Marko 11

Jesu kungila Jerusalemu na izumo

(Matayo 21:1-11; Luka 19:28-40; Johana 12:12-19)

1Nao waghenda wafika avui na Jerusalemu na Bethfage na Bethania, kele mghondi ghwa Mizeituni, kawatuma wairimi wake waili, 2kawauza, “Ghendeni hata muzi ghwa chambuko, na mkengila, mjeona mwana wa punda afungilo na lyingi sajokilo ni mndungi, mfunguleni mniletele. 3Na ilyi mndungi amkotela, ‘Kudani mdeagha hung'u?’ Muzeni, ‘Bwana wanamshaile’; naye ujemuujisa aha shashowa.”

4Nao wakaghenda wakamdoka mwana wa punda afungilo mjangoni shighati kele barabara, nawo wakamfungula. 5Na walye wandu weluo kimusi alye wakawakotela, “Kudani mumfungulagha mwana wa punda?” 6Nawo wakawaghorera selyi Jesu ewauzile, wakawasigha waghende. 7Nao wakamleta mwana punda kwa Jesu, wakawala nguo zawe ighulu yake, naye Jesu kamjoka. 8Nao wandu wengi wakawala nguo zawe ngileni, na wamoju wakatema manyasi mbweni wakaghawala ngileni. 9Na walye weluo hambiri na walye weluo nanyuma wakazuma, “Hosana! Wabarikio iye ekujagha kwa izina lya Bwana. 10Ghubarikio uzuri ghukujagha kwa aba Daudi! Hosana ya ighulu!”

11Naye Jesu angila Jerusalemu, kaghenda kele hekalu; na aghenda azighana kila kindu, kwa kukala koswele, kaghenda Bethania ngila mojori na wairimi wake ikumi na waili.

Jesu kuwanyiza mtini

(Matayo 21:18-19)

12Nao ilyo ikesho lyake, waghenda weja kufuma Bethania, Jesu oshahilo ni njala. 13Naye kaona mtini gholuo na manyasi kakulele na kaghughendela eri azighane ngera upatagha itunda lyingi. Ela afika, sadokile itunda lyingi sala manyasi, kwani siyeluo ngelo ya kilimo cha mitini kuvala matunda. 14Naye kaghuuza, “Na lyingi mndungi salye matunda ghako sena.” Na wairimi wakasikila agha.

Jesu kungila kele Hekalu

(Matayo 21:12-17; Luka 19:45-48; Johana 2:13-22)

15Nao waghenda wafika Jerusalemu, Jesu kangila kele hekalu, na kudyowa kugusa wandu weluo weketagha na kughula kele hekalu, na kuhuburusa meza za awa weluo wekevunja pesa, na vifumbi va awa weluo weketagha maringo; 16naye kalegha mndungi safume na kindu chingi hekaluni. 17Nao kawafundisa kewauza, “Yanawandiko kele Mawandiko gha Kuela, ‘Nyumba yangu ikalagha nyumba ya kulomba kwa mbari zose.’ Ela inyo mwaidea kukala mbanga ya viting'a.”

18Na wakohani wabwaa na walimu wa sheria wakasikila agha, nawo wakahada ngila yemuulagha. Kwani weluo wekemwogha, kwa kukala makoghano gheshiniso ni mafundiso ghake. 19Nao kughenda kuswa wakafuma kele muzi.

Ifundiso kufuma kwa mtini

(Matayo 21:20-22)

20Nao wekeita alye naikesho, wakaona mtini ghwaoma kufuma koighulu hata miriginga. 21Nao Petro kakumbuka kamuza Jesu, “Lola Bwana! Mtini ughuwanyize ghwaoma.”

22Jesu katumbulila, “Mdumuseni Mlungu. 23Fulo kwenyi namuza, uyu wose eghuuzagha ughu mghondi, ‘Kuka aha na ukumbike baharini,’ naye seo na ngera ingi ngoloni kwake, ela wadumusa putu kamba agha aghora ghekalagha, udeilogho. 24Kwa hung'u namuza, icho chose ulombagha kodumusa andu wapata, upatagha. 25Na ngelo yose muukagha kimusi kulomba, fwileni waya ngera mwo na ilagho lyingi na mndungi, eri Tatio ewo Mlunguni naese amfwile waya makosa ghenyu. [ 26Ela ngera mwalegha kufwila waya, Tatio ewo Mlunguni naese semfwilagha waya makosa ghenyu.]”

Ikotelo ighulu ya udimo ghwa Jesu

(Matayo 21:23-27; Luka 20:1-8)

27Nao wekeja sena Jerusalemu. Naye Jesu ilyi eluo kesela hekaluni, wakohani wabwaa na walimu wa sheria na waghosi wakamjila, 28na kumuza, “Ni kwa nguma yani udeagha agha malagho, ango nani akuhawile nguma yedea agha?”

29Jesu kawauza, “Namose nimkotelagha ikotelo munitumbulile, nao ima nimghorere ni kwa nguma muni nideagha agha malagho. 30Nighorereni: Ado ubatizo ghwa Johana ghwanafumile kwa Mlungu ango kwa wandu?”

31Nao wakatumbulilana wenyi na wenyi, “Tikaghora, ‘Kufuma kwa Mlungu,’ ujetiuza, ‘Kudani ndamu simwomdumusile?’ 32Ela tikaghora, ‘Kwa wadamu. . .’” (Wakawaogha wandu, kwani wandu wose putu wemdumuse Johana kukala tondolo wa fulo.) 33Kwa hung'u wakamtumbulila Jesu, “Sitimanyile kungi.” Naye Jesu kawauza, “Hata imi namose simghoreragha ni kwa nguma muni nideagha agha malagho.”

Currently Selected:

Marko 11: SAGALLANT

Highlight

Copy