Madeo 19

Paulo alye Efeso

1Nao ilyi Apolo eluo Korintho, Paulo katamba kuitila kele isanga na kafika Efeso. Alye kadoka wairimi wamoju, 2kawakotela, “Ado mwanapatile Roho wa Kuela mghenda mudumusa?” Nao wakamtumbulila, “Hata sitisikile ngera kwana Roho wa Kuela.” 3Paulo kawakotela, “Ndamu mwanabatizo kwa ubatizo muni?” Wakamtumbulila, “Kwa ubatizo ghwa Johana.” 4Paulo kawauza, “Ubatizo ghwa Johana gholuo ni ghoriha kaung'a, naye owauzile Waisraeli wamudumuse uyu ekujagha nyuma yake, naye ni Jesu.” 5Nawo waghenda kusikila agha wakabatizo kwa izina lya Bwana Jesu. 6Paulo kawaikilila mikonu na Roho wa Kuela kawaselela, wakaghora kwa viteto vizima na kueresa ilagho lya Mlungu. 7Nawo weluo sa wandu ikumi na waili.

8Paulo oluo keghenda kele Sinagogi, kwa miezi mitatu, keheleanya na wandu sikweo na wogha, kadea nganyi nawo zewashurutisha ighulu ya uzuri ghwa Mlungu. 9Ela wamoju weluo na ngolo zikulile, na siwadimile kudumusa, nawo wakaghora laghelaghe ighulu ya Ngila ya Bwana hambiri ya wandu. Kwa hung'o, Paulo kawasigha, kawatana na wairimi, naye kawafundisa kele chumba cha mafundiso cha Turano kila ijua. 10Agha ghakadeika kwa miaka mili, hata wandu wose weluo wekekala kele isanga lya Asia, Wayahudi na wandu wa mbari nzima, wakasikila ilagho lya Bwana

Wana wa Skeva

11Naye Mlungu oluo kedea wana mwakilimbita wa mashiniko kwa mikonu ya Paulo. 12Hata vitambaa na nguo eluo ketumia zitwalilo wakongo, makongo ghawe ghakaboa na pepo ziwase zikawafuma. 13Nao Wayahudi wamoju weluo wekemaramara na kupunga pepo ziwase, wakatima nawose kutumia izina lya Jesu kugusa pepo. Wekeghora, “Namuza kwa izina lya Jesu uyu achilogho ni Paulo mfume.” 14Nao koluo na wana mfungate wa Mkohani Mubwaa wa Wayahudi aitogho Skeva, weluo wekedea hung'u. 15Ela pepo iwase ikawauza, “Nanamweni Jesu na Nanamweni Paulo, ela inyo ninyo wana ani?” 16Nao ulya mundu eluo na pepo iwase kawachumbila kwa ndighi, kawawata, na kuwasima ndighi wose. Nawo wakafuma nyumba kwake na iseghe mwazi na washoghonolo. 17Nao Wayahudi na wandu wa mbari nzima wose weluo wekekala Efeso wakasikila ghore izi, wakangilo ni wogha, na izina lya Bwana Jesu lyikahawo ubwaa. 18Wengi wa walye wedumuse wekeja wakaghora wanduni selyi weluo wekedea. 19Na wengi wa walye weluo wekelogha wakaleta vuo vawe andu kumojori na kuviisha hambiri ya wandu. Wakadea isabu lya zoghori ya vuo, lyikafika vibelele elfu mirongo misanu va feza. 20Na kwa ngila iyi ilagho lya Bwana lyikazeguwa na kupata ndighi.

Zuhe alye Efeso

21Nao nyuma ya malagho agha kudeika, Paulo kelongozo ni roho kaona atambe kuitila Makedonia na Akaya na kughenda Jerusalemu. Kaghamba, “Nyuma ya kughenda alye, ni suti nighende Roma nakose.” 22Kwa hung'u kawatuma wawaruri wake waili, Timotheo na Erasto hata Makedonia, naye kahangalika Asia kwa ngelo.

