1 Wakorintho 14
14
Manosi ghamoju gha Roho
1Fungeni ndighi kukala na mashayo. Sena mkale na ngolo yeshaya manosi gha roho, kuchumba vose inosi lyeeresa ilagho lya Mlungu. 2Kwani uyu eghoragha kwa viteto vizima, saghoranyagha na wandu sala Mlungu; kwani sikwesi mundungi etambukilogho ni ghalye eghoragha. Iye waghora hachi ivisike kwa ndighi za Roho. 3Ela ulya eeresagha ilagho lya Mlungu waghoranya na wandu na wawahawa uwaruro, wawakumba ngolo na kuwasarusa. 4Mundu eghoragha viteto va kigheni wakuwarura iye mwenyi, ela ulya eeresagha ilagho lya Mlungu wawarura ikanisa lyose.
5Nanashaile inyose mughore kwa viteto vizima, ela kuchumba nanashaile mkale na inosi lyeeresa ilagho lya Mlungu. Kwani uyu mundu eeresagha ilagho lya Mlungu ni wa faida kuchumba ulya mundu eghoragha kwa viteto vizima; sala akale wana mundu efasirighi ghalye eghoragha, eri ikanisa lyose lyiwarurike. 6Ndamu wana wakwetu, ilyi neja kwenyu na kughora kwa viteto vizima, nimwaruragha ije ikakala nisemuletelele ufunuo kufuma kwa Mlungu ango kumumanyisa ango kumughorera ilagho lya Mlungu ango kumufundisa? 7Hata vombo siveo moyo sa firimbi ango kinyanda, ikakala sivefunyagha nywaka zetambulika, mundu udimagha ije kumanya chilya chiimbogho? 8Na ngera mundu ekwitagha tarumbeta ya uta seikwitagha kirani, nani ekuikagha kirani kwa uta? 9Niko kwenyi nenyo, mundu utambukilogho ije ni agha mughoragha ilyi ghalye mughoragha ghaghoro kwa viteto vizima sivetambulikagha? Malagho ghenyu ghendeghenda na mbeo. 10Kuwo na viteto vingi urumenguni na sikwesi kiteto chingi sichewesi kutambula kwake. 11Ikakala imi setambukilogho ni kiteto chilya mundu eghoragha, ulya mundu eghoragha chilya kiteto ni mgheni kwangu, nemi nimi mgheni kwake. 12Kwa kukala mwana beha yepata manosi gha Roho, ni suti mutime selyi mudimagha kutumia vilya viwaruragha ikanisa.
13Kwa hung'u mundu eghoragha kwa kiteto kizima ni suti alombe apate inosi lyefasiri ghalye eghoragha. 14Kwani nikalomba kwa kiteto kizima, roho yangu fulo yalomba, ela akili si iwo aho. 15Ndamu nideagha ije? Nijelomba kwa roho yangu na nilombe kwa akili nakose; nijeimba kwa roho yangu na niimbe kwa akili nakose. 16Ngera wamukasa Mlungu kwa Roho keng'weri, udimagha ije mundu wa kawaida ewo kele ikoghano kughora “Ameni” kwa malombi ghako ghefunya asanta ikakala semanyagha agha ughoragha? 17Malombi ghako ghefunya asanta kwa Mlungu ghadima kukala ghafweni, ela sigheo ghewarura mundu mzima kungi.
18Namufunyila asanta Mlungu kwa kukala nanaghoragha viteto vizima kuisa kila mumoju wenyu. 19Ela kele kutasa ikaniseni nanaonagha ni baha nighore malagho masanu ghedimagha kutambukila wazima, eri kuwafundisa, kuchumba kughora malagho maelfu kele viteto vizima.
20Wana wakwetu, simwakale sa wanake kele maririkanyo ghenyu; kaleni sa wanake wakoo kele malaghelaghe, ela mkale muzeguwe kele kughelela, 21Kele Mawandiko gha Kuela kwanawandiko,
“Kwa ngila ya wandu weghoragha viteto vizima
Nighoragha na wandu wangu, aghamba Bwana.
