2 Wakorintho 12
12
Maono na kufunukulilo kwa Paulo
1Ni suti nikukase, hata ngera sani si kirani chingi. Ela nijejuzila kughora ighulu ya maono na ufunuo Bwana anihawile. 2Namumanya Mkristo mumoju miaka ikumi na mine yadua etukilo noko ighulu hata mlunguni ghwa katatu; simanyagha ngera oluo kele muli ango roho, Mlungu mwenyi wamanya. 3Namanya kamba uyu mundu wanatukilo hata andu kwaloli wazimuni, ngera ni kwa muli ango kwa roho simanyagha. Mlungu mwenyi wamanya. 4Naye wanasikile malagho sighedimagha kughoreka, na mundungi sedima kughaghora. 5Imi nijekukasa na mundu sa uyo, ela sikukasagha imi mwenyi, sala kwa unyonge ghwangu. 6Ilyi nashaya kukukasa, sikalagha muzimu, kwani nijeghora fulo. Ela sijekukasa; kwa kukala sishaile mundungi anione imi kuchumba ichi eonagha na kusikila kwangu.
7Ela kwa kukuika imi mwenyi mbali na kukukasa na agho nifunukulilo, nanahawilo kudyayo kwa muli, uku kunikwitagha sa mtumo wa Shetani na kunidea nisakukase. 8Nanamlombile Bwana mandu matatu ighulu ya ilagho ilyi eri lyinisighe. 9Ela kaniuza, “Mbazi yangu yakukata. Kwani ndighi yangu yanakatisogho kele unyonge.” Kwa hung'u kwa kuboelo kubwaa nijekukasa kwa unyonge ghwangu eri ndighi za Kristo zikale amweni kwangu. 10Kwa hung'u nadumusila kwa mashayo unyonge, kutukano, wasi, kutiriro na kusowekelo kwa undu ghwa Kristo; kwa kukala ngelo nio mnyonge nana ndighi.
Kukambo ni chongo kwa Paulo ighulu ya Wakorintho
11Nanakalile mzimu! Ela ninyo munideile nikale mzimu; kwani yefweni ni kumacha nikasilo ninyo. Kwani hata ngera imi simi kindu chingi, seluo muchache kuisa watumo wabwaa. 12Wana mwakilimbita wengi na mashiniko ghadeike ghati yenyu kwa kurumaghia, ghaonyeza kukala imi nimi mtumo wa fulo. 13Kwani ni kwa ngila muni inyo musowekelo kuchumba makanisa mazima: si imi kulemo ni kumtukisa msigo ghwenyu ghoniwarura? Nifwileni waya ikosa ilyi!
14Ndamu kwa indu lya katatu nakuika kirani kuja kwenyu, na sishayagha kindu chingi kwenyu. Kwani sishaile mali yenyu kungi ela inyo wenyi. Wanake siwaikilagha wavali wawe mali, ela wavali niwo wawaikilagha wana wawe mali. 15Imi nijetumia vose nio navo, hata imi mwenyi kwa maboelo kwa undu ghwa roho zenyu. Ilyi namshaya na ndighi, munishayagha kachache?
16Ela kwa kudumusila agha, imi simutukise msigo ghungi, mujeghora nanadeile ulachu ghomwatisa inyo. 17Ado nanapatile kindu chingi kufuma kwa wandu niwatumile? 18Nanamuzile Tito eje na nikamtumanya na wakwetu mumoju. Tito wanausile chingi chenyu? Ado sitighendile kwa roho na kele nywayo zilya zenyi?
19Siikosagha ngelo iyi yose mririkanyagha kamba tendekutetela isi wenyi. Tendeghora hambiri ya Mlungu kwa undu ghwa Kristo, na kila kindu tighoragha washayo, ni cha kumuwaghala inyo. 20Kwani nio na wogha kamba ngelo nikujagha nisamudoke selyi niseshaile, nenyo simwanione selyi simoshaile. Nio na wogha kamba nadima kudoka marashano, iziso, hare, choyo, kuguna, matukano, kukukasa na kulegha kusikilana. 21Nendeogha kamba nikeja sena Mlungu wangu wadima kunifwisha waya hambiri yenyu, na nadima kulila kwa undu ghwa walye wadeile kaung'a na siwerihire kuluwa kwawe, tamaa zawe ziwase na uzingi ughu wadeile.
Currently Selected:
2 Wakorintho 12: SAGALLANT
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Kenya, 1993