Madeo 12
12
Kutiriro kwa ikanisa kujuzilika
1Nao ngelo iyi Mzuri Herode kadyowa kutirira wandu wamoju wa ikanisa. 2Kamuulagha Jakobo wakwawe Johana kwa lufu. 3Naye aghenda aona kamba ilyi lyawaboela Wayahudi, Kamwata Petro. (Agha ghedeike ngelo ya karamu ya mikate siyengizilo chachu). 4Nao nyuma ya kumwata Petro, wakamungiza kifungoni, kaiko mikonuni kwa warindiri weluo mafungu mane gha askari wane wane, eri wamlinde. Herode oshaile amtaghanye hambiri ya wandu nyuma ya Pasaka. 5Kwa hung'u, Petro kaiko kifungoni, ela ikanisa lyikamlombela Mlungu na ndighi.
Petro kufungulo kifungoni
6Nao kiro chilya cheluo hambiri ya Herode kumufunya shighati kwa wandu, Petro oluo atungure ghati ya warindiri waili. Naye oluo afungilo na minyororo mili, na warindiri wamoju weluo aho shighati ya mjango ghwa kifungoni wekelinda. 7Nao iyo shwa ng'weri malaika wa Bwana kakala kimusi na mlangazi ghukalangaza chilya chumba. Naye malaika kamunyavura kamunula, keghamba, “Uka shashowa.” Nao minyororo ikapotoka kufuma kele mikonu yake. 8Nao Malaika kamuza, “Funga mkowa ghwako na vilatu vako.” Petro kadea ukwenyi, nama malaika kamuza, “Rwara ikoti lyako uniirime.” 9Petro kamwirima shighati ya kifungoni. Naye samanyile kukala agha malaika edeagha ni gha fulo, karirikanya kamba ondeona maono. 10Wakaita kwa warindiri wa hambiri, na wa kaili, ima wekeja kele mjango ghwa chuma ghungilagha kele muzi. Mjango ghukarughuka ghwenyi wakafuma. Nao wakawata kughenda na barabara, nao malaika kamusigha Petro.
11Nao Petro katambukilo ni ghalye ghadeike, kaghora, “Ndamu namanya ni fulo! Bwana wamutuma malaika wake kunivuvula kufuma kele mikonu ya Herode na kufuma ghalye ghose Wayahudi weluo wekekoserea kudea.”
12Nao atambukilo, kaghenda kele nyumba ya Mariamu mee Johana Marko. Wandu wengi wekughane alye wekelomba. 13Petro kadaha mjango ghwa shighati, na mtumishi mumoju mchana aitogho Roda keja kutika. 14Naye kamanya lwaka lwa Petro, kaboelo hata kalemo ni kurughura mjango, kauya kughorera wandu kamba Petro niye ewo shighati. 15Nawo wakamuza, “Uwo na mutu!” Ela iye kajuzila kughora ni fulo. Nawo wakamtumbulila, “Ni malaika wake.” 16Ela Petro kajuzila kudaha mjango. Nawo warughura mjango na kumwona wakashinika. 17Naye kawakumbila mkonu wanyamale, kawaheleela selyi Bwana amufunyile kifungoni. Nao kawauza, “Mghorereni Jakobo malagho agha ngila mojori na wana wakwetu wose.” Nao kafuma kaghenda andu kuzima.
18Nao kuela, warindiri wakangilo ni wogha mubwaa Petro wadeika ije? 19Herode kaghora ahado, ela siwedimile kumwona. Kwa hung'u kaghora warindiri wakotelo na kaghora waulagho. Nao nyuma ya agha Herode kafuma Judea kaghenda kakala Kaisarea kwa ngelo.
Kifwa cha Herode
20Naye Herode owasililo na ndighi ni wandu wa Tiro na Sidoni, kwa hung'u wanguchi wakaghenda kumwona. Hambiri wakasikilana na Blasto, uyu eluo mubwaa wa nyumba ya mzuri awatarie; wakaghenda kwa Herode kulomba sere, kwa kukala isanga lyawe lyeluo lyikepata chakulya kufuma isanga lya mzuri. 21Nao kele ijua lyesaghulo, Herode karwara nguo zake za kiuzuri, kakala kitembo kele kifumbi cha uzuri, kahelea na walye wandu. 22Nawo wandu wakaghora na lwaka lubwaa, “Ni lwaka lwa mlungu si lwa mdamu ungi.” 23Nao iyo ngelo yenyi malaika wa Bwana kamukwita Herode, kamgwisha kwa kulegha kumuhawa Mlungu ishima, kalumo ni mvunyu, kafwa. 24Nao ilagho lya Mlungu lyikajuzila kuera na kuzeguwa.
25Nao Baranaba na Saulo waghenda wamalila kazi yawe wakauya kufuma Jerusalemu ngila mojori na Johana Marko.
Currently Selected:
Madeo 12: SAGALLANT
Highlight
Share
Copy
Want to have your highlights saved across all your devices? Sign up or sign in
(C) The Bible Society of Kenya, 1993
