Luka 4

Kutimo kwa Jesu

(Matayo 4:1-11; Marko 1:12-13)

1Nao Jesu kejulo ni Roho wa Kuela, kauya kufuma mweta ghwa Jordani. Kalongozo ni Roho 2kireti majua mirongo mine ketimo ni Shetani. Naye seluo kelya kindu chingi majua ghalye ghose. Nagho ghaghenda ghadua, kashaho ni njala. 3Shetani kamuza, “Ngera uwe nuwe Mwana wa Mlungu, Uza iwe ilyi lyiuye mkate.” 4Nao Jesu kamuza, “Yanawandiko, ‘Mdamu sekalagha moyo kwa mkate ghwenyi anduangi.’”

5Nao Shetani kamtwala hata andu kwa ighulu na kamwonyeza mauzuri ghose gha urumengu kwa ngelo njache, 6naye kamuza, “Nikuhawagha udimo ighulu ya mauzuri agha ghose na ubwaa ghwake,” kwani “Nanamalile kuhawo, nemi namhawa kila mundu namshaya. 7Kwa hung'u, ilyi wanitasa, ivi vose vijekala vako.” 8Jesu kamtumbulila, “Yanawandiko, ‘Umtase Bwana Mlungu wako na umutumikile iye mwenyi keng'weri!’”

9Nao Shetani kamghenza Jerusalemu, na kamwika kele kijungulila cha hekalu na kamuza, “Ngera nuwe Mwana wa Mlungu, kubudule msangeni kufuma aha; 10Kwani yanawandiko, ‘Mlungu utumagha wana malaika wake wakulinde.’ 11Na, ‘kele mikonu yawe wekuwatagha, eri swadaho hata kighulu chako ni iwe.’”

12Nao Jesu kamtumbulila, “Yanawandiko, ‘Swamutime Bwana Mlungu wako!’”

13Nao Shetani amalila kumutima kamusigha kwa ngelo.

Jesu kudyowa kazi yake Galilaya

(Matayo 4:12-17; Marko 1:14-15)

14Nao Jesu kauya Galilaya ajulo ni ndighi za Roho wa Kuela. Na uvoro ghwake ghukaera isanga lyilya lyose. 15Naye kafundisa kele Sinagogi zawe, kekumo ni wandu wose.

Jesu kulegho Nazareti

(Matayo 13:53-58; Marko 6:1-6)

16Nao Jesu kaghenda Nazareti andu azeguile. Kangila kele Sinagogi selyi yeluo ada yake ijua lya Sabato. Kakala kimusi kushoma. 17Kahawo chuo cha tondolo Isaya, kachifungula na kaona andu kuwandiko,

18“Roho wa Bwana uwo ighulu yangu,

kwa kukala wanisaghula

kuchilila wakiwa Ilagho Lyaloli.

Wanituma kuwaghorera awa wafungilo kufungulo kwawe,

na kuwafungula meso awa siwewonagha,

na kuwasighilila awa wesirimagha;

19na kueresa mwaka Bwana ekizagha wandu wake.”

20Nao Jesu kafunga chuo, kamhawa mtumishi, na kakala kitembo; na wandu wose weluo kele Sinagogi wakamkulila meso. 21Naye kawauza, “Lelo Mawandiko agha gha Kuela ghakatiso kwenyu.” 22Nao wose wakaboelo niye na kushiniso ni malagho ghaloli eluo keghora; Wakaghamba, “Ado uyu si mwana wa Josefu?”

23Naye kawauza, “Namanya munihawagha ikataniso ilyi, ‘Mghanga, kuboese uwe mwenyi.’ Malagho agha tisikile ughadeile Kapernaumu ghadee aha kele muzi ghwako.” 24Naye kawauza, Fulo namuza, tondolo salikogho kele muzi ghwake ghwenyi. 25“Ela sikizileni, koluo na wake wengi wafwililo ni walume wawe kele isanga lya Israeli majua gha Elija, ilyi mvula yesoweke kwa miaka mitatu na mezi mitandatu, ngelo koluo na njala mbwaa isanga lyose. 26Elija satumilo kwa ungi wawe sala kwa muke efwililo ni mlume wa Sarepta kele isanga lya Sidoni. 27Na sena koluo na wandu wa ukoma wengi kele Israeli ngelo ya tondolo Elisha na sikwesi ungi wawe aombocholo sala Naamani mundu wa Siria.” 28Nawo waghenda wasikila agha malagho, wandu wose weluo kele Sinagogi wakajoko ni hare. 29Wakauka wakamufunya shighati ya muzi, wakamghenza ighulu ya mghondi ghwa muzi, eri wamubudule ighambeni. 30Ela iye kaita ghati yawe kaghenda ngila zake.

Mundu eluo na pepo

(Marko 1:21-28)

31Nao Jesu kaghenda Kapernaumu muzi ghumoju ghwa Galilaya, kufundisa wandu ijua lya Sabato. 32Na wose wakashiniso ni mafundiso ghake, kwani ghore yake yeluo na udimo. 33Na kele Sinagogi koluo na mundu mumoju eluo na pepo iwase, kakema na lwaka lubwaa, “Ee Jesu wa Nazareti, udeani nesi? Ondeja kutihaitisaba? 34Nakumanya kamba nuwe mweli wa Mlungu!” 35Ela Jesu kamkemela kemuza, “Nyamala, na umufume!” Nao pepo ikamgwisha msangeni alye ghati, ikamfuma siyemushoghonole. 36Wandu wose weluo alye wakashinika wakaghamba wenyi, “Ni malagho muni agha? Kwa udimo na ndighi waziuza pepo ziwase zifume, nazo zafuma.” 37Nao, uvoro ughu ghukaera andu kose kele lyilya isanga.

Jesu kuboesa wandu wengi

(Matayo 8:14-17; Marko 1:29-34)

38Nao Jesu kafuma kele sinagogi kaghenda kangila nyumba kwa Simoni. Naye mkekulu wa Simoni woluo mkongo wa msuko, nawo wakamlomba Jesu amuboese. 39Naye kaghenda kakala kimusi avui na ulili ghwake na kughukemela msuko, nagho ghukamusigha; kauka iyo ngelo yenyi kawatumikila. 40Nao ijua lyikemalika, wose weluo na wandu wawe wakongo wa makongo mazimamazima wakawaleta kwake, naye kawaikilila mikonu yake kaboesa wose. 41Na pepo nazose zikafuma zikekema, “Nuwe Mwana wa Mlungu,” Ela Jesu kazikemela na sadumusile zighore, kwa kukala zemweni kukala niye Masihi.

Jesu kuchila kele Sinagogi za Judea

(Marko 1:35-39)

42Nao kughenda kuela, Jesu kafuma kaghenda andu kwa chanya. Na wandu wakamhada, na waghenda wamwona wakamlomba sawasighe. 43Ela iye kawauza, “Ni suti nichile Ilagho Lyaloli lya Uzuri ghwa Mlungu kele mizi mizima nayose, kwani nanatumilo kwa undu ugho.” 44Naye kachila kele sinagogi za Judea.

Currently Selected:

Luka 4: SAGALLANT

Highlight

Copy