Marko 12

Ikataniso lya walimi wa mbuwa ya mizabibu

(Matayo 21:33-46; Luka 20:9-18)

1Nao Jesu kadyowa kughora nawo kwa makataniso: “Nao koluo mundu mumoju eluo na mbuwa awandile mizabibu, naye karigha isanzu yose, na kakota kina cha kindu chekamila zabibu na kawaghala ulingo, ima kaihawana walimi, naye katamba isanga izima. 2Nao ngelo ighenda ifika, katuma mtumishi wake kwa walimi, eri ahawo matunda ghamoju gha mizabibu. 3Walimi wakamwata, wakamkwita na kumgalisa mikonu mituu. 4Nao sena ulya mundu katuma mtumishi mzima, nawo wakamshoghonola chongo na kumfwisha waya. 5Naye kamtuma mzima, nawo wakamuulagha; na hung'u kwenyi kwa wazima wengi, wamoju wakawakwita na wamoju wakawaulagha. 6Naye osighilo na mundu mumojori, mwana wake mshayo, kamtuma kwawe keghamba, ‘Wemhawagha ishima andu ni mwanwangu.’ 7Ela walye walimi wakaghora, ‘Uyu niye mundu wa ufwa, njuuni timuulaghe, eri ufwa ghukale ghwetu!’ 8Nao wakamwata, wakamuulagha na kutagha muli ghwake shighati ya mbuwa ya mizabibu.”

9Jesu kawakotela, “Ndamu mundu wa mbuwa ya mizabibu udeagha ije? Ukujagha na kuwaulagha walimi na kuwahawa walimi wazima ilya mbuwa. 10Ado simshomile agha Mawandiko gha Kuela?

‘Iwe lyileghilo ni wawaghali

lyakala iwe ibwaa lya msingi.

11Bwana niye adeile ilagho ilyi,

nalyo lyakala lya mashiniko mesoni kwetu.’”

12Vilongozi va Wayahudi wakatima kumwata Jesu kwa kukala wemanyile kamba oghorire lyilya ikataniso ighulu yawe, ela wakaogha makoghano. Kwa hung'u wakamsigha, wakaghenda ngila zawe.

Ikotelo ighulu ya kulipa kodi

(Matayo 22:15-22; Luka 20:20-26)

13Nao wakamtumila Jesu Wafarisayo na Waherode wamoju eri wamteghe kwa maghori ghake. 14Nawo wekeja wakamuza, “Mwalimu, tamanya uwe nuwe mundu wa fulo, sutalagha mndungi; kwani sutalagha ubwaa ghwa mndungi, ela wafundisa ngila ya Mlungu kwa fulo. Ndamu tighorere, ado ni karakara kulipa kodi kwa Kaisari ango ije? Tilipe ango sitalipe?” 15Ela Jesu kamanya ngolo zawe kukala za ngila mbili, kawauza, “Kudani mnitimagha? Nileteleni dinari niilole.” 16Nawo wakamletela dinari. Naye kawauza, “Fwana iyi na mawandiko agha ni ghani?” Wakamuza, “Ni va Kaisari.” 17Jesu kawauza, “Mhaweni Kaisari vindu va Kaisari, na Mlungu vindu va Mlungu.” Nawo wakamshinikila.

Ikotelo ighulu ya kuzuka kwa wafwa

(Matayo 22:23-33; Luka 20:27-40)

18Nao Wasadukayo, awa waghoragha sikwesi kuzuka kwa wafwa, wakamjila Jesu, wakamkotela wekeghamba, 19“Mwalimu, Musa wanatiwandikile kamba ilyi mundu afwa na kusigha muke sewesi mwana, wakwawe amuse muke wa wakwawe eri ampatile wakwawe afwile wana. 20Nao koluo na wana wakwetu mfungate; wa hambiri kausa muke, naye kafwa sesighile wana; 21na wa kaili kamusa ulya muke, naye kafwa sesighile wana; na wa katatu naese hung'u kwenyi, 22na wose mfungate siwasighile wana. Nao kudua ulya muke kafwa. 23Ndamu ngelo yezuka, ukalagha muke wa ani? Kwani wose mfungate wemuusile?”

