Marko 14

Njama yemuulagha Jesu

(Matayo 26:1-5; Luka 22:1-2; Johana 11:45-53)

1Na yeluo ni majua maili hambiri ya Pasaka na karamu ya mikate siyengizilo chachu. Wakohani wabwaa na walimu wa sheria wakahada ngila yemwata Jesu kwa ulachu wamuulaghe. 2Ela wakaghora, “Siyakale ngelo ya karamu kungi eri wandu siwazuhe.”

Jesu kuvilo mavuta alye Bethania

(Matayo 26:6-13; Johana 12:1-8)

3Jesu oluo Bethania kele nyumba ya Simoni eluo Mkoma. Ilyi Jesu eluo kelya mezeni, muke mumoju keja na chupa ya alabasta ijule marashi gha zoghori mbwaa ghadeilo na nardi yaloli. Naye aghenda aivunja chupa, kamnyinyila marashi chongo. 4Ela wandu wamoju weluo alye wakawasilo, wakaghora wenyi kwa wenyi, “Kudani marashi agha ghehakilogho? 5Ni kumacho marashi agha ghatagho kwa zoghori ichumbagha dinari maghana matatu na pesa zake zikahawo wakiwa.” Nawo wakamnung'unikila ulya muke.

6Ela Jesu kaghora, “Msigheni; kudani mumsirimisagha? Wadea kirani kwangu. 7Kwani wakiwa muo nawo kila ngelo, na ilyi mwashaya mwadima kuwadeila ghaloli, ela imi simkalagha nemi ngelo zose. 8Wadea selyi edimagha; kwani uyu muke wanivila marashi muli ghwangu kughuika kirani hambiri ya kuziko. 9Fulo namuza, andu kose kuchilogho Ilagho Lyaloli urumenguni, agha adea uyu muke naghose ghejeghoro kwa kumkumbuka iye.”

Juda kudumusa kumfunya Jesu

(Matayo 26:14-16; Luka 22:3-6)

10Nao Juda Iskariote, mumoju wa wairimi ikumi na waili, kaghenda kwa Wakohani wabwaa eri amfunye Jesu kwawe. 11Nawo waghenda wasikila hung'u wakaboelo, wakamulaga kamba wemhawagha pesa. Naye kahada ngila yaloli yemfunya.

Jesu kulya chakulya cha Pasaka na wairimi wake

(Matayo 26:17-25; Luka 22:7-14,21-23; Johana 13:21-30)

12Nao ijua lya hambiri lya karamu ya mikate siyengizilo chachu, ngelo yeshinja ng'onzi ya Pasaka, wairimi wa Jesu wakamkotela, “Ni hiyo ushaile tighende tiboese kwa undu ghwako eri ulye chakulya cha Pasaka?” 13Naye Jesu kawatuma wairimi wake waili kewauza, “Ghendeni kele muzi, nenyo mkafika, mkoghanagha na mundu atuka mbuta ya meji, mwirimeni. 14Na andu engilagha, muzeni mundu wa nyumba, ‘Mwalimu ughoragha, Chio hiyo chumba changu cha wagheni andu nilyilagha chakulya cha Pasaka na wairimi wangu?’ 15Naye ujemwonyeza chumba kibwaa cha gorofeni chiboeso na kupango kirani; aho mtiikila kirani chakulya.”

16Nao wairimi wakaghenda hata wakafika kele muzi, wakadoka selyi awauzile, wakaika kirani chakulya cha Pasaka.

17Nao nahafukeni Jesu keja na wairimi ikumi na waili. 18Nawo ilyi weluo mezeni wekelya, Jesu kaghora, “Fulo namuza, mumoju wenyu ujenifunya, naye niye mwenyi elyanyagha nemi.” 19Nao wairimi wakafurusa, wakadyowa kumkotela mumojori mumojori, “Ado nimi?” 20Kawauza, “Ni mumoju wa wairimi ikumi na waili uyu evililagha mkate andu kumojori nemi kele bakuli. 21Mwana wa Mdamu ughendagha kufwa selyi awandikilo, ela ni bugha kwake ulya mundu emfunyagha Mwana wa Mdamu! Yeluo ni baha kwake ngera sevelo!”

