Madeo 11

Maelezo gha Petro kwa ikanisa lya Jerusalemu

1Nao watumo na wana wakwetu weluo Judea wakasikila kamba wandu wa mbari nzima nawose wawata ilagho lya Mlungu. 2Kwa hung'u, Petro aghenda auya Jerusalemu, walye weluo wekeshaya wandu na mbari nzima wachigho wakamunung'unikila, 3wekeghamba, “Uwe wanangilile kele nyumba za wandu wa mbari nzima siwechilo na kwalyanya nawo.” 4Nao Petro kawaghorera mwazi mwazi ghose ghadeike kufuma kudyowa. 5“Neluo nikelomba kele muzi ghwa Jopa, nao nikaona iono. Kele iono ilyi, neonile kindu chikeselela kufuma mlunguni sa nguo mbwaa iwo na mbembe ine, ikamanga kavui nemi. 6Nikazighana awo mweni kwake, nikaona nyamandu zifugogho na nyamandu za isakeni na nyamandu zisogagha na nyonyi za isakeni. 7Nao nikasikila lwaka lukeniuza, ‘Petro uka, ushinje na ulye.’ 8Ela nikaghora, ‘Hata Bwana, kwani lyingi silyile kindu chingi chiwase ango chiluwe.’ 9Nao lwaka lukeja sena kufuma mlunguni lukeghamba, ‘Swachidee kindu chieleso ni Mlungu kukala chiluwe.’ 10Agha ghanadeike mandu matatu na kudua chilya kilambo chikauya noko ighulu mlunguni. 11Nao iyo ngelo yenyi wandu watatu wekeja hata kele ilya nyumba neluo nikekala watumo kufuma Kaisarea. 12Nao Roho kanuza nighendanye nawo samuke. Wana wakwetu awa watandatu tikairimana kufuma Jopa hata Kaisarea, tikangila kele nyumba ya Kornelio. 13Naye katighorera selyi amwonile malaika nyumba kwake kemuza, ‘Tuma mundu Jopa akupang'ile mundu aitogho Simoni Petro. 14Naye ujekughorera malagho ghekudea uwe na nyumba yako yose mukile.’ 15Nao nidyowa kughora ukwenyi, Roho wa Kuela kawaselela selyi kwenyi atiselelele isi. 16Niko nikakumbuka selyi Bwana eghorire, ‘Johana obatize na meji, ela inyo mjebatizo na Roho wa Kuela.’ 17Ndamu ikakala Mlungu wanawahawile wandu wa mbari nzima inosi lyilya lyenyi atihawile isi tighenda timudumusa Bwana Jesu Kristo. Imi nimi ani hata niisane na Mlungu?”

18Nao waghenda wasikila agha wakanyamala, wakamlika Mlungu wekeghamba, “Mlungu wawahawa wandu wa mbari nzima nawose ulalo ghoriha na kukala mana.”

Ikanisa lya Antiokia

19Nao walye wesaghilesaghile kwa undu ghwa matiriro ghajileja nyuma ya kuulagho kwa Stefano. Wamoju wawe wakaghenda hata wakafika Foinike, Kupro na Antiokia wekechila Ilagho yaloli kwa Wayahudi tu. 20Ela wamoju wa walye wadumuse, wandu wa Kupro na Kurene, wakaghenda Antiokia wakaeresa uvoro kwa Wagiriki, wakawachilila Ilagho lyaloli lya Bwana Jesu. 21Nao kwa kukala weluo na ndighi za Bwana, wakadea wandu wengi wadumuse na kumughalukila Bwana. 22Nao uvoro ughu ghukafikila ikanisa lya Jerusalemu; kwa hung'u wakamtuma Baranaba Antiokia. 23Nao afika na kuona selyi Mlungu awabarikia wandu, kaboelo, kawakumba ngolo, wakale wadumusiliki na wafulo kwa Bwana sikwewesi kuuya nanyuma. 24Baranaba oluo mundu waloli, ajule Roho wa Kuela na idumusi. Na wandu wengi wakamghalukila Bwana. 25Nao Baranaba kaghenda Tarso kumuhada Saulo. 26Naye aghenda amwona, kejanya naye Antiokia. Na kwa mwaka mlanzi wose waili wakakoghana na wandu wa ikanisa na kufundisa wandu wengi. Nako alye Antiokia niko wairimi wadyowile kuito Wakristo.

27Nao ngelo ilya wekeja wana tondolo Antiokia kufuma, Jerusalemu. 28Mumoju wawe aitogho Agabo kakala kimusi kwa ndighi za Roho katondola kamba njala mbwaa iwo kavui kuja kele isanga lyose. (Agha ghekeja ngelo Klaudio eluo kewatala). 29Nawo walye wairimi wakadumusilana kamba kila mumoju wawe afunye selyi edimagha utari ghowaghenzela wana wakwetu awo weluo wekekala Judea. 30Nawo wakadea hung'u, wakatumana pesa kwa waghosi wa ikanisa kwa mikonu ya Baranaba na Saulo.

Currently Selected:

Madeo 11: SAGALLANT

Highlight

Copy