2 Wakorintho 1
1
1Imi Paulo, mtumo wa Kristo Jesu kwa mashayo gha Mlungu, na wakwetu Timotheo. Tawandika kwa ikanisa lya Mlungu lyio alye Korintho, ngila mojori na wandu wose wa Mlungu wakalagha kila andu Akaya.
2Mbazi na sere ikale kwenyu kufuma kwa Mlungu Aba na Bwana wetu Jesu Kristo.
Paulo kumkasa Mlungu
3Timukase Mlungu na Aba wa Bwana wetu Jesu Kristo, Aba wa mbazi na Mlungu wa usarusi ghose. 4Iye watisarusa kele wasi ghwetu ghose, eri natose tidime kuwasarusa walye weo na wasi ghungi kwa ngila ya usaruso ghulya tasaruso nagho ni Mlungu. 5Kwani selyi kwenyi tio na ungaro na masirimo mengi gha Kristo, niko kwenyi tio na ngaro na usarusi mungi tighupatagha kwa ngila ya Kristo. 6Ngera sani tasirima, ni kwa undu ghwa usarusi ghwenyu na ukizi, ilyi nako tasaruso ni kwa undu ghwa usaruso ghwenyu eri mpate kusarua na kupata ndighi zemanga masirimoni sa ghalye tasirima. 7Kwa hung'u ikosereo lyetu kwenyu lyingi silyinyavurikagha; kwani tamanya kamba selyi kwenyi muo ngaro na masirimo ghetu, mjekala na ngaro na usarusi ghwetu.
8Wana wakwetu, tanashaile mumanye ighulu ya masirimi tighapatile Asia. Tanasirime kuchumba hata tikafwa ngolo yekala moyo. 9Hata tikaririkanya ngoloni kamba ni kifwa ndamu, ela agho gheluo ni ghekutidea sitakudumusile isi wenyi, ela timudumusile Mlungu azusagha wafwile. 10Iye wanatikizile kele ndengwa za kifwa, naye ujetikiza. Nesi takoserea kwake kamba ujetikiza sena. 11Inyo nanyose mutiwarure kwa malombi ghenyu, eri kwa malombi gha wandu wengi kwa undu ghwetu ghatumbulilo, naye Mlungu atibarikie na kukaso ni wandu wengi kwa undu ghwetu.
Paulo kughalula charo chake
12Kukukasa kwetu ni uku: ngolo zetu zatishuhudia kamba tabia zetu urumenguni na hasa kuchumba kwenyu inyo, zeluo za kuela na za ngolo ya kimlungu, sizeluo za suku za kidamu sala za mbazi ya Mlungu. 13Sikughamba tendewandika kindu chingi simoshomagha ango simoweni, namanya mtambukilogho. 14Selyi kwenyi mwatambukilo nisi kwa uchache kamba mwadima kukukasa nesi, selyi natose tijekukasa nenyo Ijua lya Bwana Jesu.
15Kwa kukala neluo na idumusi nenyo, neshaile nije kwenyu jako eri mupate mabwelo mandu maili. 16Neshaile nije kwenyu nikeghenda Makedonia na sena nije kwenyu ngelo yewuya kufuma Makedonia, nao muniwarure kele charo changu cheghenda Judea. 17Ado nikepanga hung'u neluo mundu oghaluka? Nanapangagha mipango yangu sa wandu wa urumengu, nidimagha kughora. “Ee” na “Hata” iyo ngelo yenyi? 18Fulo selyi Mlungu ni mfulo, malagho ghetu sigheghaluka “Ee” na “Hata.” 19Mwana wa Mlungu, Kristo Jesu, uyu timuchilile imi, Silvano na Timotheo seluo wa “Ee” na “Hata;” Iye oluo na wanatulagha “Ee” kwa Mlungu. 20Kele malagano ghose gha Mlungu iye ni “Ee.” Kwa hung'u taghora Ameni kuitila kwake kwa ubwaa ghwa Mlungu. 21Mlungu niye atideagha isi ngila mojori nenyo kumanga kele kuwataniso na Kristo, naye niye atisaghule; 22katiika alama yake na kutihawa Roho wake akale ngoloni kwetu sa mfunga.
23Mlungu niye shahidi wangu, kamba sijile kwenyu Korintho sena, kwa undu ghwa kumufwila waya. 24Si kughamba, ati isi tana ndighi ighulu ya idumusi lyenyu anduangi; muo na idumusi lyimangile, isi tendedea kazi ngila mojori nenyo kwa undu ghwa mabwelo ghenyu.
Currently Selected:
2 Wakorintho 1: SAGALLANT
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Kenya, 1993