi wamoju wawe wadeile. Mawandiko gha Kuela ghaghora, “wandu wakakala kitembo kulya na kunwa na wakauka kuvina.” 8Ni suti sitangile kele kuzinga selyi wamoju wawe weluo na kwa ijua imojori wakagwa na wakafwa wandu elfu mirongo mili na ndatu. 9Ni suti sitamtime Bwana selyi wamoju wawe wamutimile nawo wakaulagho ni nyoka. 10Ni suti sitanung'unike selyi wamoju wawe wanung'unike na wakahaitiso ni ulya Mhaitisi.
11Malagho agha ghose ghanadeike kwawe kukala fwana kwa wazima, nagho ghanawandiko sa maonyo kwetu. Kwani tendekala kele ngelo ya kavui na kudua. 12Kwa hung'u uyu ekuririkanyagha mwenyi wanamangile akulinde kamba sagwe. 13Matimo ghose ghamupatagha ni ghalye ghawapatagha wadamu. Ela Mlungu ni mdumusiliki, naye sejemusigha mtimo kuchumba ndighi zenyu zemanga; ela ngelo matimo ghekujagha ujemuhawa ndighi zerumaghia na kumhawa ngila yefuma.
14Kwa hung'u washayo, kuikeni kulele na kutasa milungu. 15Nendeghora nenyo sa wandu muo wa akili, taghanyeni inyo wenyi agha naghora. 16Kikombe titumiagha kele kilalilo cha Bwana na timukasagha nacho Mlungu; ngelo yenwa, takala na ungaro kele Bighati ya Kristo. Na mkate tivunjagha, ngelo tighulyighagha, tendekala na ungaro na muli ghwa Kristo. 17Kuo na mkate ghumojori kwetu itose, hata ngera tio wengi, nisi muli ghumojori, kwani itose takaranya mkate ghulya ghwenyi. 18Zighaneni wandu wa Israeli, walye walyighagha kizangauna chifunyogho kele mazabahu wadea ungaro na utumishi ghwa Mlungu. 19Ndamu fulo ni kughora kamba milungu ango chakulya chifunyilo sadaka kwa milungu ni kindu chingi? 20Hata! Ilagho nighoragha ni kamba chilya chifunyilo kizangauna kele mazabahu gha wandu siwemweni Mlungu chanafunyilo kwa mashetani, na si kwa Mlungu. Na imi sishaile mkale na ngaro na mashetani. 21Simudimagha kunwa kufuma kikombe cha Bwana na sena munwe kele kikombe cha mashetani. Simudimagha kulya kele meza ya Bwana na sena mulye kele meza ya mashetani. 22Ango tendeshaya kumdea Bwana kukala na iziso? Tighelelagha kamba tana ndighi kumchumba iye?
23Wandu wamoju wanaghoragha, “Tanadumusilo kudea kindu icho chose” Agho ni fulo, ela si malagho ghose gheo ghaloli. Tadumusilo kudea kindu, ela si kila kindu chio cha kuwarura. 24Mundungi salole faida yake mwenyi, ela alole faida ya wambawe.
25Mwadima kulya nyama iyo yose itaghogho sokoni sikweo na kukotela na keri keri zingi. 26Kwani Mawandiko gha Kuela ghaghora, “Urumengu na vindu vose vio amweni kwake ni mali ya Bwana.”
27Ilyi mundu sedumuse amukaribisha kulya naye na mwadumusila kughenda, lyeni icho chose chijeiko hambiri yenyu sikweo na kukotela kwa undu ghwa wasi wasi ngoloni kwenyu. 28Ela ilyi mundungi amuuza, “Chakulya ichi chanafunyilo sadaka kwa milungu,” aho simwalye icho chakulya, kwa undu ghwa ulya mundu amughorera na kwa undu ghwa wasi wasi ghwa ngolo zenyu. 29Naghora, si kwa undu ghwa ngolo yako, ela kwa undu ghwa ngolo ya ulya akughorera.
Mundu wadima kukotela, “Ndamu kudani uhuru ghwangu ghodea malagho ghuimo kukala ni wasi wasi ghwa ngolo ya mundu mzima? 30Ikakala namukasa Mlungu kwa undu ghwa chakulya changu, kudani mundu anifunye makosa kwa undu ghwa chakulya namufunyila Mlungu asanta?”
31Kwa hung'u kila ilagho mudeagha, ngera ni kulya ango kunwa, deeni ghose kwa undu ghwa ubwaa ghwa Mlungu. 32Simwawakosese Wayahudi ango wandu wa mbari nzima ango ikanisa lya Mlungu. 33Deeni selyi nideagha; kwa kutima kuwaboela wandu wose kwa malagho ghose nideagha, sikweo na kughelela ghaloli, sala ghaloli kwa wose, eri wapate kukila.
Currently Selected:
1 Wakorintho 10: SAGALLANT
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Kenya, 1993