Madeo 21

Paulo kughenda Jerusalemu

1Nao tighenda kulagana nawo, tikangila melini tikauka. Nao nyuma ya kuwambuka na meli, tikafika Kosi, na ijua lya kaili tikafika Rodo, na kufuma alye tikaghenda Patora. 2Alye tikadoka meli ighendagha Foinike, tikangila, tikaghenda. 3Tikafika andu teluo tikeona Kupro, tikaitila kusini tikaghenda hata Siria. Tikaselela Tiro andu meli yeluo ikeseleza misigo. 4Tikadoka wandu wadumuse wa alye, tikakalanya nawo kwa jumwa. Na kwa ndighi za Roho, wakamuza Paulo saghende Jerusalemu. 5Ela ngelo yetu yekalanya nawo idua, tikauka tikaghenda ngila yetu. Nawo wose na wake wawe na wanake, wakatifumira hata shighati ya muzi. Tikadyaya ngokoro itose mbalimbali ya bahari na tikalomba. 6Nao tikalagana, tikajoka melini, nawo wakagala nyumba kwawe. 7Nao tikaendelea na charo chetu cha meli kufuma Tiro hata Tolemai, alye tikaroghowana na wana wakwetu na kukalanya nawo ijua imojori. 8Nao ilyo ikesho lyake, tikauka tikaghenda Kaisarea. Alye Tikaghenda kele nyumba ya Filipo Mchili, tikakala kwake, Iye oluo mumoju wa walye wandu mfungate wesaghulo Jerusalemu. 9Naye oluo na wachana wane siweusilo weluo na inosi lyetondola. 10Nao tighenda tikala alye kwa majua ghaenga, tondolo aitogho Agabo keja kufuma Judea. 11Naye aghenda eja kwetu, kausa mkoa ghwa Paulo, kakufunga mwenyi nagho mikonu na maghulu ghake, kaghamba, “Hung'u niko Roho wa Kuela eghoragha, Mundu wa mkoa ughu ujefungo hung'u ni Wayahudi Jerusalemu. Nawo wejemufunya kwa wandu wa mbari nzima.” 12Nao tighenda tisikila hung'u, isi na wazima weluo alye tikamungolangola Paulo saghende Jerusalemu. 13Ela iye kaghora, “Nini icho mudeagha, mwendelila na kuniulagha ngolo? Nio tayari, si kufungo tu Jerusalemu, ela hata kuulagho alye kwa undu ghwa izina lya Bwana Jesu.” 14Timungolangola atilema, tikamusigha tikeghamba, “Mashayo gha Bwana Ghadeike.”

15Nao nyuma ya kukala alye kwa ngelo, tikafunganya tikaghenda Jerusalemu. 16Wairimi wamoju wa Kaisarea nawose tikaghendanya nawo, wakatighenza kwa nyumba ya mundu teluo tikalagha kwake - Mnasoni wa Kupro eluo mundu adumuse kale.

Paulo kughenda kwa Jakobo

17Nao tifika Jerusalemu wana wakwetu wakatihokera kirani. 18Nao ikesho lyake Paulo kaghendanya nesi kumuroghowa Jakobo na waghosi wose wa ikanisa weluo alye. 19Paulo kawaroghowa na kuwaghorera malagho ghose Mlungu adeile kwa wandu wa mbari nzima kwa utumishi ghwake. 20Nao nyuma ya kumusikizila wakamlika Mlungu wose. Nao ima wakamuza Paulo, “Wakwetu, waone selyi maelfu mengi gha Wayahudi wadumusa na selyi wose waiwata Sheria kwa ngolo. 21Nawo waghorero malagho ghako kamba wanafundisagha Wayahudi wose wakalagha masanga gha mbari nzima wasighe Sheria ya Musa, kowauza siwachwe wanake wawe ango kuirima ada za Kiyahudi. 22Nawo wesikilagha kamba wanajile. Ndamu kudeogho ije? 23Dea selyi tikughoreragha. Kuwo na wandu wane aha waikile hati. 24Ghendanya nawo, na muwatane ukuombochole ngila mojori nawo na ulipe mafungu ghake, nawo waharo vongo vawe. Kwa ngila iyi kila mumoju ujemanya kamba sikwesi fulo ingi ighulu ya malagho waghorerero ighulu yako, ela uwe mwenyi wanaghendagha kuirimana na Sheria ya Musa. 25Ela kwa undu ghwa wandu wa mbari nzima wadumuse, tanawaghenzelele barua yewaghorera selyi tionile, kamba ni suti siwalye chakulya chifunyilo sadaka kwa sanamu ango bighati ango nyamandu inyoriro na kamba wakulinde wenyi na uzingi.” 26Nao Paulo kawatana na walye wandu ilyo ikesho, kakuombochola ngila mojori nawo. Nao ima kaghenda Hekaluni kaghora ni majua malinga itwalagha hata ngelo yeombocholo idue, nao sadaka ifunyo kwa kila mumoju wawe.

