1 Wakorintho 12
12
Manosi kufuma kwa Roho wa Kuela
1Ndamu wana wakwetu, kwa malagho gha manosi gha Roho, sishaile mulemo ni kumanya. 2Mwamanya kamba ilyi moluo simomweni Mlungu, molaghazo kwa ngila nyingi kele makosa ghetasa sanamu sizeghoragha. 3Kwa hung'u nanashaile mumanye kamba sikuwesi mundungi alongozogho ni Roho wa Mlungu eghoragha, “Jesu awanyizo” na sikuwesi mundungi edimagha kughora, “Jesu ni Bwana”, ikakala selongozogho ni Roho wa Kuela.
4Kuwo na machumbano gha mbari za manosi gha roho, ela ghanafumagha kwa Roho ulya mwenyi. 5Kuwo na machumbano gha utumishi, ela etumikilogho ni Bwana mumojori. 6Kuwo na udimo ghuchumbane ghotumika, ela Mlungu ni ulya mwenyi afunyagha udimo kwa wose kwa utumishi ghwawe. 7Kila mundu wanahawogho ufunuo ghwa Roho kwa undu ghwa faida ya wose. 8Roho yanahawagha mundu mumoju kughora na suku na kwa mundu mzima Roho ulya mwenyi wamuhawa kughora kwa kumanya. 9Roho ulya mwenyi wamuhawa mundu mumoju idumusi na mzima wamuhawa ndighi zeboesa. 10Roho wanahawagha mundu mumoju ndighi zedea wana mwakilimbita, na mzima kughora ilagho lya Mlungu; na kwa mzima kumanya manosi ghefumagha kwa Roho na sighefumagha kwa Roho. Mundu mumoju wamuhawa udimo ghoghora kwa viteto vizima na mumoju wahawo udimo ghofasiri viteto. 11Ela ni Roho ulya mwenyi mumojori uyu edeagha agha ghose selyi eshayagha, wamuhawa kila mundu inosi izima.
Muli ghumojori ghuo na viungo vingi
12Kwani selyi kwenyi muli ghumojori ghuo na viungo vingi, na viungo vose va muli hata ngera sani ni vingi ni muli ghumojori, ni hung'u kwenyi na Kristo. 13Niko kwenyi nesi itose, tikalagha te Wayahudi ango Wagiriki, tikalagha te wasunyi ango te wakidina. Itose tanabatizo kukala muli ghumojori ni ulya Roho mwenyi, na tikahawo isi itose kumunwa Roho mumojori.
14Kwani muli sighukalagha na kiungo kimojori sala vingi. 15Ilyi kighulu chaghora, “kwa kukala imi simi mkonu ghungi, Imi simi wa muli kungi,” ilyi silyidimagha kuchidea sichakale cha muli. 16Na Ilyi kisikilo chaghora, “kwa kukala imi simi iziso lyingi, Imi simi wa muli kungi,” ilyi silyidimagha kuchidea sichakale kiungo cha muli. 17Ngera muli ghose gholuo iziso, ghosikilagha ije? Na ngera muli ghose gholuo kisikilo, ghonusagha ije? 18Ela selyi iwo, Mlungu wanaikile kila kiungo cha muli selyi eshaile chikale. 19Ngera muli ghose gholuo kiungo kimojori, kokalagha na muli ghungi? 20Niko ikakala kuo na viungo vingi, ela muli ni ghumojori.
21Kwa hung'u iziso silyidimagha kughuuza mkonu, “Sio na haja newe!” Hata chongo sichidimagha kuuza kighulu, “Sio na haja newe!” 22Kibalo chake, viungo vilya va muli vio vinyonge nivo sitedimagha kukala siteo navo, 23na vilya viungo va muli tighelelagha sivifweni ishima nivo tivilindagha kwa ishima, navo viungo va muli vilya vionekanagha kamba si valoli vingi nivo tivilindagha na ndighi, 24ngelo vilya viungo valoli siveo na haja sa iyo. Mlungu mwenyi niye aikile muli ngila mojori, kahawa ishima vilya viungo siveo na ishima. 25Kwa hung'u sikukalagha na kusarana kele muli, ela viungo vake vose vatunzana. 26Ilyi kiungo kimojori cha muli chasirima, viungo vose vasirimanya nacho; ilyi kiungo kimojori chaliko, viungo vose vaboelo.
27Ndamu inyo inyose ninyo muli ghwa Kristo, na kila mumoju ni kiungo chake. 28Kele ikanisa, Mlungu waika wose kele ulalo ghwake; kele ulalo ghwa hambiri watumo, kele ulalo ghwa kaili wana tondolo, na kele ulalo ghwa katatu walimu, nao walye wadeagha mwakilimbita, wekeirimiro ni walye weo na ndighi zeboesa makongo ango kuwarura wazima ango kuwalongoza ango kughora kwa viteto. 29Wose si watumo, ango wana tondolo ango walimu. Si wandu wose weo na ndighi zedea wana mwakilimbita, 30ango kuboesa makongo ango kughora na viteto vizima ango wedimagha kutafusiri malagho gheghoro. 31Kwa hung'u kaleni na ngolo yepata manosi gha ighulu. Nemi ndamu nijemwonyeza ngila lyaloli kuchumba.
Currently Selected:
1 Wakorintho 12: SAGALLANT
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Kenya, 1993