1 Wakorintho 15
15
Kuzuka kwa Kristo
1Ndamu wana wakwetu, Nanashaile nimukumbuse ighulu ya Ilagho Lyaloli ilyi nimuchililile, mkalyihokera na kumanga ighulu yake. 2Kwa ngila ya Injili mwaokolo, ikakala muwatile gii agha nimuchililile, simanya ikale mwanadumuse tuu.
3Kwani imi nanamuhawile kihambiri ghalye imi nipatile: kamba Kristo wanafwile kwa undu ghwa kaung'a zetu selyi gheghoragha Mawandiko gha Kuela; 4kamba wanazikilo na kamba wanazukiso ijua lya katatu selyi kuwandiko kele Mawandiko gha Kuela; 5kamba wanamfumilile Petro, ima kejewafumila watumo wose ikumi na waili. 6Nao uko nyuma kawafumila wana wakwetu maghana masanu ngila mojori, nawo wengi wawe weo moyo hata lelo, hata ngera sani wamoju wanafwile. 7Nao nyuma yake kamufumila Jakobo na nyuma ya aho kawafumila watumo wose. 8Kudua kwa wose kanifumila imi namose sa mundu sevelo kwa ngelo yake. 9Kwani imi nimi mchache wa watumo wose, sefweni hata kuito mtumo, kwa kukala nanalyitirire ikanisa lya Mlungu. 10Ela kwa mbazi ya Mlungu nio selyi nio, na ilya mbazi anihawile siyeluo ya tuu, ela nanadeile kazi kuwachumba watumo wose, ela simi ungi, sala ni mbazi ya Mlungu yeluo ikedea kazi amweni kwangu. 11Kwa hung'u ngera nimi ango niwo, ilyi nilyo timuchililile na ilyi nilyo mudumuse.
Kuzuka Kwetu
12Ndamu ikakala Kristo wachilo kamba wanazusilo kufuma kwa wafwa, kudani wamoju wenyu waghora kamba sikuwesi kuzuka kwa awa wafwile? 13Ikakala sikuwesi kuzuka kwa wafwa, ni kuonyeza kukala Kristo sazusilo; 14na ikakala Kristo sazusilo kufuma kwa wafwa isi sitiwesi chechila, nenyo simwesi kindu chingi chedumusa. 15Isi tionekagha kukala wandimi ighulu ya Mlungu kwa kushuhudia kamba Mlungu wanamuzusile Kristo kufuma kifweni naye samuzusile ilyi yakala wafwile siwezukagha. 16Kwani ikakala wafwile siwezusogho, aho Kristo naese sazukiso. 17Na ngera Kristo sezusilo, aho idumusi lyenyu ni ituu, na mwanatulagha mlaghaye kele kaung'a zenyu. 18Na ni ukwenyi ikalagha kwa walye wose wafwile wekemudumusa Kristo wanahaite. 19Ikakala ikosereo lyetu kwa Kristo ni kele umana ughu ghwenyi, aho nisi wandu wefwilo waya kuchumba wandu wose urumenguni.
20Ela fulo ni kamba Kristo wanazusilo kwa wafwa, kuonyeza kamba walye wafwa wejezuso. 21Kwani selyi kwenyi kifwa chijile kwa undu ghwa mdamu, niko kwenyi na kuzuka kwa wafwa kweja kwa ngila ya mdamu. 22Kwani selyi kwenyi wandu wose wafwa kwa Adamu, niko kwenyi wose wezusogho kwa Kristo. 23Ela kila mumoju ujezuso kwa ngila yake. Hambiri ya wose ni Kristo, nao ngelo yake yeuya, walye weo wake. 24Nao kujeja kulya kudua, ngelo Kristo efunyagha uzuri kwa Mlungu Aba, ilyi amalila kusima roho za kila utawala, udimo na ndighi. 25Kwani Kristo ni suti atawale mpaka Mlungu awasime wamaiza wose na kuwaika isi ya maghulu ghake. 26Mumaiza wa kudua kusimo ni kifwa. 27Kwani Mawandiko gha Kuela ghaghora, “Mlungu wanaikile vindu vose maghuluni kwake na isi.” Ela kwa kughora “vindu vose vio isi ya maghulu ghake” sikumungizagha Mlungu uyu aikagha vindu vose kukala isi ya Kristo. 28Ela ngelo vindu vose vaiko isi ya utawala ghwa Kristo, niko iye mwenyi Mwana, ekuikagha isi ya Mlungu, uyu eikile vindu vose isi yake, nao Mlungu atawale vindu vose.
