Marko 16

Kuzuka kwa Jesu

(Matayo 28:1-8; Luka 24:1-12; Johana 20:1-10)

1Nao Sabato iduwa, Mariamu Magdalene, na Mariamu mee Jakobo, na Salome, wakaghula marashi eri waghende waghuvile muli ghwa Jesu. 2Nao ijua lya Jumwa na ikesho kiro, ijua lyikebusa, wakaghenda kaburini. 3Nawo weluo wekeghora wenyi, “Nani etibingilishilagha iwe kele mjango ghwa kaburi?” 4Nawo welolagha, wakaona iwe lyamalila kubingilisho, (nalyo lyeluo ibwaa). 5Nawo wangila kele kaburi, wakamwona mtawana kitembo mkonu ghwa kijo, arwara nguo za mnyange; nawo wakashinika.

6Naye kawauza, “Simwashinike; mondemhada Jesu wa Nazareti uyu awambilo. Seo aha, wazuka. Loleni andu azikilo. 7Ela ghendeni muwaghorere wairimi wake na Petro, kamba wawakayaila kughenda Galilaya; alye mjemwona selyi amghorerere.”

8Nawo wakafuma wekekimbila kufuma kaburini, kwani weluo wekegaganika na kushinika; nawo siwaghorerere mndungi ilagho lyingi, kwa kukala wengililo ni wogha.

Jesu kuono ni Mariamu Magdalene

(Matayo 28:9-10; Johana 20:11-18)

[ 9Nao Jesu aghenda azuka naikesho kiro ijua lya Jumwa, kamfumila Mariamu Magdalene, uyu emfunyile pepo mfungate. 10Naye kaghenda na kuwaghorera walye wekezanye naye. Weluo wekelila na kushighira. 11Ela waghenda wasikila Jesu uwo moyo na kamba iye wamwona, siwadimile kudumusa.

Jesu kuono ni wairimi waili

(Luka 24:13-35)

12Nyuma ya agha Jesu kawafumila wairimi waili kwa fwana nzima ngelo weluo wekeghenda mbweni. 13Nawo wakauya na kughorera wambawe, ela siwadumusile.

Jesu kuono ni wairimi ikumi na moju

(Matayo 28:16-20; Luka 24:36-49; Johana 20:19-23; Madeo 1:6-8)

14Konyuma Jesu kawafumila wairimi ikumi na moju ngelo weluo wekelya; kawakemela kwa kulegha kudumusa na kukulo ni ngolo, kwa kukala siwadumuse walye wamwonile nyuma ya kuzuka. 15Nao kawauza, “Ghendeni urumenguni ghose na mchile Ilagho Lyaloli kwa wandu wose. 16Uyo wose edumusagha na kubatizo ukilagha; ela uyu sedumusagha utaghanyogho. 17Na wana mwakilimbita awa weirimanagha na awa wadumusa: kwa izina lyangu wegusagha pepo, na wejeghora kwa nyumi nzima nzima; 18hata ilyi wawata nyoka ango wanwa usungu siweonagha ghengi; wakawaikilila wakongo mikonu webowagha.”

Jesu kujoka mlunguni

(Luka 24:50-53; Madeo 1:9-11)

19Nao Bwana Jesu aghenda amalila kuhelea nawo, katwalo noko ighulu mlunguni, kakala kitembo kele mkonu ghwa kijo ghwa Mlungu. 20Nawo wairimi wakaghenda wakachila andu kose, na Bwana kadeanya kazi nawo, kemangisa llagho kwa wana mwakilimbita wadeike. Ameni.]

Currently Selected:

Marko 16: SAGALLANT

Highlight

Copy