23Yeluo ni ngelo iyi kuukile zuhe mbwaa alye Efeso kwa undu ghwa Ngila ya Bwana. 24Koluo na mundu mumoju mshani feza aitogho Demetrio, eluo kedea sanamu za Hekalu ya mlungu wa kiwake aitogho Artemi, na kazi yake yewaletelele faida mbwaa mafundi. 25Kwa hung'u, kawakoghanya wandu wake ngila mojori na wazima weluo wekedea kazi ifwanane na yawe, kawauza, “Alume, mwamanya kamba uzuri ghwetu ghondeleto ni iyi kazi. 26Nenyo mwaona na kusikila selyi Paulo edeagha. Ughoragha kamba milungu ideogho ni wadamu si milungu ya fulo, naye wakumba sheshe na kughalula wandu wengi aha Efeso na kavui kila andu Asia. 27Kwa hung'u, kuo na ndengwa ya iyi kazi yetu kuhakilika. Na si hung'o tu, ela hata kuo na ndengwa ya Hekalu ya mlungu mubwaa Artemi kukala si kindu chingi, na hata ubwaa ghwake ghuhakilike, naye ni mlungu atasagho kila andu Asia na urumengu ghose.”

28Nao makoghano waghenda wasikila malagho agha wakajoko ni hare na wakadyowa kuzuha, “Artemi wa Efeso ni mubwaa!” 29Zuhe ikaera kele muzi ghose. Wandu wa zuhe wakawawata Gayo na Aristarko wandu wa Makedonia weluo weketambanya na Paulo, wakaghenda nawo naiseghe kele nyumba yedeila hako. 30Paulo mwenyi oshaile aghende akale hambiri ya makoghano, ela wairimi wakamkanya. 31Nao wagheni wake weluo wabwaa wa Asia wakatumana uvoro wekemlomba sangile kele nyumba yedeila hako. 32Nao makoghano wakazuha, wamoju wekekema hung'u na wazima wekekema izima; kwani wengi wawe hata siwemanyile ichi chewakoghanye alye ni kimuni. 33Nao wandu wamoju wakaona kamba Alekzanda niye ashekerere, kwa kukala. Wayahudi wanamdeile akale hambiri. Niko Alekzanda kawanulila mkonu wanyamale eri akutetele iye mwenyi hambiri yawe. 34Ela wamumanya kamba iye ni Myahudi, wakakema wose na ndighi kwa masaa maili. “Artemi wa Efeso ni mubwaa!” 35Ela kudua karani wa muzi kadima kunyamaza makoghano, kewauza, “Wandu wa Efeso, kila mundu wanaweni kamba muzi ghwa Efeso nigho mrindiri wa Hekalu ya Artemi mubwaa, na iwe lyetaso lyilya lyiselele kufuma mlunguni. 36Sikwesi mundungi edimagha kukana malagho agha. Ndamu nyamaleni na simwadee kindu chingi simwoghelele. 37Mwaleta wandu awa aha hata siweiwile vindu vingi va Hekalu ango kughora laghelaghe ingi ighulu ya mlungu wetu wa kiwake. 38Ngera Demetrio na mafundi ghake weo na ilagho ighulu ya mundungi, andu kotaghanya na wabwaa weo aenyi; wadima kughenzana alye eri wataghanyo. 39Ela ngera muwo na ghengi mazima mushaile, ghenzeni ghaboeso kele milandu ya waisanga ya hachi. 40Kwani kuo na ndengwa yeshitakio kwa undu ghwa zuhe yadeika lelo. Sitikalagha na lyekutetela kwa agha ghose na sitipatagha chausa chingi chaloli chefunya ighulu yake.” 41Naye aghenda aghora hung'u, kamalila mlandu.

Currently Selected:

Madeo 19: SAGALLANT

Highlight

Copy