Johana 17

Jesu kulombela wairimi wake

1Nao Jesu aghenda kughora hung'u, kalola mlunguni, kaghamba, “Aba ngelo yafika, umulike Mwana wako eri Mwana naese akulike, 2kwani wanamuhawile ndighi ighulu ya wandu wose, eri awahawe umana ghwa kale na kale wose umuhawile. 3Nagho ughu nigho umana ghwa kale na kale, kamba wakumanye uwe Mlungu mumojori wa Fulo na Jesu Kristo uyu umutumile. 4Nakulika aha msangeni, kwa kuimalila kazi unihawile kudea. 5Na ndamu, Aba, unilike imi andu uwo, kwa ubwaa ghulya ghwenyi neluo nagho nawe hambiri ya kuumbo urumengu.

6“Imi nakudea umanyo ni wandu unihawile kufuma urumenguni; weluo wako na kwanihawa imi, nawo wawata ghore yako. 7Na ndamu wamanya kamba kila kindu unihawile chanafumile kwako. 8Kwani imi nanawahawile ghore unihawile, nawo wakaihokera na kumanya fulo kwenyi kamba nanafumile kwako; wakadumusa kamba nuwe unitumile.

9“Nawalombela awo; sighulombelagha urumengu kungi, sala awo unihawile, kwani niwo wako. 10Wose nio nawo ni wako, na wose uwo nawo ni wangu. Nemi naliko kwa undu ghwawe. 11Na ndamu sio urumenguni, ela wo nawasigha urumenguni, nemi nendeja kwako. Aba wa Kuela, uwalinde kwa ndighi za izina lyako ilyi unihawile, eri wakale na umojori selyi tio na umojori. 12Ilyi neluo nawo; newalindile kwa ndighi za izina lyako ilyi unihawile. Nanawalindile hata ungi salaghaye sala ulya mundu wa kulaghaya, eri Mawandiko gha Kuela ghakatile. 13Ela ndamu nendeja kwako; na naghora malagho agha urumenguni, eri wakale na maboelo ghangu ghaketi ngoloni kwawe. 14Nanawahawile ghore yako, nao urumengu ghukawamenya kwa kukala wo si wa urumengu ghungi, selyi imi niseo wa urumengu. 15Sikulombagha uwafunye urumenguni, ela uwalinde na ulya Mlaghelaghe. 16Wo si wa urumengu wengi, selyi imi niseo wa urumengu. 17Waelese kwa fulo yako, ghore yako niyo fulo. 18Selyi kwenyi unitumile urumenguni, namose nawatuma urumenguni. 19Na kwa undu ghwawe, imi nakuelesa, kamba nawose wapate kueleso kele fulo.

20“Siwalombelagha awa keng'ori, ela na awo wose wenidumusagha kwa undu ghwa ghore zawe. 21Kamba wose wakale na umojori, selyi uwe Aba, uwo amweni kwangu, nemi amweni kwako, kamba nawose wakale amweni kwetu, eri urumengu ghudumuse kamba nuwe unitumile. 22Nawahawa ubwaa ughu unihawile, eri wakale na umojori, selyi uwe nemi tio na umojori. 23Imi amweni kwawe, Newe amweni kwangu, eri wakale na umojori kamare, eri urumengu ghumanye kamba nuwe unitumile na kamba wanawashaile selyi unishaile imi.

24“Aba! Nanashaile kamba awa nawose unihawile wakale nemi andu nikalagha, kamba waone ubwaa ghwangu ughu unihawile; kwani onishaile hambiri ya kuumbo urumengu. 25Aba wa Hachi, urumengu sighukuweni, ela imi nanakuweni, na awa wanaweni kamba wananitumile. 26Nanadeile izina lyako lyimanyikane kwawe na nijelyidea lyimanyike, eri mashayo unishaile nagho ghakale amweni kwawe, nemi nikale amweni kwawe.”

Currently Selected:

Johana 17: SAGALLANT

Highlight

Copy