Lō͘-ka Hok-im 15

Sit-lo̍h ê Iûⁿ ê Phì-jū

(Thài 18.12-14)

1Ū chi̍t piàn, chin chōe ba̍uh-sè--ê kap chōe-jîn óa-lâi Iâ-so͘ hia beh thiaⁿ I káng-tō. 2Hoat-lī-sài-phài ê lâng kap keng-ha̍k-kàu-su nga̍uh-nga̍uh-liām, kóng, “Chit-ê lâng chiap-la̍p chōe-jîn, kap in chia̍h-pn̄g!” 3Iâ-so͘ chiū kā in kóng chit-ê phì-jū:

4“Lín tiong-kan sím-mi̍h-lâng ū chi̍t-pah chiah iûⁿ phah-m̄-kìⁿ chi̍t chiah, i kiám bōe pàng hit káu-cha̍p-káu chiah tī khòng-iá, khì chhē phah-m̄-kìⁿ hit-chiah, chhē kàu tio̍h? 5Chi̍t-ē chhē--tio̍h, i chiū chin hoaⁿ-hí, chiong hit-chiah iûⁿ phāiⁿ tī keng-thâu. 6I tńg-lâi kàu chhù, kiò pêng-iú kap chhù-piⁿ lâi, kā in kóng, ‘Lâi tàu hoaⁿ-hí, in-ūi phah-m̄-kìⁿ hit-chiah iûⁿ í-keng chhē--tio̍h.’ 7Góa kā lín kóng, chhin-chhiūⁿ án-ni, ūi-tio̍h ū chi̍t ê hóe-kái ê chōe-jîn, pí ū káu-cha̍p-káu ê m̄-bián hóe-kái ê gī-lâng, tī thiⁿ-téng ê hoaⁿ-hí ōe koh-khah tōa.”

Sit-lo̍h ê Chîⁿ ê Phì-jū

8“Á-sī, ū chi̍t ê hū-jîn-lâng ū cha̍p ê gûn-oân, phah-m̄-kìⁿ chi̍t ê, kiám bōe tiám-teng, sàu chhù-lāi, phah-piàⁿ chhē, chhē kàu tio̍h? 9I chi̍t-ē chhē--tio̍h, chiū kiò pêng-iú kap chhù-piⁿ lâi, kā in kóng, ‘Lâi tàu hoaⁿ-hí, in-ūi phah-m̄-kìⁿ hit-ê gûn-oân í-keng chhē--tio̍h.’ 10Góa kā lín kóng, chhin-chhiūⁿ án-ni, Siōng-tè ê thiⁿ-sài ōe ūi-tio̍h chi̍t ê chōe-jîn hóe-kái lâi hoaⁿ-hí.”

Sit-lo̍h ê Kiáⁿ ê Phì-jū

11Iâ-so͘ koh kóng, “Ū chi̍t ê lâng ū nn̄g ê kiáⁿ; 12sòe-hàn--ê kā lāu-pē kóng, ‘A-pa, góa eng-kai tit ê châi-sán, chhiáⁿ lí pun hō͘ góa.’ Lāu-pē chiū chiong châi-sán pun hō͘ in nn̄g ê. 13Kè bô kúi ji̍t, sòe-hàn kiáⁿ chiong só͘ tit--tio̍h choân-pō͘ ê châi-sán lóng ōaⁿ chòe hiān-kim, jiân-āu chhut-gōa khì chin hn̄g ê só͘-chāi, tī hia hòng-tōng, chîⁿ o͘-pe̍h khai. 14I só͘ ū--ê lóng khai-liáu-liáu ê sî, tú-hó hit só͘-chāi hoat-seng tōa ki-hng, i chiah chai khiàm-kheh ê kan-khó͘. 15I chiū khì hō͘ hit só͘-chāi ê chi̍t ê lâng chhiàⁿ. Hit-ê lâng kiò i khì hn̂g--ni̍h chhī ti. 16I iau kah siūⁿ-beh the̍h ti teh chia̍h ê tāu-ngoeh chí-ki, m̄-kú liân che lâng mā bô hō͘ i.

17“Āu-lâi, i kak-chhíⁿ, kóng, ‘Goán lāu-pē ū hiah-ni̍h chōe chhiàⁿ-kang, in lóng ū mi̍h thang chia̍h, koh chia̍h kàu ū-chhun, m̄-kú góa tī chia teh-beh gō-sí. 18Góa beh khí--lâi, tńg-khì góa ê lāu-pē hia, kā i kóng: A-pa, góa ū tek-chōe Thiⁿ, mā ū tek-chōe lí, 19í-keng bô chu-keh chòe lí ê kiáⁿ. Chhiáⁿ hō͘ góa chòe lí ê chhiàⁿ-kang chiū hó.’ 20I chiū chhut-hoat tńg-khì lāu-pē hia.