Nijeghora kwa milomu ya wagheni,
ela hata sani wandu wangu siwejesikila.”
22Kwa hung'u inosi lyeghora viteto vizima ni kwa undu ghwa awa siwedumuse na si kwa walye wadumuse; ela inosi lyeeresa ilagho lya Mlungu ni lya walye wadumuse, si lya walye siwedumuse. 23Kwa hung'u ngera ikanisa lyose lyakoghana ngila mojori na kila mumoju adyowe kughora kwa viteto vizima, nao weje wamoju wa shighati ango siwedumuse, ado siweghoragha kamba inyose muo na mutu? 24Ela ngera wose wendeeresa ilagho lya Mlungu, nao eje mundu sedumuse ango mundu wa shighati, ujedyayo ngoloni aone kaung'a yake kwa ghalye esikilagha. Ujetaghanyo ni ghalye esikilagha, 25maghelelo ghake ghavisike ghejeiko mwazi, naye ujedamika na kumtasa Mlungu keghamba, “Mlungu fulo uwo ghati yenyu!”
Kukala na taratibu kele Ikanisa
26Ndamu ikalagha ije, wana wakwetu? Ngelo mwakoghana kutasa ngila mojori, mundu mumoju waimba, mzima wafundisa, mzima wafunya ufunuo kufuma kwa Mlungu, mzima waghora kwa viteto vizima, na mumoju wafasiri ghalye ghaghoro kwa kiteto achiweni. Malagho ghose ni suti ghadeo kwa ngila ifweni yewarura ikanisa. 27Ikakala ni kughora kwa viteto vizima, wandu waili ango watatu wadima kughora mumojori mumojori na kukale na mundu ofasiri ghalye gheghorogho. 28Ela ngera sikowesi mundu ofasiri ghalye gheghorogho kwa viteto vizima, aho ulya ashaile kughora kwa viteto vizima anyamale na aghore kwake iye mwenyi na kwa Mlungu. 29Wandu waili ango watatu wehawogho ilagho lyeghora lya Mlungu waghore, ngelo walye wazima weo wekepima ghalye gheghorogho. 30Ela ngera mundungi ewo kitembo kele ikoghano apate ilagho kufuma kwa Mlungu, ulya eluo keghora anyamale. 31Kwani inyose mwadima kueresa ilagho lya Mlungu mumoju mumoju eri kamba kila mundu akufundise na kukumbo ngolo. 32Mundu ewo na inosi lyeeresa ilagho lya Mlungu, ni suti alyimanzire. 33Kwani Mlungu si Mlungu wa lolololo, ela ni Mlungu wa sere.
Selyi iwo kele makanisa ghose gha wandu wa Mlungu, 34wake wanyamale kele makoghano. Siwadumusilo waghore, ela wakuseleze selyi Sheria ighoragha. 35Ngera washaya kumanya kindu chingi, wawakotele walume wawe kaya. Kwani ni waya kwa muke kughora hambiri ya ikoghano lya ikanisa. 36Ado ilagho lya Mlungu lyanadyowile kufuma kwenyu? Ango lyanajile kwa undu ghwenyu inyo wenyi? 37Ngera kuo na mundungi ekuririkanyagha kamba ni tondolo wa ilagho lya Mlungu ango wana inosi lya roho, ni suti atambukilo, agha niwandikagha ni kwa mlomu ghwa Mlungu. 38Ela ikakala sewatagha agha, simwamusikile. 39Kwa hung'u wana wakwetu, kaleni na ngolo yeeresa ilagho lya Mlungu, na simwaime wandu kughora kwa viteto vizima. 40Ela kila ilagho lyideike kirani na kwa ngila yake.
Currently Selected:
1 Wakorintho 14: SAGALLANT
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Kenya, 1993