Marko 15

Jesu kughenzo hambiri ya Pilato

(Matayo 27:1-2,11-14; Luka 23:1-5; Johana 18:28-38)

1Nao naikesho kiro, wakohani wabwaa, na waghosi, na walimu wa sheria, na wandu wa njama wakasikilana; nawo wakamfunga Jesu na kumghenza na kumfunya kwa Pilato. 2Nao Pilato kamkotela, “Uwe nuwe mzuri wa Wayahudi?” Jesu katumbulila, “Uwe waghora.”

3Nawo wakohani wabwaa wakamshitakia kwa malagho mengi. 4Nao Pilato kamkotela sena, “Ado suwesi lyetumbulila? Uwonagha ni malagho malinga wakushitakia nagho!” 5Ela Jesu satumbulile kindu chingi, hata Pilato kashinika.

Jesu kutaghanyo kifwa

(Matayo 27:15-26; Luka 23:13-25; Johana 18:39—19:16)

6Nao ngelo ya karamu ya Pasaka, Pilato oluo kewafungulila mfungo mumojori wemlombile. 7Na koluo na mfungo mumoju aitogho Baraba, efungilo ngila mojori na wambawe kwa undu ghwa sheshe zideile wandu wakaulagho. 8Nao makoghano wakamjila Pilato wakamuza awadeile selyi awadeilagha. 9Naye kawakotela, “Mwanashaile nimfungulile Mzuri wa Wayahudi?” 10Omanyile kamba wakohani wabwaa wendemfunya Jesu kwa kumwonela iziso.

11Ela wakohani wabwaa wakashoterea makoghano waghore wafungulilo Baraba kibalo chake. 12Nao Pilato kawauza sena, “Kwa hung'u nimdee ije uyu mundu mumwitagha Mzuri wa Wayahudi?” 13Nawo wakaoda, “Mwambe!” 14Nao Pilato kawakotela, “Kudani, wadea ulaghelaghe muni?” Ela wakaoda na ndighi, “Mwambe!”

15Nao Pilato kwa kushaya kuwaboela wandu, kamfungula Baraba, ima kamchapa Jesu na kumfunya awambo.

Askari kumsholela Jesu

(Matayo 27:27-31; Johana 19:2-3)

16Nao askari wakamlongoza Jesu na kumngiza kele nyumba ya uzuri (iitogho Praitorio), nawo wakawapang'a askari wose. 17Nao wakamrwarisa nguo ya ngundu na kumlukila kofia ya miya na wakamrwarisa. 18Nao wakadyowa kumroghowa, “Voro Mzuri wa Wayahudi!” 19Nawo wakamriba na changu cha chongo, wakamchwila mate; wakam'dyaila ngokoro na kumtasa. 20Nawo waghenda wamalila kumsholela, wakamfunya ilya nguo ya ngundu na kumrwarisa nguo zake zenyi. Nao wakamlongoza noko kumwamba.

Jesu kuwambo

(Matayo 27:32-44; Luka 23:26-43; Johana 19:17-27)

21Nawo ilyi weluo ngileni wekem'ghenza, wakakoghana na mundu mumoju aitogho Simoni eluo kefuma mbweni. Askari wakamshurutisa atuke msalaba ghwa Jesu. (Simoni oluo mundu wa kufuma Kurene na oluo ni tatie Alekzanda na Rufasi.) 22Nawo wakamghenza Jesu andu kuitogho Golgotha, kutambula kwake “ngomeni.” 23Nao wakamhawa divei irunganyo na manemane, ela iye kailegha. 24Nao wakamwamba, wakasara nguo zake kwa ngila ya kura, eri wamanye ichi kila mumoju eusagha. 25Nayo yeluo ni saa ndatu ilyi wemwambile. 26Na koluo na mawandiko gha mashitaki ghake, “Mzuri wa Wayahudi.” 27Nawo wewambile viting'a waili ngila mojori na Jesu, mumoju mkonu ghwa kijo na mumoju mkonu ghwa kimosho. [ 28Nao Mawandiko gha kuela ghakakatila gheghoragha, “Katalo ngila mojori na wakosi.”]

29Na walye weluo wekeita alye wakamsholela, wakanyavura vongo vawe na kughora, “Ee! Uwe uvunjagha hekalu na kuiwaghala kwa majua matatu! 30Kukize uwe mwenyi na uselele kufuma kele msalaba!” 31Hata wakohani wabwaa na walimu wa sheria wakamsholela, wekeghamba, “Wanakizile wazima, sedimagha kukukiza iye mwenyi! 32Masihi Mzuri wa Israeli, saselele kufuma msalabeni eri tione na kudumusa!” Na walye wewambilo ngila mojori naye wakamsholela.

Kifwa cha Jesu

(Matayo 27:45-56; Luka 23:44-49; Johana 19:28-30)

33Nao ifika saa ndandatu, kukakala na kiza isanga lyose hata saa kenda. 34Nao saa kenda, Jesu kakema na lwaka lubwaa, “Eloi, Eloi, lama sabakthani?” Kutambula kwake, “Mlungu wangu, Mlungu wangu, kudani wanisigha?” 35Nao walye weluo kimusi alye wasikila, wakaghora, “Loleni, ondempang'a Elija!” 36Nao mundu mumoju kakimbila kajuza sifongo na siki, kaiika kele mrangi na kumhawa anwe, keghora, “Sigha tione ngera Elija ukujagha amseleze msalabeni!” 37Nao Jesu kakema na lwaka lubwaa, na kufunya roho.

38Nao pazia ya hekalu ikazaika nyuhande mbili kufuma koighulu hata koisi. 39Nao jemadari uyu eluo kezighana, aghenda aona selyi afwile, kaghamba, “Fulo uyu mundu oluo ni Mwana wa Mlungu.”

40Koluo na wake wamoju weluo wekezighana kufuma kakulele, wamoju weluo ni Mariamu Magdalene na Mariamu mee Jakobo mchache na Jose na Salome. 41Awa wake wemwirime Jesu ilyi eluo Galilaya, na kumtumikila; na wake wazima wengi wejanye naye Jerusalemu.

Kuziko kwa Jesu

(Matayo 27:57-61; Luka 23:50-56; Johana 19:38-42)

42Nao ighenda ifika nahafuka, kwa kukala lyeluo ni ijua lya kukuika kirani hambiri ya Sabato, 43Josefu wa Arimathaya, mundu eluo kehawo ishima kele wanjama, na eluo kelolila Uzuri ghwa Mlungu kuja, kamghendela Pilato sewesi wogha ghungi, kalomba muli ghwa Jesu. 44Nao Pilato kashinika kusikila kamba wamalila kufwa. Kampang'a jemadari kamkotela ngera wamalila kufwa. 45Naye aghenda amanya kufuma kwa jemadari kamba wafwa, kamdumusila Josefu ause ghulya muli. 46Nao Josefu kaghula nguo ya bafuta, kaghuseleza ghulya muli, kaghufunga na ilya nguo ya bafuta, kaghuzika kele kaburi ikotilo iweni, na kabingilisha iwe kele mjango ghwa kaburi. 47Mariamu Magdalene na Mariamu mee Jose weonile andu azikilo.

Currently Selected:

Marko 15: SAGALLANT

Highlight

Copy