“I lī in tau iáu chin hn̄g, lāu-pē chiū khòaⁿ-tio̍h i, sim chin m̄-kam, kóaⁿ-kín cháu óa-khì kā i lám--teh, ti̍t-ti̍t kā i chim. 21Kiáⁿ chiū tùi lāu-pē kóng, ‘A-pa, góa ū tek-chōe Thiⁿ, mā ū tek-chōe lí. Góa í-keng bô chu-keh chòe lí ê kiáⁿ.’ 22M̄-kú, lāu-pē kā po̍k-jîn kóng, ‘Kóaⁿ-kín hiahⁿ siōng-hó ê gōa-phàu lâi kā i chhēng, kā i kòa chhiú-chí, koh kā i chhēng-ôe, 23sòa khan hit-chiah pûi ê gû-á-kiáⁿ lâi thâi, lâi khèng-chiok. 24In-ūi góa chit-ê kiáⁿ sī sí--khì ū koh-oa̍h, sit-lo̍h ū koh tit--tio̍h.’ In chiū khai-sí khèng-chiok.

25“Hit-sî, tōa-kiáⁿ tī hn̂g--ni̍h. I tńg--lâi, teh-beh kàu chhù ê sî thiaⁿ-tio̍h chàu-ga̍k kap thiàu-bú ê siaⁿ. 26I kiò chi̍t ê po̍k-jîn lâi, mn̄g-khòaⁿ tàu-tóe sī sím-mi̍h tāi-chì. 27Hit-ê po̍k-jîn kā i kóng, ‘Lín sió-tī tńg--lâi; lín lāu-pē in-ūi i pêng-an bô-sū tò--lâi, chiū thâi hit-chiah pûi ê gû-á-kiáⁿ.’ 28Tōa-kiáⁿ hui-siông siū-khì, m̄ ji̍p--khì. I ê lāu-pē chhut-lâi kā i khó͘-khǹg. 29M̄-kú i ìn lāu-pē kóng, ‘Lí siūⁿ-khòaⁿ leh, góa choh lô͘-châi ho̍k-sāi lí chiah chōe nî, m̄-bat ûi-pōe lí ê bēng-lēng, lí liân chi̍t chiah soaⁿ-iûⁿ-á to m̄-bat hō͘ góa kap pêng-iú chòe-hé hoaⁿ-hí! 30M̄-kú, lí chit-ê kiáⁿ ūi-tio̍h chhiong-ki kā lí ê châi-sán khai-liáu-liáu, i chi̍t-ē tńg--lâi, lí chiū ūi-tio̍h i thâi hit-chiah pûi ê gû-á-kiáⁿ.’ 31I ê lāu-pē ìn kóng, ‘Kiáⁿ ah, lí put-sî to kap góa chòe-hé, góa só͘-ū--ê lóng sī lí ê. 32Chóng-sī lí chit-ê sió-tī, i sī sí--khì ū koh-oa̍h, sit-lo̍h ū koh tit--tio̍h, lán eng-kai hoaⁿ-hoaⁿ-hí-hí lâi khèng-chiok.’”

Currently Selected:

Lō͘-ka Hok-im 15: TTVR

Highlight

Copy

Want to have your highlights saved across all your devices? Sign up or sign in

The Bible Society in Taiwan

Learn More About 現代台語譯本羅馬字版

Popular Bible Verses from
Lō͘-ka Hok-im 15

Videos for Lō͘-ka Hok-im 15

Luke 10-24

The Bible Project

The Prodigal Son

Lumo Project

Lō͘-ka Hok-im 15

Popular Bible Verses from
Lō͘-ka Hok-im 15

Videos for Lō͘-ka Hok-im 15

Luke 10-24

The Prodigal Son

Bible:

Chinese, Min Nan

Version: 現代台語譯本羅馬字版 - TTVR

Lō͘-ka Hok-im 15

Lō͘-ka Hok-im 15

Popular Bible Verses from Lō͘-ka Hok-im 15

Videos for Lō͘-ka Hok-im 15

Luke 10-24

The Prodigal Son

Bible:

Chinese, Min Nan

Version: 現代台語譯本羅馬字版 - TTVR

Lō͘-ka Hok-im 15

Popular Bible Verses from
Lō͘-ka Hok-im 15