Madeo 24

Paulo kushitakio ni Wayahudi

1Nao nyuma ya majua masanu, Mkohani Mubwaa Anania, kaghenda Kaisari ngila mojori na waghosi na wakili aitogho Tertulo. Wakakala hambiri ya Mubwaa Filikisi na wakamshitakia Paulo. 2Nao Paulo kapang'o, naye Tertulo kadyowa kumushitakia Paulo hung'u:

“Uwe uhawogho ishima Filikisi! Ulongozi ghwako ghwatiletela ngelo ndele ya sere na malagho mengi ghaghaluka ghakala ghaloli kele isanga lyetu. 3Nesi tahokera agha kila andu na ngelo zose na takufunyila asanta mbwaa. 4Sishaile kungi kuusa ngelo yako ndele, elaima nakulomba ukale na ngolo yesikizila malagho ghetu machache. 5Tanamwonile mundu uyu kukala ni wa ndengwa na ni mudyoi zuhe ghati ya Wayahudi urumengu ghose naye ni Kilongozi wa chama cha Wanazareti. 6Hata wanatimile kuluwisa Hekalu, ela tikamwata. [Teshaile kumutaghanya kwa Sheria yetu, 7ela mubwaa wa askari Lisia keja kwa ndighi kamusa kufuma kwetu. 8Nao Lisia kaghora awa weo na ilagho lyemshitaki weje hambiri yako.] Nawe ilyi wamkotela uyu mundu, uwe mwenyi umanyagha agha ghose timshitaki nagho.” 9Wayahudi nawose wakadumusilana na mashitaki agha, wakaghamba ni gha fulo.

Paulo kukutetela hambiri ya Filikisi

10Nao ulya mubwaa kamukunyiria Paulo eri aghore. Naye kaghora, “Namanya wakala mtaghanyi wa mbari iyi kwa miaka mingi na kwa hung'u nio na maboelo kukutetela imi mwenyi hambiri yako. 11Selyi umanyagha sighaketi majua gheitagha ikumi na maili kufuma naghenda Jerusalemu kutasa. 12Hata Wayahudi siwanidokile nikeheleanya na mundungi Hekaluni ango siwanidokile nikekumba sheshe wandu kele sinagogi ango andu kungi kele muzi. 13Hata siwedimagha kughora karakara agha malagho wenishitaki nagho. 14Ela nadumusa kamba nanamtasagha Mlungu wa wana ake, kwa kuirima ngila iyo weghoragha ni ya ndimi na sheshe. Sena nadumusa malagho ghose ghawandiko kele Sheria ya Musa na kele vuo va wana tondolo. 15Nio na ikosereo kwa Mlungu ilyo lyenyi weo nalyo, kamba wandu wose waloli na wawase wezukagha kufuma kwa wafwa. 16Kwa hung'u natima kila ngelo kuelesa ngolo yangu hambiri ya Mlungu na wandu.

17“Nyuma ya kukala kulele na Jerusalemu, kwa miaka mingi, neghendile alye nikewatwalila wandu uwaruri na kufunya sadaka. 18Ni ngelo neluo nikedea hung'u wanidokile Hekaluni, namalila putu kufunya sadaka yekukuelesa. Hata sekezanye na ikoghano ango zuhe ingi. 19Ela Wayahudi wa kufuma Asia weluo awenyi, na awa macho nio weo hambiri yako kughora ulaghelaghe ghwangu ngera weo na ilagho lyingi nemi. 20Ango awa wandu waghore ikosa waonile kwangu ngelo neluo hambiri ya Baraza. 21Sala kindu kimojori nighorire hambiri yawe: ‘Nendetaghanyo lelo kwa kudumusa kamba wafwa wejezuka!’”

22Nao Filikisi, kwa kukala oweni malagho gha ilya Ngila kafunga mlandu, kawauza, “Nijetaghanya malagho agha ilyi mubwaa wa jeshi Lusia eja.” 23Naye kamuza ulya askari eluo kemlinda Paulo amulinde kirani, ela amuhawe ulalo na kuwadumusila wagheni wake wamuhawe vindu eshayagha.

Paulo hambiri ya Filikisi na Drusila

24Nao nyuma ya majua machache Filikisi keja na mkwake Drusila eluo Myahudi. Naye katumana Paulo aleto na wamusikizile kehelea malagho gha idumusi lya Kristo Jesu. 25Ela ilyi Paulo eluo kehelea ighulu ya uhachi, kukumanzira, na ighulu ya kuja ijua lya kutaghanyo, Filikisi kangilo ni wogha, kamuza, “Wadima kughenda ndamu, Nikupang'agha sena ilyi napata ulalo.” 26Naye oluo kekoserea kamba Paulo umuhawagha pesa, kwa hung'u kampang'a mandu mengi kahelea naye. 27Nao miaka mili idua Parkio Festo kausa ulalo ghwa Filikisi ghwa ubwaa. Naye Filikisi kwa kushaya kushayo ni Wayahudi kamusigha Paulo kifungoni.

Currently Selected:

Madeo 24: SAGALLANT

Highlight

Copy