Paulo kuwato Hekaluni

27Nao majua mfungate ghafika avui na kudua, Wayahudi wamoju wafumile Asia wakamwona Paulo Hekaluni, wakashoterea makoghano, wakamwata Paulo. 28Wakakema, “Walume wa Israeli twarureni! Uyu niye mundu aghendagha kila andu kefundisa wandu wose kinyume cha wandu wa Israeli na Sheria ya Musa na iyi Hekalu. Na hata hung'u wangiza wandu wa mbari nzima kele Hekalu na kuluwisa andu aha kwa kuela!” 29(Weghorire hung'u kwa kukala wemwonile Trofimo wa Efeso ngila mojori na Paulo kele muzi, nawo wakaririkanya kamba Paulo wamungiza kele Hekalu.)

30Nao kukakala na kuzuha muzi ghose, nawo wandu wakakimbila, wekeja kufuma gasi zose wakamwata Paulo na kumukurughusa hata shighati ya Hekalu. Wakarughara mijango ya Hekalu. 31Nao ilyi weluo wekeshaya kumwulagha Paulo, malagho ghakamfikila mubwaa wa askari wa Kiroma kamba Jerusalemu yose iwo na zuhe. 32Na mubwaa wa askari iyo ngelo yenyi kausa majemadari ngila mojori na askari wakaselela kwa makoghano. Nawo wandu waghenda wamwona na askari, wakasigha kumukwita Paulo. 33Ulya mubwaa wa askari kaghenda kamwata Paulo na kaghora afungo na minyororo mili. Nao kawakotela, “Nani uyu, na wadea ije?” 34Nao wandu wamoju wa makoghano wakaghora hung'u na wazima wakaghora izina. Na kwa kukala ulya mubwaa wa askari sapatile ilagho lyingi lya hachi kwa undu ghwa zuhe, kauza askari wake wamughenze Paulo ngomeni. 35Wakaghenda naye hata wakafika kele ngazi, nao alye ikakala ni suti askari wamutuke Paulo kwa undu ghwa wandu wezuhagha. 36Weluo wekemwirima wose na wekekema “mulagheni.”

Paulo kukutetela

37Nao ilyi weluo wekeshaya kumungiza Paulo ngomeni, kaghoranya na mubwaa wa askari, “Nadima kughora kindu chingi Kwako? Nao ulya mubwaa wa askari kamukotela nambe wanaweni Kigiriki? 38Ado uwe suwe ungi ulya Mumisri edyowile sheshe na kaghenza wandu elfu ine wa uta kireti?” 39Paulo kamutumbulila, “Imi nimi Myahudi nivelelelo Tarso ya Kilikia raia wa muzi ghumanyikane, Nalomba nighoranye na awa wandu.” 40Nao mubwaa wa askari kamuhawa rusa, kwa hung'u Paulo kakala kinusi ngazini na kuwanulila wandu mkonu wanyamale. Nawo wanyamala chwi. Paulo kahelea nawo kwa Kihebrania.

Currently Selected:

Madeo 21: SAGALLANT

Highlight

Copy