Madeo 23

1Paulo kawakulila meso wandu wa Baraza kawauza, “Wana wakwetu nio na ngolo ielile hambiri ya Mlungu hata lelo.” 2Nao Mkohani Mubwaa Anania kawauza walye weluo kimusi avui na Paulo wamuribe mlomu. 3Paulo kamuza, “Mlungu ukuribagha uwe ukuta ghuvililo chokaa! Wakala kitembo aho kunitaghanya kuirimana na Sheria na sena wavunja Sheria kwa kughora niribo!” 4Wandu weluo kavui na Paulo wakamuza, “Ondemtukana Mkohani Mubwaa wa Mlungu!” 5Paulo katumbulila, “Simanyile wana wakwetu kamba ni Mkohani Mubwaa. Kwani Mawandiko gha Kuela ghanaghoragha, ‘Swaghore laghelaghe ighulu ya mubwaa wa wandu wako.’”

6Nao Paulo aghenda atambukilo kamba wamoju wawe ni Wasadukayo na wamoju ni Wafarisayo, kaghora kwa lwaka lubwaa kele ilya Baraza, “Wana wakwetu imi nimi Mfarisayo na mwana wa Mfarisayo. Nendetaghanyo kwa kukala nanakosereagha kamba wafwa wejezuka.” 7Nao aghenda aghora hung'u, Wafarisayo na Wasadukayo wakadyowa kurashana, na baraza ikasarikana. 8(Kwani Wasadukayo wanaghoragha kamba wandu siwejezuka kufuma kwa wafwa na kamba sikwesi wana malaika ango roho, ela Wafarisayo wadumusa ghose matatu). 9Nao zuhe ikakala mbwaa na walimu wamoju wa Sheria weluo Wafarisayo wakauka kimusi wakaghora, “Sitionagha ulaghelaghe ghungi kwa uyu mundu! Yadimika ngera roho ango malaika waghoranya naye.”

10Nao nganyi ikala mbwaa mubwaa wa askari kaogha kamba Paulo wadima kurashuro vindi vindi. Kwa hung'u kawauza askari wake waghende wamuse Paulo kwawe na wamghenze ngomeni.

11Nao chilya kiro chenyi, Bwana kamujila Paulo, kamuza, “Swadee wogha! Selyi kwenyi wanishuhudia Jerusalemu ni suti unishuhudie Roma na kose.”

Njama yemuulagha Paulo

12Nao kughenda kuela, Wayahudi wamoju wakakoghana na kudea njama. Nawo wakaghema kamba siwelyighagha ango siwenweghagha hata wamuulaghe Paulo. 13Na koluo na wandu wechumbagha mirongo mine kele njama iyo. 14Nawo wakaghenda kwa wakohani wabwaa na waghosi, wakawauza, “Isi taghema kamba sititowagha kindu chingi hata timuulaghe Paulo. 15Ndamu inyo na Baraza tumeni uvoro kwa mubwaa wa askari wa Roma wamlete Paulo, mkezighirira kamba mwanashaile kumanya kirani malagho ghake, nesi tijemlalila timulaghe hambiri sefikile aha.”

16Ela hakie Paulo kasikila iyo njama, kwa hung'u kaghenda ngomeni kamghorera Paulo. 17Naye Paulo kampang'a mumoju wa askari, kamuza, “Mtwale uyu mtawana kwa mubwaa wa jeshi, uwo na uvoro ghomughorera.” 18Ulya askari kamwata, kamughenza kwa mubwaa wa askari na kumuza, “Ulya mfungo Paulo wanipang'a kanilomba nimlete uyu mtawana kwako kwa kukala uo na ilagho lyekughorera.”

19Mubwaa wa askari kamwata mkonu, kaghenda naye keng'weri, kamukotela, “Nini ushaile kunighorera?” 20Kaghora, “Wayahudi wasikilana kukulomba umughenze Paulo kele Baraza ikesho, wekekudea kamba Baraza yanashaile kumanya malagho ghake kirani. 21Ela swashaye, kwa kukala kuwo na wandu wechumbagha mirongo mine wekuvisagha wamlalile. Nawo wamalila kughema kamba siwelyighagha ango siwenweghagha siwemulaghe. Nawo wakuika kirani na wendedafwa selyi udeagha.” 22Nao mubwaa wa Jeshi kamuza, “Swamughorere mundungi kamba wanighorera agha.” Nao kamsigha ulya mtawana aghende.

Paulo kughenzo kwa Filikisi mubwaa wa isanga

23Nao mubwaa wa Jeshi kawapang'a askari waili kawauza, “Ikeni kirani askari maghana maili waghende Kaisari, ngila mojori na wajoki farasi mirongo mfungate na askari wa machumu maghana maili, na mkale kirani kuuka saa ndatu za kiro. 24Mumupatile Paulo farasi yejoka na mumughenze banana hata kwa Filikisi mubwaa wa isanga ilyi.” 25Nao ulya mubwaa wa Jeshi kawandika barua ighoragha hung'u:

26“Imi Klaudio Lusia nakuwandikila uwe mubwaa Filikisi, Nakuroghowa.

27“Wayahudi wanamwatile mundu uyu na weluo avui kumulagha. Nemi nimanya kamba ni raia wa Roma nikaghenda na askari wangu nikamuvuvula. 28Nemi nikeshaya kumanya ichi wemushitaki nacho? Nikamghenza kele Baraza yawe. 29Nikaona kamba sadeile ikosa lyingi lyimfweni aulagho ango afungo. Agha wemshitaki nagho ni malagho gha Sheria yawe yenyi. 30Nao nighenda nighorero kamba Wayahudi wamoju wadea njama iwase ighulu yake. Nikaona nimlete kwako. Nemi nikawauza awa wemshitaki weje kwako waghore hambiri yako mashitaki ghawe.”

31Askari wakadea selyi kwenyi wauzilo. Wakamwata Paulo wakamghenza hata Antipatri chilya kiro chenyi. 32Nao ilyo ikesho lyake askari wa maghulu wakawuya ngomeni, wakawasigha askari wa farasi wamghenze. 33Wakamghenza hata Kaisari, wakahawana barua kwa mubwaa, na wakamsigha Paulo mikonuni kwake. 34Na ulya mubwaa aishoma ilya barua, kamkotela Paulo ni isanga muni afuma. Naye aghenda kumanya kamba wanafumile Kilikia, 35kaghora, “Nikusikizilagha ilyi walye wandu wekushitakighi weja.” Naye kaghora Paulo alindo kirani kele nyumba ya Herode.

Currently Selected:

Madeo 23: SAGALLANT

Highlight

Copy