1 Wakorintho 11
11
1Irimeni mfwano ghwangu, selyi niirimagha mfwano ghwa Kristo.
Kubula chongo ngelo yetasa
2Namukasa kwa undu ghwa kunikumbuka ngelo zose na kwa kuirima mafundiso ghalye nimufundise. 3Ela nanashaile mumanye kamba Kristo niye chongo cha kila mlume. Na mlume naye ni chongo cha muke, Mlungu naye ni chongo cha Kristo. 4Kwa hung'u mlume kalomba ango kaeresa ilagho lya Mlungu abulile chongo wamufwisha waya Kristo. 5Na muke kalomba ango kaeresa ilagho lya Mlungu sebulile chongo chake; wamufwisha waya mlume wake. Kwani sikuwesi machumbano kwake na muke ahariro chongo. 6Kwani ngera muke sebulagha chongo chake, wadima hata kukushula sisiri. Na kwa kukala ni ilagho lya aibu kwa muke kuhara chongo chake ango kukushula sisiri ni kirani abule chongo chake. 7Mlume siifweni abule chongo chake, kwa kukala waonyeza fwana na ubwaa ghwa Mlungu. Ela muke waonyeza ubwaa ghwa mlume. 8Kwani mlume saumbilo kufuma kwa muke, ela muke wanaumbilo kufuma kwa mlume. 9Hata mlume saumbilo kwa undu ghwa muke, ela muke wanaumbilo kwa undu ghwa mlume. 10Ndamu kwa undu ghwa wana malaika, muke yanafweni abule chongo chake kuonyeza kamba uwo isi ya mlume wake. 11Ela sani hambiri ya Bwana muke sefwanagha sikweo mlume na mlume sefwanagha sikweo muke. 12Kwani selyi kwenyi muke adeilo kufuma kwa mlume, niko kwenyi na mlume avalogho ni muke, naye Mlungu niye aletagha vindu vose.
13Zighaneni inyo wenyi ngera ni karakara muke kulomba Mlungu wanduni chongo chake sichebulilo. 14Hata kuumbo kwenyi kwationyeza kamba kwa mlume kukala na sisiri ndele ni waya, 15ela muke kukala na sisiri ndele ni kindu chekukasa; kwani wanahawilo sisiri eri zimubule. 16Ela ngera mundungi ashaya kudea nganyi ighulu ya ilagho ilyi, nendeghora kamba isi hata makanisa gha Mlungu sitiwesi mirighido ingi. 17Ela kele mafundiso agha simukumagha kungi, kwa kukala ngelo mwakoghana kutasa, mwadea ghawase kuchumba ghaloli. 18Hambiri, naghorero kamba mwasarikana mafungu mafungu kele makoghano ghenyu, na nadumusa ghamoju ni fulo. 19Kwani ni suti kukale na masarikano ghati yenyu eri walye wa fulo ghati yenyu waonekane mwazi. 20Ngelo mwakoghana ngila mojori, si kilalilo cha Bwana chingi mulyighagha. 21Kwani mukelya, kila mumoju walya chakulya chake mwenyi, kwa hung'u wamoju weo njala na wazima wanaruwa. 22Kwani simuwesi nyumba zelya na kunwa? Ango mondelyimenya ikanisa lya Mlungu na kuwafwisha waya wandu siwewesi vindu vingi? Ndamu nighore ije kwenyu? Nimukase kwa agha? Hata, Simukasagha!
Kilalilo cha Bwana
(Matayo 26:26-29; Marko 14:22-25; Luka 22:14-20)
23Kwani imi nanapatile kufuma kwa Bwana ghalye mafundiso nimuhawile: kamba Bwana Jesu, kele kiro chilya afunyilo, owatile mkate, 24naye aghenda amfunyila Mlungu asanta kaghuvunja, keghamba, “Ughu ni muli ghwangu, ghuwo kwa undu ghwenyu; deeni hung'u kwa kunikumbuka imi.” 25Hung'u kwenyi kawata kikombe nyuma ya kilalilo, keghamba, “Kikombe ichi ni ilagano iwishi lyangizo muhuri kwa bighati yangu. Deeni hung'u kila andu mwanwa, kwa kuniririkanya imi.”
26Kwani kila ngelo mulyighagha mkate ughu na kunwa kikombe ichi mondeeresa kifwa cha Bwana hata eje. 27Kwa hung'u uyo mundu wose elyighagha mkate ghwa Bwana ango kunwa kikombe cha Bwana sefweni ujekala na makosa ighulu ya muli na bighati ya Bwana. 28Kwa hung'u mundu akuzighane iye mwenyi jako, nao alye mkate na kunwa kufuma kele kikombe. 29Kwani ilyi mundungi alya mkate na kunwa kufuma kele kikombe setambulagha chausa cha muli ghwa Bwana, ngelo yelya mkate na kunwa kufuma kele kikombe, wakutaghanya mwenyi kwa kulya na kunwa. 30Ni kwa undu ughu wengi wenyu ni wanyonge na wakongo na wamoju wafwa. 31Ilyi takuzighana isi wenyi kihambiri, sititaghanyogho ni Mlungu. 32Ela ngelo titaghanyogho ni Bwana, tendefundiso eri kamba sitejetaghanyo ngila mojori na urumengu.
33Kwa hung'u wana wakwetu, ngelo mukoghanagha kulya kilalilo cha Bwana, mudafwaneghe. 34Na ngera mundungi ashaho ni njala alye kaya kwake, eri simojeja kutaghanyo ni Mlungu ngelo yekoghana. Ela ighulu ya ghalye malagho mazima nijeghora ngelo neja.
Currently Selected:
1 Wakorintho 11: SAGALLANT
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Kenya, 1993