Johana 18

Kuwato kwa Jesu

(Matayo 26:47-56; Marko 14:43-50; Luka 22:47-53)

1Nao Jesu amalila kughora agha malombi, kaghendanya na wairimi wake, chambuko cha mweta ghwa Kidroni andu koluo na mughunda, naye kangila alye na wairimi wake. 2Naye Juda uyu amfunyile oweni andu alye, kwa kukala ngelo nyingi Jesu woluo akoghana na wairimi wake alye. 3Nao Juda keja mughundeni ngila mojori na askari wa Kiroma na warindiri kufuma kwa Wakohani Wabwaa na Wafarisayo, nawo weluo na taa na vilimiko na mata. 4Naye Jesu kemanya ghose ghempatagha, kawasughutila, kawauza, “Nani mumuhadagha?” 5Wakatumbulila, “Jesu wa Nazareti.” Jesu kawauza, “Nimi mwenyi.” Naye Juda uyu amufunyile oluo kimusi nawo. 6Naye Jesu aghenda awauza, “Nimi mwenyi,” wakauya kinyume-nyume wakagwa msangeni. 7Nao Jesu kawakotela sena, “Nani mumuhadagha?” Nawo wakamuza, “Jesu wa Nazareti.” 8Jesu kawatumbulila, “Ghamba namuza kamba nimi mwenyi. Kwa hung'u ikakala nimi munihadagha, sigheni awa waghende ngila zawe.”

9Oghorire hung'u eri ghakatile ghalye eghorire, “Walye unihawile sihaitise hata mumojori.” 10Simoni Petro oluo na lufu, kalufunya kamtema nalo mtumishi wa Mkohani mubwaa, kampasa kisikilo cha kijo. Na izina lya uyu mtumishi ni Maliko. 11Jesu kamuza Petro, “Uja lufu lwako kele jowa. Ado nisanwe kikombe chesirima ichi nahawo ni Aba?”

Jesu hambiri ya Anasi

12Nao askari wa Kiroma, na mubwaa wawe, na warindiri wa Wayahudi wakamwata Jesu, wakamfunga. 13Wakamughenza kwa Anasi jako; kwani Anasi oluo ni mghosi wa Kayafa, uyu eluo Mkohani Mubwaa ghulya mwaka. 14Naye oluo ni Kayafa awahawile Wayahudi njama kamba ni bora mundu mumojori afwe kwa undu ghwa wandu.

Petro kumkana Jesu

(Matayo 26:69-70; Marko 14:66-68; Luka 22:55-57)

15Simoni Petro ngila mojori na mwirimi mumoju wakamwirima Jesu. Ulya mwirimi mumoju omanyikane kwa Mkohani Mubwaa, kwa hung'u kangilanya na Jesu kele baraza ya Mkohani Mubwaa, 16ela Petro kakala shighati ya mjango. Kwa hung'u ulya mwirimi emanyikane kwa Mkohani Mubwaa kafuma kahelea na mchana eluo kelinda mjango kamungiza Petro. 17Ulya mchana eluo kelinda mjango kamuza Petro, “Ado nawose soluo mwirimi wa uyu mundu?” Katumbulila, “Hata simungi.”

18Nawo watumishi na warindiri wekozile moto ghwa makala kwa kukala koluo na mbeo, nawo weluo kimusi wekebughawa. Petro naese oluo kimusi ngila mojori nawo kebughawa.

Mkohani Mubwaa kumkotela Jesu makotelo

(Matayo 26:59-66; Marko 14:55-64; Luka 22:66-71)

19Nao Mkohani Mubwaa kamkotela Jesu malagho gha wairimi wake na ighulu ya mafundiso ghake. 20Jesu kamtumbulila, “Nanaghoragha mwazi mwazi kwa wandu wose. Nanafundisagha kele sinagogi na Hekalu andu Wayahudi wose wakoghanilagha. Sighoragha kindu chingi kivisoni. 21Kudani unikotelagha? Wakotele awa wanisikizile. Wakoteleni selyi niwauzile, wanaweni selyi nighorire.”

