Luka 5

Jesu kupang'a wairimi wake wa hambiri wamwirime

(Matayo 4:18-22; Marko 1:16-20)

1Nao ijua imoju ilyi Jesu eluo kimusi mbalimbali ya bahari ya Genesareti, na wandu wekemtindirira kusikizila ilagho lya Mlungu. 2Kaona mashua mbili baharini na wawati makumba wafuma wendeoghesha nyavu zawe. 3Jesu kangila kele mashua moju, yeluo ya Simoni, kamulomba aisughuse mbali kuchache na isanga. Naye kakala kitembo na kufundisa wandu kufuma kele mashua. 4Naye amalila kughora, kamuza Simoni, “Sughusa mashua andu kumalike na museleze nyavu zenyu muwate makumba.” 5Naye Simoni kamutumbulila, “Bwana tanadeile kazi kiro chee na sitiwatile kindu chingi. Ela kwa ghore yako niselezagha nyavu.” 6Nao waghenda wadea hung'o, wakawata makumba mengi hata nyavu zawe zikashaya kuzaika. 7Wakawakunyira wambawe weluo kele mashua ilya moju weje wawawarure. Nawo wekeja wakajuza mashua zose mbili, hata zikadyowa kumalika. 8Nao Simoni Petro aghenda aona agha, kadyaya ngokoro kwa Jesu keghamba “Uka kwangu, Ee Bwana, kwani imi ni mundu wa kaung'a.” 9Kwani iye na walye wose wekezanye weshiniso ni ungi ghwa makumba wawatile. 10Na yeluo hung'u kwenyi kwa Jakobo na Johana wana wa Zebedayo, awa weluo wa ngaro na Simoni. Nao Jesu kamuza Simoni, “Swadee wogha, kwani kufuma indakwenyi ujekala muwati wandu.” 11Nawo waghenda waleta mashua zawe kele isanga, wakasigha vindu vose wakamwirima.

Jesu kuboesa mundu wa ukoma

(Matayo 8:1-4; Marko 1:40-45)

12Nao ilyi Jesu eluo kele muzi ghumoju, kajilo ni mundu eluo na ukongo ghwa ukoma. Naye aghenda amwona Jesu kamugwila hubu, kemulomba, “Bwana kwashaya, wadima kuniombochola.”

13Naye Jesu kaghorora mkonu ghwake kamwata, keghamba, “Nashaya uombochoke.” Nao iyo ngelo yenyi ukoma ghukamusigha. 14Naye Jesu kamuza, “Swamghorere mundungi; ela ghenda ukuonyeza uwe mwenyi kwa mkohani na ufunye sadaka ya kuombocholo kwako selyi Musa aghorire, eri wandu wamanye waboa.”

15Ela uvoro ghwa Jesu ghukaera andu kose na makoghano gha wandu wakamjila kumsikizila na kuboeso manyongi ghawe. 16Ela iye kaghenda andu kwa chanya kulomba.

Jesu kuboesa mundu wa kupooza

(Matayo 9:1-8; Marko 2:1-12)

17Nao ijua imoju ilyi Jesu eluo kefundisa, Wafarisayo na walimu wa Sheria weluo kitembo, nawo wefumile kele kila muzi ghwa Galilaya na Judea na Jerusalemu. Na ndighi za Bwana zeluo na Jesu kuboesa wakongo. 18Nao wekeja wandu wekemtuka mundu mkongo wa kupooza kele ulili, nawo wakatima kumungiza eri wamwike hambiri ya Jesu. 19Ela wasowa ngila yemungiza kwa undu ghwa makoghano, wakamujosa ighulu ya nyumba wakafuchula vigae, na wakamuseleza na ulili ghwake kwa ilanga hata hambiri ya Jesu. 20Nao Jesu aghenda aona idumusi lyawe, kamuza ulya mundu, “Ee mundu wa wandu, kaung'a zako zafwilo waya.”

21Nao walimu wa Sheria na Wafarisayo wakadyowa kuuzana, “Ni mundu muni uyu emutukanagha Mlungu? Nani edimagha kufwila waya kaung'a sala Mlungu?” 22Ela Jesu kamanya maririkanyo ghawe, kawatumbulila, “Kudani mwaririkanya hung'o ngoloni kwenyu? 23Ni lyio lyiwanguwe, kughora, ‘kaung'a zako zafwilo waya;’ ango kughora, ‘Uka ughende?’ 24Ela eri mumanye kamba Mwana wa Mdamu uwo na ndighi urumenguni kusigha kaung'a,” kamuza mundu wa ukongo ghwa kupooza, “Nakuza uka utuke ulili ghwako ughende nyumba kwako.” 25Nao iyo ngelo yenyi ulya mundu kauka hambiri yawe katuka ulili ghwake etungurire kaghenda nyumba kwake kemkasa Mlungu. 26Nao wose wakashinika na kumkasa Mlungu; kwa kungilo ni kiture, wakaghora, “Taona malagho gha mashiniko lelo.”

Jesu kumpang'a Lawi amwirime

(Matayo 9:9-13; Marko 2:13-17)

27Nao nyuma ya agha Jesu kafuma, na kamwona mtozi kodi aitogho Lawi kitembo kele foroza; naye Jesu kamuza, “Niirime.” 28Naye kasigha ghose, kauka na kumwirima. 29Nao Lawi kamdeila Jesu karamu kele nyumba yake, na alye koluo na watozi kodi wengi na wandu wazima. 30Nawo Wafarisayo na walimu wa Sheria wakawanung'unikila wairimi wake wekeghamba, “Kudani mlyighagha na kunwa ngila mojori na watozi kodi na wakaung'a?” 31Nao Jesu kawatumbulila, “Awo weo banana siwashayagha mghanga, sala awo weo wakongo. 32Sijile kuwapang'a wahachi kungi sala wakaung'a eri warihe.”

Ikotelo ighulu ya kufunga kulya

(Matayo 9:14-17; Marko 2:18-22)

33Nao wakamuza Jesu, “Wairimi wa Johana wanafungagha kulya na walombe, na niko kwenyi wadeagha wairimi wa Wafarisayo, ela wairimi wako walya na kunwa.” 34Nao Jesu kawatumbulila, “Ado mwadima kuwadea wagheni wawaliko kele harusi kufunga kulya ngelo wewo na bwana harusi? 35Majua ghekujagha, ngelo bwana harusi afunyo kwawe, aho niko wejefunga kulya.” 36Nao Jesu kawaghorera ikataniso, “Sikwesi mundungi azayagha kiraka kele nguo mbishi na kuchingiza kele nguo ya kale; na ngera adea hung'u, uzayagha nguo mbishi, na kiraka cha nguo mbishi sichifwanane na nguo ya kale. 37Hata mundungi sangizagha divei mbishi kele viriba va kale, ilyi adea hung'u divei mbishi ipayagha viriba, na divei itike na viriba vihakilike. 38Kwa hung'u divei mbishi yangizo kele viriba viishi. 39Sikwesi mundungi anweghagha divei ya kale ashaye mbishi, kwani ughoragha, ya kale ni yaloli.”

Currently Selected:

Luka 5: SAGALLANT

Highlight

Copy