24Jesu kawauza, “Ado aho siko mkoselagha, kwa kulemo ni kumanya Mawandiko gha Kuela na ndighi za Mlungu? 25Kwani ngelo ya wandu kuzuka kufuma kwa wafwa, siwelolagha hata siweusogho, ela wejekala sa wana malaika wa mlunguni. 26Na kwa undu ghwa wafwa kuzukiso, ado simshomile chuo cha Musa andu kuwandiko malagho gha kisekuzi, selyi Mlungu amuuzile, ‘Imi nimi Mlungu wa Abrahamu, na Mlungu wa Isaki, na Mlungu wa Jakobo?’ 27Iye si Mlungu wa wafwile ela ni Mlungu wa awa weo moyo; kwa hung'u muo na makosa.”

Mlomu mubwaa

(Matayo 22:34-40; Luka 10:25-28)

28Nao mumoju wa walimu wa Sheria eluo alye, kawasikila wekedea nganyi wenyi na wenyi. Naye aghenda aona selyi Jesu eluo kewatumbulila Wasadukayo kirani, kamkotela, “Ni mlomu muni ghuo mubwaa ghwa yose?” 29Jesu kamtumbulila, “Ghwa hambiri ni ughu, ‘Sikila, Ee, Israeli, Bwana Mlungu wetu ni iye mwenyi keng'weri Bwana. 30Umshaye Bwana Mlungu wako kwa ngolo yako yose, na kwa roho yako yose, na kwa akili zako zose, na kwa ndighi zako zose.’ 31Na ghwa kaili ni ughu, ‘Umshaye mumbenyu sa uwe mwenyi.’ Sikwesi mlomu ghungi kuisa iyi.”

32Nao mwalimu wa Sheria kaghora, “Mwalimu, waghora fulo kamba Mlungu ni mumojori, na sikwesi mzima, sala iye; 33na kumshaya kwa ngolo yose, na kwa akili zose, na kwa ndighi zose, na kumshaya mumbenyu sa uwe mwenyi, kwanachumbile mafunyo na sadaka zose zeisha.” 34Naye Jesu aona watumbulila kirani, kamuza, “Uwe suo kulele kungi na Uzuri ghwa Mlungu.” Nao kufuma aho mndungi sadimile kumkotela ikotelo lyingi.

Ikotelo ighulu ya Masihi

(Matayo 22:41-46; Luka 20:41-44)

35Nao ilyi Jesu eluo kefundisa hekaluni, kaghamba, “Kudani walimu wa Sheria wauza wandu kamba Masihi ni mwana wa Daudi? 36Naye Daudi mwenyi kelongozo ni Roho wa Kuela wanaghorire:

‘Bwana wanamuuzile Bwana wangu,

Kala kitembo kele mkonu ghwangu ghwa kijo,

hata niwaike wamaiza wako isi ya maghulu ghako.’

37Daudi mwenyi wamwita Bwana; ndamu Masihi wadima ije kukala mwana wake?” Nawo wandu wengi wakamsikizila Jesu kwa kuboelo.

Jesu kuonya ighulu ya walimu wa Sheria

(Matayo 23:1-36; Luka 20:45-47)

38Na kele mafundiso ghake kaghora, “Kulindeni na walimu wa Sheria, awa washayagha kughenda warwara nguo ndele, na kuroghoo ni wandu sokoni, 39na kukalila vifumbi va hambiri kele masinagogi, na ulalo ghwa ishima kele karamu; 40nawo walya vindu va wake wafwililo ni walume na kulomba malombi malele dali; fulo wepatagha kutaghanyo kubwaa.”

Mafunyo gha muke mkiwa

(Luka 21:1-4)

41Nao Jesu kakala kitembo avui ya isanduku lyefunyila pesa za hekalu, kuzighana selyi makoghano weluo wekekumba pesa kele isanduku; wandu wengi weluo wazuri wakakumba pesa nyingi. 42Nao muke mumoju mkiwa afwililo ni mlume keja kakumba vibelele vili va pesa viketi igome. 43Nao kawapang'a wairimi wake kawauza, “Fulo namuza, uyu muke mkiwa afwililo ni mlume wakumba pesa nyingi kuchumba wose wakumba kele isanduku lya pesa. 44Kwani awa wose wafunya zilya zawachumba; ela iye kele ukiwa ghwake wafunya vose ewo navo, vemdea akale moyo.”

Currently Selected:

Marko 12: SAGALLANT

Highlight

Copy