1 Wakorintho 16
16
Mafunyo kwa wana wakwetu wadumuse
1Ndamu, kwa undu ghwa pesa mukusanyagha kwa kuwarura wandu wa Mlungu wakalagha Judea. Deeni selyi niuzile makanisa gha Galatia ghadee. 2Kila ijua lya Jumwa, ni suti kila mumoju aike mbali pesa kuirimana na mapato ghake, eri sikojekala na kuchanga pesa ngelo neja. 3Nikeja, nijewahawa barua yewamanyisa walye wandu muwasaghulagha waghenze inosi lyenyu Jerusalemu. 4Ilyi yaoneka kamba yanafweni nighende, aho wejeghendanya nemi.
Mipango ya Paulo
5Nikujagha kwenyu nyuma ya kuitila Makedonia, kwani ni suti nimare Makedonia. 6Namanya ngera nikalagha nenyo kwa ngelo, yadimika nikale ishika lyose, nao ima muniwarure kuendelea na charo changu andu kose nijeghenda kufuma aho. 7Kwani sishaile nionane nenyo tu kwa kuita. Nio na kukoserea kukalanya nenyo kwa ngelo ilyi Bwana ashaya.
8Ela nikalagha aha Efeso mpaka, ijua lya Pentekosto. 9Kwani mjango ghwarughuro ghodea kazi mbwaa ifweni, hata ngera sani kuwo wandu wengi weo kinyume changu.
10Ilyi Timotheo eja kwenyu, mudeeni sakale na ogha ngelo ewo nenyo, kwa kukala ni mdei kazi wa Bwana sa imi. 11Mundungi samumenye, ela mumwarure kele charo chake kwa sere, eri auye kwangu, kwani nio na kumukoserea kuuya imi ngila mojori na wana wakwetu.
12Ndamu ighulu ya wakwetu Apolo, nio nikemukumba ngolo eje kwenyu ngila mojori na wana wakwetu wamoju, ela seonagha kamba eje kele iyi ngelo. Ukujagha ngelo apata ulalo. 13Kaleni meso, mumange gii kele idumusi, mkale mang'oni muo na ndighi. 14Kila ilagho mudeagha, deeni kwa mashayo.
Malagho gha kudua
15Ndamu wana wakwetu namanya mwanamweni Stefanas na nyumba yake; niwo weluo wa hambiri kughaluka kukala Wakristo kele Akaya, nawo wanakufunyile kwa utumishi ghwa wandu wa Mlungu. Ndemvoya, 16muirime ulongozi ghwa wandu sa awa, na mundu uwo wose edeagha kazi na kutumika nawo. 17Nio na kuboelo kwa kuja kwa Stefanas, Fortunato na Akaiko: wausa ulalo ghwenyu. 18Wanisarusa ngolo selyi wamusarusa inyo, wandu sa awa wanafweni wamanyo. 19Makanisa gha Asia ghamuroghowa. Akula na Priskila, ngila mojori na ikanisa lya nyumba yawe wamuroghowa na ndighi kwa undu ghwa Bwana. 20Wana wakwetu wose aha wamuroghowa. Roghowaneni kwa kususugana kiwakwetu. 21Imi Paulo nawandika maroghoi agha kwa mkonu ghwangu. 22Uwo wose semushaile Bwana awanyizo! Marana tha - Bwana wetu njuu. 23Mbazi ya Bwana Jesu ikale nenyo. 24Mashayo ghangu ghakale nenyo inyose kwa Kristo Jesu. Ameni.
Currently Selected:
1 Wakorintho 16: SAGALLANT
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Kenya, 1993