2 Wakorintho 8
8
Kufunya kwa Wakristo
1Wana wakwetu, tanashaile mumanye ilya mbazi ya Mlungu iwonyezo ni makanisa gha Makedonia. 2Kwani kele matimo mengi na kusirima, ungi ghwa mabwelo ghwawe na ukiwa, ghukakala uzuri kwa ishima lyawe. 3Fulo nendemghorera kamba kwa udimo ghwawe, na hata kuchumba udimo ghwawe wanafunyile kwa ngolo yawe wenyi, 4wakatilomba na ndighi kwa kutingolangola wapate ulalo ghokala wamoju wewarura wandu wa Mlungu. 5Nawo wakadea hung'u, na si selyi teluo na kuelelia, ela jako wekufunyile wenyi kwa Bwana na kwetu, kwa undu ghwa mashayo gha Mlungu. 6Kwa undu ughu tanamuzile Tito aikatise kazi iyi yaloli ghati yenyu selyi kwenyi aidyowile. 7Ndamu kwa kukala muo na kila kindu; idumusi, maghori, kumanya; na muo na beha yewarura na mashayo kwetu; juloni iyi kazi yaloli nayose.
8Sikughamba nendefunya mlomu, ela ni kwa kuonyeza beha yewarura wazima weo nayo; nendetima kuona selyi fulo mashayo ghenyu gheo. 9Kwani mwamanya mbazi yeluo na Bwana wetu Jesu Kristo; iye oluo ni mzuri, kakudea kukala mkiwa kwa undu ghwenyu, eri inyo mkale wazuri kwa ukiwa ghwake. 10Imi maoni ghangu ni agha: Yanafweni mkatise ghalye modyowile mwaka ghwadua, kwa kukala ninyo moluo wa hambiri. 11Ndamu mumalile iyo kazi, kwa kukala selyi kwenyi moikile na moshaile, ideeni kwa udimo ghwenyu muo nagho. 12Ikakala muo na ngolo yefunya, Mlungu udumusilagha manosi ghenyu kuirimana na icho muo nacho si chilya simowesi.
13Si kughamba wazima wewarurikagha nenyo muharisike ela inyose mkale karakara. 14Kwa indakwenyi ungi ghwenyu ghuwajuzile kugotua kwawe kamba nawose ungi ghwawe ghujuzile kugotua kwenyu, eri kukale na kukatana. 15Kwani Mawandiko gha Kuela ghaghora, “Uyu atumbanye vingi vichumbile seluo na vingi na uyu atumbanye vichache sagotuwilo.”
Tito na wambawe
16Namkasa Mlungu kwa kumuhawa Tito ngolo ya beha yemwarura iyi tio nayo. 17Kwani sadumusile malombi ghetu ukwenyi, ela iye mwenyi uwo na beha yeja kwenyu kwa kushaya kwake. 18Timutumanyagha na wakwetu mumoju akumogho kele makanisa ghose kwa machilo ghake gha Injili. 19Na si hung'u tu, ela niye asaghulo ni makanisa kutambanya nesi kele utumishi ughu tideagha kwa undu ghwa ubwaa ghwa Bwana mwenyi na kuonyeza gha ngolo yetu yaloli yewarura.
20Tanashaile mundungi satinung'unikile kwa selyi titumiagha manosi agha gha ishima. 21Kindu tishaile ni kudea gha hachi si hambiri ya Bwana tu, ela na hambiri ya wandu.
22Kwa hung'u timutumagha wakwetu mumoju ngila mojori nawo, iye ngelo nyingi tamutima na kumuona kukala wana beha yewarura, na indakwenyi uwo na beha kuchumba kwa kukala uo na idumusi nenyo. 23Kwa undu ghwa Tito, iye ni mumbetu na mdei kazi ngila mojori nemi kwa undu ghwenyu; na kwa undu ghwa wana wakwetu walye wazima, wo ni watumo wefumagha kele makanisa, nawo ni ubwaa ghwa Kristo. 24Kwa hung'u onyezeni hambiri ya makanisa mashayo ghenyu na kukukasa kwetu ighulu yenyu kwa awa wandu.
Currently Selected:
2 Wakorintho 8: SAGALLANT
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Kenya, 1993