Kilalilo cha Bwana

(Matayo 26:26-30; Luka 22:14-20; 1 Wakorintho 11:23-25)

22Nao ilyi weluo wekelya, Jesu kausa mkate, kaghubarikia, kaghuvunja, na kuwahawa wairimi keghamba, “Useni, ughu ni muli ghwangu.” 23Nao kausa kikombe, naye aghenda akasa, kawahawa, na wakanwa wose kufuma kele icho kikombe. 24Naye kawauza, “Iyi ni bighati yangu ya ilagano, itilogho kwa undu ghwa wengi. 25Fulo namuza, sinweghagha sena gha matunda gha mzabibu, hata ijua nijenwa uishi kele uzuri ghwa Mlungu.” 26Nawo waghenda waimba lumbo, wakafuma wakaghenda kele mghondi ghwa Mizeituni.

Jesu kutondola ighulu ya Petro kumkana

(Matayo 26:31-35; Luka 22:31-34; Johana 13:36-38)

27Nao Jesu kawauza wairimi wake, “Inyose mnisighagha; kwani yanawandiko: ‘Nimkwitagha mlisa na ng'onzi zisaghasaghagha.’ 28Ela ilyi nazuka, nimkayayilagha Galilaya.” 29Petro kamuza, “Hata ngera wose wekusighagha, imi sikusighagha.” 30Naye Jesu kamuza, “Fulo nakuza, ichi kiro chenyi, hambiri jongole siyetetile mandu maili, unikanagha mandu matatu.” 31Ela Petro kafunga ndighi, katumbulila, “Hata ilyi yakala ni kufwa na uwe, sikukanagha kungi.” Na wose wakaghora ukwenyi.

Jesu kulomba Gethsemane

(Matayo 26:36-46; Luka 22:39-46)

32Nao wakaghenda andu kuitogho Gethsemane, naye Jesu kawauza wairimi wake, “Kaleni aha ngelo nikelomba.” 33Nao kawatwala Petro na Jakobo na Johana, kadyowa kufurusa na kusirima ngoloni. 34Naye kawauza, “Roho yangu iwo na furuse, hata kufwa; kaleni aha na mcherese.” 35Nao kaghenda hambiri kachache, kakugwisha msangeni na kulomba, ngera idimikagha, iyo ngelo iite kwake. 36Naye kaghora, “Aba, ghose ghadimika kwako uwe, nifunyile kikombe ichi cha matiriro, ela si selyi imi nishaile kungi, ela selyi uwe ushaile.”

37Nao kawuya na kuwadoka watungura, naye kamuza Petro, “Simoni, watungura? Sudimile hata kucheresa kwa saa mojori? 38Lindeni na kulomba eri simwejengila matimoni; roho yanashaile, ela muli sighuwesi ndighi.” 39Nao kaghenda sena, na kulomba ghalye malagho ghenyi. 40Naye keja sena, na kuwadoka watungure, kwa kukala meso ghawe ghegwaile; nawo siwemanyile lyemtumbulila. 41Nao keja indu lya katatu, na kuwauza, “Ado mwanatulagha mketungura na kuzumua? Yakata; saa yafika ya Mwana wa Mdamu kuhawano kele mikonu ya wakaung'a. 42Ukeni tighende; loleni uyu enifunyagha uwo avui.”

Kuwato kwa Jesu

(Matayo 26:47-56; Luka 22:47-53; Johana 18:3-12)

43Nao ilyi Jesu eluo keghora, Juda uyu eluo mumoju wa wairimi ikumi na waili keja. Naye oluo ngila mojori na makoghano weluo na nyufu na rungu, wetumilo ni Wakohani na walimu wa sheria na waghosi. 44Naye uyu eluo umfunyagha owahawile alama keghamba, “Uyo nijemsusuga niye mwenyi, mwateni na mghende naye mkemlinda kirani.”

