Luka 3

Machilo gha Johana Mubatizi

(Matayo 3:1-12; Marko 1:1-8; Johana 1:19-28)

1Nao kele mwaka ghwa ikumi na sanu ghwa kutawala kwa Kaisari Tiberia, Pontio Pilato woluo ketawala Judea, naye Herode woluo mzuri wa Galilaya na Filipo wakwawe oluo mzuri wa Iturea na Trakoniti, na Lusanio woluo ketawala Abilene, 2ngelo Anasi na Kayafa weluo wakohani wabwaa. Ilagho lya Mlungu lyikamujila Johana mwana wa Zakaria kireti; 3naye kaghenda isanga lyose lyeluo mbalimbali ya mweta ghwa Jordani, kechila kamba ni suti wandu warihe kaung'a na kubatizo eri Mlungu awafwile waya. 4Selyi iwandiko kele chuo cha tondolo Isaya:

“Lwaka lwa mundu mumoju ekemagha kireti:

‘Boeseni ngila kwa undu ghwa Bwana;

ghororeni ngila kwa undu ghwake.

5Kila shambi ijejuzo,

na kila lughongo na mghondi ghujekataniso,

na ngila igomeke ijeghororo,

na ngila ziwase zijetendereso.

6Na wandu wose wejeona ukizi ghwa Mlungu!’”

7Makoghano gha wandu ghakamjila Johana awabatize, naye kawauza, “Inyo kivali cha nyoka! Nani amuonyile, kamba mwadima kukimbila hare ikujagha? 8Onyezeni kwa madeo kuriha kwenyu, na simwaghambe ngoloni, ‘Tio na aba Abrahamu’ kwani namuza, Mlungu wadima kele agha mawe kumupatila Abrahamu wana. 9Hata; indakwenyi isoka lyaiko kele kirimba cha mwiti; eri mwiti ugho ghose sighovalagha mavalo ghutemo na kukumbo motoni.”

10Nao makoghano wakamkotela, “Ndamu tideagha ije?” 11Naye kawatumbulila, “Uyu ewo na nguo mbili amusarire uyu sewesi na uyu ewo na chakulya naese adee ukwenyi.” 12Nao watozi kodi nawose wekeja kubatizo, nawo wakamkotela, “Mwalimu, isi tideagha ije?” 13Naye kawauza, “Simwatoze kuisa chilya kipimo chiikilo.” 14Na askari nawose wakamkotela, “Na isi tideagha ije?” Naye kawauza, “Simwamwiwile mundungi kwa ndighi ango kwa kuzighirira, na mukato ni mafungu ghenyu.”

15Na kwa kukala wandu weluo wekekoserea na wekeririkanya ngoloni kwawe kamba Johana niye Masihi. 16Johana kawauza wose, “Imi namubatiza kwa meji, ela ukujagha mumoju mubwaa kuniisa imi, hata sifweni kufungula vilatu vake. Iye ujemubatiza kwa Roho wa Kuela na moto. 17Naye uwo na kindu chekwita viro kele mkonu, kukwita viro vake, na ukoghanyagha ngano yake kele kitundu, ela visusi uviishagha na moto sighozimikagha.”

18Kwa ngila iyi na kwa malagho mazima mengi, kawachilila wandu Ilagho Lyaloli. 19Ela mzuri Herode uyu eonyilo ni Johana kwa kumusa Herodia muke wa wakwawe na kwa malagho mazima ghawase eluo kedea, 20kajuzila ughu ulaghelaghe ghose kwa kumungiza Johana kifungoni.

Kubatizo kwa Jesu

(Matayo 3:13-17; Marko 1:9-11)

21Nao wandu wose waghenda wabatizo, Jesu naese kabatizo. Naye ilyi eluo kelomba, mlunguni kukafunguka, 22na Roho wa Kuela kamselelela ewo na muli sa iringo lya kishalai, na lwaka lukafuma mlunguni, “Uwe ni mwanwangu nikushaile, Niboelo nuwe.”

Kivali cha Jesu Kristo

(Matayo 1:1-17)

23Naye Jesu kedyowa kazi yake oluo na miaka mirongo mitatu, wandu weluo wekeririkanya kamba ni mwana wa Josefu, mwana wa Heli, 24mwana wa Mathati, mwana wa Lawi, mwana wa Melki, mwana wa Janai, mwana wa Josefu, 25mwana wa Matathia, mwana wa Amosi, mwana wa Nahumu, mwana wa Hesli, mwana wa Nagai, 26mwana wa Maathi, mwana wa Matathia, mwana wa Shemeni, mwana wa Josefu, mwana wa Juda, 27mwana wa Johanani, mwana wa Resa, mwana wa Zerubabeli, mwana wa Shealtieli, mwana wa Neri, 28mwana wa Melki, mwana wa Adi, mwana wa Kosamu, mwana wa Elmodamu, mwana wa Eri, 29mwana wa Joshua, mwana wa Eliezeri, mwana wa Jorimu, mwana wa Mathati, mwana wa Lawi, 30mwana wa Simeoni, mwana wa Juda, mwana wa Josefu, mwana wa Jonamu, mwana wa Eliakimu, 31mwana wa Melea, mwana wa Mena, mwana wa Matatha, mwana wa Nathani, mwana wa Daudi, 32Mwana wa Jese, mwana wa Obedi, mwana wa Boazi, mwana wa Shela, mwana wa Nashoni, 33mwana wa Aminadabu, mwana wa Adimini, mwana wa Arni, mwana wa Hezroni, mwana wa Perezi, mwana wa Juda, 34mwana wa Jakobo, mwana wa Isaki, mwana wa Abrahamu, mwana wa Tera, mwana wa Nahori, 35mwana wa Serugi, mwana wa Reu, mwana wa Pelegi, mwana wa Eberi, mwana wa Shela, 36mwana wa Kainani, mwana wa Arfoksadi, mwana wa Shemu, mwana wa Noa, mwana wa Lameki, 37mwana wa Mathushela, mwana wa Enoko, mwana wa Jaredi, mwana wa Mahalaleli, mwana wa Kainani, 38mwana wa Enosi, mwana wa Sethi, mwana wa Adamu, mwana wa Mlungu.

Currently Selected:

Luka 3: SAGALLANT

Highlight

Copy