Marko 13

Jesu kuhelea ighulu ya kuhakilo Hekalu

(Matayo 24:1-2; Luka 21:5-6)

1Nao ilyi Jesu eluo kefuma kele hekalu, mwirimi wake mumoju kamuza, “Mwalimu, lola mawe na mawaghali selyi gheo ghaloli?” 2Jesu kamtumbulila, “Ughaonagha mawaghali agha? Sikujesighika iwe lyingi ighulu ya mumbawe silyebudukagha.”

Masirimi na matiriro

(Matayo 24:3-14; Luka 21:7-19)

3Naye Jesu aghenda akala kitembo kele mghondi ghwa Mizeituni kuilola hekalu, Petro, Jakobo, Johana na Andrea wakamkotela weo wenyi, 4“Tighorere agha ghejekala nini, na ni kimuni chikalagha alama ya agha ghose kukala?”

5Nao Jesu kadyowa kuwauza, “Lindeni simwalongozo laghelaghe. 6Wengi wekujagha kwa izina lyangu wekeghamba, ‘Imi nimi Masihi!’ Nawo wejekalila wandu wengi. 7Nenyo mkasikila gha uta na nung'unung'u za uta, simwashinike; agha ni suti ghakale, ela kudua kwenyi kwanakaile. 8Kwani mbari ijelwana na mbari, na uzuri ghujelwana na uzuri. Kujekala na mitetemo ya isanga andu kungi, kujekala na njala; uku niko sa kudyowa lwambo lovala.

9“Ela kulindeni inyo wenyi, kwani mjeghenzo kwa waghosi mtaghanyo, na mjekwito kele masinagogi; na mjeiko kimusi kwa wabwaa wa isanga na wazuri kwa undu ghwangu, eri mpate kuwaghorera Ilagho Lyaloli. 10Nalyo Ilagho Lyaloli ni suti jako lyichililo mbari zose. 11Nenyo ilyi mwawato na kughenzo kele kutaghanyo, simwakusirimise na agho mjeghora, ela ghoreni icho mhawogho iyo ngelo yenyi, kwani sinyo wengi mjeghora, ela Roho wa Kuela. 12Wandu wejefunya wana wakwawe waulagho, na wana aba wejefunya wana wawe, na wana wejewaghaluka wavali wawe na kuwadea waulagho. 13Nenyo mjemenyo ni wandu wose kwa izina lyangu. Naye uyu erumaghiagha hata kudua, ujekila.

Masirimi mabwaa

(Matayo 24:15-28; Luka 21:20-24)

14“Ela ilyi mwaona undu ghuwase ghukekala andu sighwefweni kukala, (uyu eshomagha atambukilo!) kwa hung'u awa weo Judea, wakimbile mghondini, 15uyu ewo ighulu ya nyumba, saselele na kungila nyumba kuusa kindu chingi, 16na mundu ewo mbweni, saghaluke kuusa nguo yake. 17Na ni bugha kwa awa weo na vifu na awa wemamisagha majua agho! 18Lombeni eri sighakale majua gha ishika. 19Kwa kukala majua agho kujekala na masirimi mabwaa, lyingi sigheoneke kufuma Mlungu aumba urumengu hata hung'u, na sena lyingi sighejeoneka. 20Na ngera Bwana sedeile agho majua kukala machache, ni kumacha mndungi sekilagha, ela kwa undu ghwa wasaghulo ewasaghule, kadea majua agho kukala machache.

21“Na ilyi mndungi amuza, ‘Zighana, Masihi uwo aha,’ ango, ‘Zighana, uwo alye,’ simwadumuse. 22Kujeuka Masihi wa ndimi na wana tondolo wa ndimi; nawo wedeagha wana mwakilimbita na mashiniko, eri waembeembe ikadimika wasaghulo wa Mlungu. 23Kwa hung'u kulindeni, kwani namghorera kihambiri.

Kuja kwa Mwana wa Mdamu

(Matayo 24:29-31; Luka 21:25-28)

24“Ela majua agho, nyuma ya agho matiriro, ijua lyikalagha kiza na mwezi sighujefunya mlangazi, 25na ndonde zijepotoka kufuma mlunguni, na ndighi za mlunguni zijenyavurika. 26Nawo wejemwona Mwana wa Mdamu keja maenguni kwa ndighi nyingi na ubwaa. 27Naye ujewatuma malaika kuwakoghanya wasaghulo wa Mlungu kufuma mbembe ine za urumengu. Kufuma andu urumengu ghwaduwila hata andu mlunguni kwaduwila.

Ifundiso kufuma kwa mtini

(Matayo 24:32-35; Luka 21:29-33)

28“Kufundiseni ifundiso kufuma kwa mtini. Ilyi ghwadyowa kurinda na kufunya manyasi, mwamanya kamba vuli iwo avui. 29Kwa hung'u ilyi mwaona agha ghekedeika, manyeni uwo avui, avui mjangoni. 30Fulo namuza, kivali ichi sichiitagha agha ghose sighejile. 31Mlunguni na isanga viitagha, ela malagho ghangu lyingi sigheitagha.

Sikwesi mndungi aweni ijua ango saa

(Matayo 24:36-44)

32“Ela ijua ilyo ango saa iyo, sikwesi ungi eimanyagha, hata wana malaika, hata Mwana, sala Aba mwenyi. 33Kaleni meso, lindeni, kwani simumanyagha ngelo ekujagha. 34Ni karakara na mundu etambagha, keuka kaya kwake wanawasariragha watumishi wake kazi zawe, kila mumoju kazi yake na kumuza mrindiri wa mjango alinde kirani. 35Kwa hung'u lindeni, kwani simumanyile ngelo bwana wa nyumba ewuyagha, ngera ni nahafuka, ango na kiro kibwaa, ango jongole ziketeta, ango na ikesho kiro. 36Eri sejeja kumtukira na amdoke mtungure. 37Na kwa hung'u namuza inyose, ‘Lindeni.’”

Currently Selected:

Marko 13: SAGALLANT

Highlight

Copy