45Naye Juda aghenda eja, kamghendela Jesu, kamuza, “Mwalimu!” Nao kamsusuga. 46Nawo wakamwata Jesu na wakamumanzira. 47Ela mumoju eluo avui kafunya lufu lwake, kamtema msunyi wa mkohani mubwaa na kumpasa kisikilo chake. 48Nao Jesu kawauza, “Ado mweja na nyufu na rungu kuniwata selyi mwatagha viting'a? 49Kila ijua nekezanye nenyo hekaluni nikefundisa na simdimile kuniwata. Ela sigheni Mawandiko gha Kuela ghakatile.” 50Nao wairimi wose wakamsigha, wakakimbila.

51Nao mtawana mumoju kamwirima, naye oluo tu na nguo yekubula; nao wakamwata. 52Ela kasigha ilya nguo yake, kakimbila tuu.

Jesu hambiri ya Baraza

(Matayo 26:57-68; Luka 22:54-55,63-71; Johana 18:13-14,19-24)

53Nao wakamghenza Jesu kwa mkohani mubwaa, nawo wakohani wabwaa wose na waghosi na walimu wa sheria wekoghane. 54Naye Petro kamwirima kwa kulele, hata kangila kwa mkohani mubwaa, naye kakala kitembo na warindiri, kebughawa moto. 55Nao mkohani mubwaa na wanjama wose weluo wekehada ushuhuda ighulu ya Jesu eri wamuulaghe, ela wakaghusowa. 56Kwani wengi weshuhudie ndimi ighulu yake, nagho ushuhuda ghwawe ghukalemo ni kuwatana. 57Hata wamoju wakauka wakashuhudia ndimi ighulu yake wekeghamba, 58“Tanamsikile keghora, ‘Niifuchulagha hekalu iyi iwaghalo na mikonu ya wandu, na kwa majua matatu niwaghalagha nzima siyewaghalo na mikonu.’” 59Hata hung'u sani ushuhuda ghwawe sighuwatane kungi.

60Nao mkohani mubwaa kakala kimusi ghati yawe na kumkotela Jesu, “Ado sutumbulilagha? Nini ichi awa wandu waghora ighulu yako?” 61Ela kanyamala na satumbulile. Nao sena mkohani mubwaa kamkotela Jesu, “Ado uwe nuwe Masihi, Mwana wa Mlungu Mubarikio?” 62Jesu katumbulila, “Nimi mwenyi; nenyo mjemwona Mwana wa Mdamu kekala kitembo kele mkonu ghwa kijo ghwa Mlungu ewo moyo, keja na maengu gha mlunguni.” 63Nao mkohani mubwaa karashura nguo zake na kughora, “Ni mashahidi gha kimuni tishayagha? 64Mwasikila inyo wenyi masholi ghake. Muonagha ije?” Nawo wose wakaghamba yanamfweni kufwa. 65Nao wamoju wakadyowa kumchwila Jesu mate na kumubula ushu na kumkwita wekemuza, “Tondola, nani akuriba!” Na warindiri wakamwata wakamubahala.

Petro kumkana Jesu

(Matayo 26:69-75; Luka 22:56-62; Johana 18:15-18,25-27)

66Naye Petro oluo naisi, aho keja mtumishi mumoju wa kiwake wa mkohani mubwaa, 67naye amwona Petro kebughawa moto, kamzighana na kughora, “Uwe nawose wokezanye na Jesu wa Nazareti.” 68Ela kakana keghamba, “Simanyagha hata sitambukilogho selyi ughoragha.” Nao Petro kafuma shighati. Na jongole ikateta. 69Nao ulya mtumishi wa kiwake kamwona sena, kadyowa kuwauza wandu weluo kimusi alye, “Uyu mundu ni mumoju wawe.” 70Ela iye kakana sena. Nao kumukamuka sena, walye wandu weluo kimusi wakamuza Petro, “Fulo nuwe mumoju wawe, kwa kukala nuwe Mgalilaya.”

71Ela Petro kadyowa kukuwanyiza na kughema keghamba, “Simweni kamare uyu mundu mum'ghoragha!” 72Nao alyenyi jongole ikateta indu lya kaili. Naye Petro kakumbuka selyi Jesu emuuzile, “Hambiri ya kuteta jongole kaili, ujenikana mandu matatu.” Nao kadyowa kulila na kushighira.

Currently Selected:

Marko 14: SAGALLANT

Highlight

Copy