2 Wakorintho 11
11
Paulo na watumo wa ndimi
1Nanashaile murumaghianye nemi kuchache hata ngera sani nimi mzimu. Namuvoya murumaghiane nemi. 2Nio na iziso nenyo, ela ni iziso lya ki Mlungu. Kwani nanamkumbile ulanga kwa undu ghwa Kristo, nimudee muuso niye mlume mumojori muo wachana waelile. 3Ela nakala na wogha kamba selyi nyoka yemukalilile Hawa kwa ulachu, niko kwenyi akili zenyu zidimagha kughalulo msighe kukala kele ushayo na kukufunya muelile kwa Kristo. 4Kwani mwarumaghia kwa kuboelo na mundu eja kumuchila Jesu mzima uyu isi sitemchilile; ango mwaipata roho nzima ilya simoipatile; ango mwadumusa Injili nzima ilya isi sitemchilile!
5Sighelelagha kamba imi nio mchache wa walye watumo wabwaa. 6Hata ikakala imi simi mudongoli ungi, ela uko kumanya nio nako; Tanamghorerere ilagho ilyi mwazi mwazi andu kose kwa kila ngila.
7Ado nanadeile kaung'a kwa kukuseleza eri inyo mujoke kwa undu ghwa kumchilila Ilagho Lyaloli lya Mlungu bule? 8Nanaghasokile makanisa mazima mali yawe eri nimutumikile inyo. 9Na ngelo tekezanye, simusirimise kwa vindu neshaile, simutukise mundungi wenyu msigo, kwani vilya vose neshaile nanaletelelo ni wana wakwetu kufuma Makedonia. Kwa hung'u nanakulindile nisakale msigo kwenyu na nijekala ukwenyi hung'u. 10Kwa selyi fulo ya Kristo iwo amweni kwangu, kukukasa uku kwangu sikunyamazogho kele isanga lya Akaya. 11Ndamu ni kudani? Ni kwa kukala simushaile inyo? Mlungu wamanya kamba nanamshaile!
12Agha nio nikedea, nijeendelea kughadea, eri niwaime kukukasa walye washaile kukukasa kwa kazi sa yetu. 13Wandu sa awa ni watumo wa ndimi, wadei kazi weembaemba, wekudeagha wenyi kukala ni watumo wa Kristo. 14Hata si ishiniko lyingi, kwani Shetani naese wanakudeagha kukala malaika wa mlangazi. 15Kwa hung'u si ishiniko lyingi ilyi watumishi wake wakudea kukala watumishi wa hachi, kudua kwawe kujekala kuirimana sa madeo ghawe.
Kusirima kwa Paulo sa mtumo
16Nendeghora sena mundungi sanighelelele kukala nimi mzimu. Ela hata ngera sani mwanighelelela hung'u, nidumusileni ukwenyi sa mzimu, eri nipate kachache kekukasa. 17Agha nighoragha si ghalye ghefumagha kwa Bwana kungi, ela ni agha gha uzimu ghokukasa. 18Kwa kukala wandu wengi wakukasa na urumengu, namose nijekukasa. 19Inyo kwa kukala ninyo walachu, mwarumaghianya na wazimu! 20Inyo mwarumaghia mundu emudeagha wasunyi ango emulyilagha, ango emumenyesagha ango emwatisagha ango emukwitagha ushu. 21Naghora kwa waya kamba teluo wanyonge!
Ela ngera mundungi wadima kukukasa kwa kindu chingi, nighora sa mzimu kamba namose nadima kukukasa. 22Ado wo ni Wahebrania? Hata namose. Ado wo ni Waisraeli? Hata namose. Ado wo ni wa kivali cha Abrahamu? Hata namose. 23Ado wo ni watumishi wa Kristo? Imi nanawachumbile (ndeghora sa mundu ewo na mutu). Imi nanadeile kazi ikulile, nanangizilo kifungoni kengi, nanakwitilo mandu mengi, na kengi neluo kavui na kufwa. 24Kufuma kwa Wayahudi mandu masanu nanachapilo viboko mirongo mitatu na kenda. 25Nanaraviro mandu matatu ni Waroma, indu imojori nikalaso na mawe. Nikahakilikilo ni meli mandu matatu. Nikatuko gasi zose baharini imalike kiro na msenya. 26Nanadeile varo vingi, nikepata ndengwa ya meji kuruka, ndengwa kufuma kwa viting'a, ndengwa kufuma kwa waisanga, ndengwa kufuma kwa mbari nzima, ndengwa kele mizi mibwaa, ndengwa kireti, ndengwa baharini na ndengwa kwa wana wakwetu wa ndimi. 27Neluo nikedea kazi ikulile na wasi, ngelo nyingi sewesi haring'a, neluo njala na kau, na ngelo nyingi seluo na chelya, na ngelo ya mbeo seluo na nguo ziketi. 28Ngila mojori na agha ghose neluo na ungi ghwa kazi kila ijua nikeghaghelela gha makanisa ghose. 29Nani ewo mnyonge nemi sakale mnyonge? Nani edeogho agwe, nemi sawasilo?
30Ngera nikukasagha, nendekukasa kwa unyonge ghwangu. 31Mlungu na Aba wa Bwana Jesu uyu abarikio kwa kale na kale, wanaweni kamba nendeghora fulo. 32Alye Damasko mundu eluo mubwaa wa isanga isi ya mzuri Areta, oikile wandu kulinda muzi, eri wanilalile waniwate. 33Ela nikafunyo kwa kungizo kele kikapu na kufunyo na idirisha kele ukuta ghwa muzi, nikakila kele mikonu yake.
Currently Selected:
2 Wakorintho 11: SAGALLANT
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Kenya, 1993