22Naye aghenda aghora hung'u, mrindiri mumoju eluo kimusi kamubahala Jesu na lui kamuza, “Hung'u niko umutumbulilagha Mkohani Mubwaa?” 23Jesu kamtumbulila “Ngera naghora laghelaghe ghora ugho ulaghelaghe, ela ngera naghora kirani kudani unibahalagha?” 24Nao Anasi kamghenza afungilo kwa Mkohani Mubwaa Kayafa.

Petro Kumkana Jesu sena

(Matayo 26:71-75; Marko 14:69-72; Luka 22:58-62)

25Naye Simoni Petro oluo kimusi kebughawa moto, Nao wakamkotela, “Ado nawose suwe mwirimi wake ulya mundu?” Naye kakana kaghora, “Simi ungi.” 26Mumoju wa watumishi wa Mkohani Mubwaa, eluo kichuku cha ulya mundu apasilo kisikilo ni Petro, kaghora, “Ado sikuonile alye mughundeni ngila mojori naye?” 27Nao Petro kakana sena, na jongole ikateta.

Jesu kughenzo hambiri ya Pilato

(Matayo 27:1-2,11-14; Marko 15:1-5; Luka 23:1-5)

28Nao naikesho kiro wakamfunya Jesu kwa Kayafa, wakamughenza ikulu. Nawo Wayahudi siwangilile ikulu, kungi, wekeogha kukuluisa kwa kuilya Pasaka. 29Nao Pilato kafuma shighati kawakotela, “Mwamushitakia ije uyu mundu?” 30Wakamtumbulila, “Ngera uyu mundu seluo mkosa, macho sitemletile kwako.” 31Pilato kawauza, “Museni mumutaghanye kwa sheria yenyu.” Wayahudi wakamuza, “Isi sitidumusilogho kutaghanya mundu kufwa.” 32Agha ghanadeike eri ghakatile malagho aghorire Jesu kuonyeza kifwa ejefwa.

33Nao Pilato kangila sena ikulu kampang'a Jesu kamuza, “Uwe nuwe Mzuri wa Wayahudi?” 34Jesu kamtumbulila, “Waghora agha uwe mwenyi ango ni wandu wazima wakughorera ghangu?” 35Pilato katumbulila, “Ado imi nimi Myahudi? Mbari yako na Wakohani Wabwaa niwo wakuleta kwangu, wanadeile ije?”

36Jesu kamtumbulila, “Uzuri ghwangu si ghwa urumengu ughu kungi, ngera uzuri ghwangu gholuo ghwa urumengu ughu, macho watumishi wangu walwana nisangizo kele mikonu ya vilongozi va Wayahudi. Ela Uzuri ghwangu si ghwa urumengu kungi.” 37Nao Pilato kamkotela, “Ndamu nuwe Mzuri ba?” Jesu kamtumbulila, “Uwe waghora kamba imi nimi Mzuri. Imi nanavelo kwa undu ughu na kwa undu ughu, nanajile urumenguni kushuhudia fulo, na uwo wose ewo wa fulo, wanasikilagha lwaka lwangu.” 38Pilato kamuza, “Fulo nini?”

Jesu kutaghanyo kufwa

(Matayo 27:15-31; Marko 15:6-20; Luka 23:13-25)

Nao Pilato aghenda aghora hung'u, kafuma shighati kwa Wayahudi, kawauza, “Imi sionagha ikosa lyingi kwake. 39Ela muo na ada nimufungulile mfungo mumojori ngelo ya Pasaka. Ndamu mwanashaile nimufungulile Mzuri wa Wayahudi?” 40Nao wakakema sena, “Hata! Uyu mbai. Tanamushaile Baraba!” Naye Baraba oluo mvekuri.

Currently Selected:

Johana 18: SAGALLANT

Highlight

Copy