29Ndamu chiwadeagha wandu wabatizo kwa undu ghwa wafwa nini? Ikakala wafwa siwezusogho? Kudani wandu wabatizo kwa undu ghwawe? 30Na isi, Kudani tio mashakeni kila saa? 31Nafwa kila ijua wana wakwetu! Kukukasa nio nako kwa undu ghwenyu, kwa umana ghowataniso ni Kristo Jesu Bwana wetu kwanidea nighore hung'u. 32Kwa kughora kidamu, ikakala nanalwanile na nyamandu zibile Efeso, inifwanagha kimuni ikakala wafwa siwezukagha? “Tilye na tinwe kwani ikesho tifwighagha!” 33Simwaemboembo, “Kuirimana na mundu awase kwanahakilagha mghendo ghwa mundu”. 34Uyeni kele ghaloli na msighe kudea kaung'a, kwani wamoju wenyu siwamweni Mlungu. Nendeghora hung'u eri nimufwishe waya.
Muli ghozuka
35Ela mundu mumoju ujekotela, “Ado wandu wafwile wezukisogho ije? Wejekala na muli ghufweni ije?” 36Mpumbavu uwe! Ngelo uwanda mbeu msangeni, siyifumagha jako siyefwile. 37Nacho ichi uwandagha ni mbeu tu, ngera ya ngano ango ya viro vizima, suwandagha muli ghwa ilya mbeu ghujezegua. 38Mlungu waihawa ilya mbeu muli ghulya ashaile, iye waihawa kila mbeu muli ghwake.
39Kwani nyama ya vindu vio moyo vose siifwanane; kuo na nyama ya muli ghwa mdamu, kuo na nyama moju ya nyamandu, kuo na nyama nzima ya nyonyi, na kuo na nyama moju ya makumba. 40Kuo na mili ya mlunguni na mili ya urumenguni; ela ubwaa ghwa ilya mili ya mlunguni ghwanachumbane na ubwaa ghwa ilya mili ya urumenguni. 41Kuo na ubwaa ghumoju ghwa ijua, ubwaa ghumoju ghwa mwezi na ubwaa mzima ghwa ndonde; na hata ndonde zenyi zio na machumbano kele ubwaa ghwawe.
42Hung'u niko ikalagha ngelo wafwile wezukisogho. Ngelo muli ghuzikogho ni ghohakilika, ngelo ghuzukisogho ni ghokala moyo. 43Ngelo ya muli kuziko ghwanawase na ni mnyonge; ngelo yezukiso ghujekala ghwaloli na ghwa ndighi. 44Ngelo yeziko ni muli ghooneka, ngelo yezuso ghujekala muli ghwa Roho. Fulo kuo na muli ghuonekanagha na kuwo na muli ghwa roho. 45Kwani Mawandiko gha Kuela ghaghora, “Mundu wa hambiri Adamu wanaumbilo kakala moyo,” ela, Adamu wa kudua ni Roho yefunya umana. 46Ela ghulya muli ghwa roho sigho ghungi ghukayayagha sala ghulya muli ghooneka, nao ima ghuje ghulya ghwa Roho. 47Adamu wa hambiri wanajile kufuma msangeni, odeilo kwa msanga; Adamu wa kaili wanafumile Mlunguni. 48Walye weo wa msanga wanafwanane na ulya adeilo kwa msanga: walye weo wa mlunguni wanafwanane na ulya afumile mlunguni. 49Na selyi kwenyi tarwara ifwani lya mundu adeilo kwa msanga, niko kwenyi tirwaragha ifwani lya Mundu afumile mlunguni.
50Selyi nighoragha wana wakwetu, ni hung'u, ichi chideilo kwa muli na bighati sichidimagha kupata Uzuri ghwa Mlungu, na chehaita sichidimagha kupata kulemo ni kuhaita.
51-52Sikizileni nimughorere fulo ivisike: Itose sitifwighagha kungi, ela ngelo tarumbeta ya kudua yakwito, tijeghalulo itose, iyo shwa ng'weri, sa kukunya kwa iziso. Kwani ilyi tarumbeta yakwito, walye wafwile wejezuka na lyingi siwafwe sena, nesi itose tijeghalulo. 53Kwani ughu ghovunda ni suti ghughalulo kukala sighovundagha, na ughu ghufwighagha ni suti ghughalulo kukala sighofwighagha. 54Kwa hung'u ilyi muli ghovunda ghwaghaluka kukala sighovundagha, aho Mawandiko gha Kuela ghekatilagha:
“Kifwa, chahaitiso, usimi ghwapatikana.”
55“Kifwa, Ghuo hiyo usimi ghwako?
Kifwa, Ghuo hiyo usungu ghwako?”
56Usungu ghwa kifwa ni kaung'a, na ndighi za kaung'a ni sheria. 57Ela Mlungu aliko uyu atihawagha kusima kwa ngila ya Bwana wetu Jesu Kristo.
58Kwa hung'u, wana wakwetu washayo, mangeni na simwanyavurike, mutumikileni Bwana kwa chadi ngelo zose, kwani mwamanya kamba kazi mudeagha kwa undu ghwa Bwana si nduu ingi.
Currently Selected:
1 Wakorintho 15: SAGALLANT
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Kenya, 1993