1 Wakorintho 13
13
Mashayo
1Nadima kughora kwa viteto va wandu hata va wana malaika, ela ngera sewesi mashayo, nendekala sa ibamba lyililagha ango kizumanzi. 2Nadima kukala na ndighi za utondolo: nadima kukala na kumanya kose na kutambukilo ni viviso vose; nadima kukala na idumusi lyose hata lyidimagha kuhamisa mighondi ela ngera nisewesi mashayo simi kindu chingi. 3Nadima kuhawana vindu vose niwo navo, hata kufunya muli ghwangu ghuisho na moto, ela ngera sewesi mashayo, siyinifwanagha kindu chingi.
4Mashayo ghanarumaghiagha na ghanakalagha na mbazi, Mashayo sighawesi iziso ango sighakuonagha ango kukukasa. 5Mashayo sighasowagha ishima ango kulola ghake ghenyi ango sighawasilogho kwa shoshowa, mashayo sighaikagha makosa. 6Mashayo sighaboelogho ni makosa, ela ghanaboelogho ni fulo. 7Mashayo ghanarumaghiagha malagho ghose, ghanadumusagha ghose, ghanakosereagha na kurumaghia malagho ghose. 8Mashayo sighawesi kudua. Ngera ni utondolo ghujeita, ngera ni manosi gheghora na viteto ghejeduwa, ngera ni kumanya kujeita. 9Kwani kumanya kwetu sikuketi, na utondolo sighuketi, 10ela ilyi kweja kulya kuketi, kulya sikoketi kujeita.
11Ngelo neluo mwanake, neluo nikeghora sa mwanake, na neluo nikeghelela sa mwanake, na nikatambukilo sa mwanake. Nighenda nikala mundu mlanzi, nikasigha unake. 12Kwani icho tionagha indakwenyi ni sa fwana siyeonekagha kirani kele kilole, ela iyo ngelo tijeona meso kwa meso. Indakwenyi namanya kwa luhande lwenyi, ela iyo ngelo nijemanya kamare selyi imi namanyo ni Mlungu kamare. 13Ndamu ghahangalika malagho matatu: idumusi, ikosereo na mashayo na kele agha matatu ibwaa lya ghose ni mashayo.
Currently Selected:
1 Wakorintho 13: SAGALLANT
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Kenya, 1993