Madeo 20

Paulo kughenda Makedonia na Akaya

1Nao nyuma ya ilya zuhe, Paulo kawapang'a walye wedumuse, kawakumba ngolo na kuwalaga. Nao kafuma kaghenda Makedonia. 2Naye kaita kele lyilya isanga kewakumba wandu ngolo kwa malagho mengi. Nao kafika Akaya, 3andu akalile mezi mitatu. Nao ilyi eluo kekuboesa kughenda Siria, kasikila kamba Wayahudi wadea njama ighulu yake, kwa hung'u kaona awuile Makedonia. 4Naye kaghendanya na Sopata mwana wa Pirho kufuma Berea, na Aristarko na Sekundo kufuma Thesalonike, na Gayo kufuma Derbe na Timotheo, Tukiko na Trofimo kufuma Asia. 5Awa wekayaye, nawo wakatidafwa Troa. 6Isi tikatamba kwa meli kufuma Filipi nyuma ya karamu ya mikate siyewesi chachu, na tikakoghana nawo Troa nyuma ya majua masanu. Tikakala alye majua mfungate.

Charo cha Paulo cha kudua Troa

7Nao ijua lya Jumwa, tikakoghana ngila mojori kwa kuvunja mikate. Paulo kahelea na wandu, naye kaendelea kuhelea hata kiro ghati, kwa kukala ilyo ikesho oluo ketamba. 8Koluo na taa nyingi kele chumba chilya cha gorofeni andu tekoghanile. 9Nao koluo na mtawana mumoju aitogho Eutuko, ekalike kitembo idirisheni ilyi Paulo eluo kehelea, Eutuko kashonga na kawato ni haring'a kamare hata kabuduka kufuma gorofa ya katatu. Wakamshowa afwa. 10Ela Paulo kaselela, kadamika kamusura kaghora, “Simwahariso ni ngolo wanatulagha moyo.” 11Naye kawuya kele chumba cha gorofeni, nao kavunja mkate kalya. Nao nyuma yake kajuzila kahelea nawo kwa ngelo ndele hata ijua lyikafuma. Nao ima Paulo kaghenda. 12Nawo wakamutwala mtawana kaya ewo moyo na ngolo zawe zisarue na ndighi.

Kufuma Troa hata Mileto

13Nao tikakayaya kughenda melini, tikaghenda na meli hata Aso andu teluo timusilagha Paulo. Otiuzile tidee hung'u, kwa kukala iye mwenyi oluo ughendagha kwa maghulu. 14Naye akoghana nesi alye Aso, tikamungiza melini, tikaghenda Mitulene. 15Tikatamba kwa meli kufuma alye, tikafika Kio ilyo ikesho. Na ijua lyiirimagha tikafika Samo na ijua lya katatu tikafika Mileto. 16Paulo oshaile kughenda kwa meli samarire Efeso eri samalile ngelo ingi Asia. Oluo na shoshowa eri afike Jerusalemu ngera idimikagha ijua lya Pentekosto.

Paulo kulagana na waghosi wa Efeso

17Alye Mileto Paulo katumana uvoro Efeso kwa waghosi wa ikanisa weje wakoghane naye. 18Nao waghenda wafika kawauza, “Mwamanya selyi nitumie ngelo yose ilyi neluo nenyo kufuma ijua lya hambiri nifika Asia. 19Nanadeile kazi yangu sa mtumishi wa Bwana kwa umbole ghose na mbori na matimo ghanipatile kwa njama ziwase za Wayahudi. 20Mwamanya kamba lyingi sikangamile kumughorera kindu chingi chemwarura kele machilo na mafundiso ghangu wanduni na nyumba kwenyu. 21Kwa Wayahudi na wandu wa mbari nzima, nanawaonyile wamghalukile Mlungu na wasighe kaung'a zawe na wamudumuse Bwana Jesu. 22Na ndamu kwa kuirima gha Roho wa Kuela nendeghenda Jerusalemu nisemanyagha agha ghenipatagha. 23Namanya putu kele kila muzi Roho wa Kuela wanionya, kamba kifungo na matiriro vendenidafwa. 24Ela imi sitalagha kungi umana ghwangu kukala ni kindu chingi kwangu, baha nikatise utumo ghwangu na kumalila kazi Bwana Jesu anihawile, ya kuereso Ilagho Lyaloli lya mbazi ya Mlungu.

25“Nanaghendile kila andu kwenyu nikechila Uzuri ghwa Mlungu. Na ndamu namanya kamba simujeniona sena. 26Kwa hung'u, nendemghorera lelo, kamba ilyi mundungi wenyu alaghaya imi siwesi ikosa lyingi. 27Kwani imi lyingi sikangamile kumughorera njama zose za Mlungu. 28Kulindeni inyo wenyi na ugho uranu ghose muhawilo ni Roho wa Kuela mkale warindiri. Mkale walisa wa ikanisa lya Mlungu alyideile kukala lyake kwa bighati ya Mwana wake. 29Namanya nyuma ya kuuka kwangu, turugha zibile zikujagha ghati yenyu, nawo siwejefwila waya uranu. 30Na kujeja ngelo wandu wamoju wenyu wejeghora ndimi eri wawarute awa wadumuse gasi yawe. 31Kwa hung'u, kaleni meso, na mukumbuke kamba kwa miaka mitatu kiro na msenya, kwa mbori nyingi nanamfundise kila mumoju wenyu.

32“Na ndamu, namwika kele ulindiri ghwa Mlungu na ilagho lyake lya mbazi lyedima kumwaghala na kumuhawa ufwa awaikilile wandu wose waeleso. 33Imi sedeile iziso kwa feza ango zahabu ango nguo ya mundungi. 34Inyo wenyi mwamanya kamba nanadeile kazi na mikonu yangu kupata kila kindu neshaile imi na walye nekezanye nawo. 35Nemi nanamwonyeze kwa kila ngila kamba kwa kudea kazi na ndighi hung'u niko tiwawaruragha wanyonge, tikekumbuka malagho gha Bwana Jesu mwenyi selyi aghorire. ‘Baha kufunya kuchumba kuhawo.’”

36Nao Paulo amalila kughora agha, kadyaya ngokoro ngila mojori nawo, wakalomba. 37Na wose wakalila ngelo yemusura na kumususuga wekelagana naye. 38Nawo wewasililo kuchumba kwa kukala owauzile siwejemwona sena. Nawo wakamfumira hata kele meli.

Currently Selected:

Madeo 20: SAGALLANT

Highlight

Copy