Lō͘-ka Hok-im 16

Gâu Piàn-khiàu ê Koán-ke

1Iâ-so͘ koh tùi bûn-tô͘ kóng, “Ū chi̍t ê lâng chin hó-gia̍h, i ū chi̍t ê koán-ke; ū lâng tùi chú-lâng kiám-kú chit-ê koán-ke lōng-hùi i ê châi-sán. 2Chú-lâng kiò i lâi, kā i mn̄g, ‘Góa ū thiaⁿ-tio̍h lí chit-ê tāi-chì, tàu-tóe sī án-chóaⁿ? Lí só͘ koán-lí ê siàu-phō͘ kau--chhut-lâi, m̄ hō͘ lí koh choh koán-ke.’ 3Hit-ê koán-ke ka-kī siūⁿ-kóng, ‘Chú-lâng beh kā góa sî thâu-lō͘, m̄ hō͘ góa koh choh koán-ke, taⁿ góa beh án-chóaⁿ? Gia̍h tî-thâu bô khùi-la̍t, choh khit-chia̍h koh kiaⁿ kiàn-siàu. 4Taⁿ, góa chai tio̍h án-chóaⁿ chòe, bô choh koán-ke í-āu chiah ū pêng-iú thang kā góa siu-liû.’

5“Koán-ke chiū chiong chú-lâng ê chè-bū-jîn chi̍t-ê chi̍t-ê kiò--lâi, kā thâu chi̍t ê kóng, ‘Lí khiàm goán chú-lâng jōa-chōe?’ 6I ìn kóng, ‘Chi̍t-pah tháng kaⁿ-ná-iû.’ Koán-ke kā i kóng, ‘Lí ê chioh-tiâu tī chia, kóaⁿ-kín chē--lo̍h-lâi, kā kái-chòe gō͘-cha̍p.’ 7Koán-ke koh kā lēng-gōa chi̍t ê kóng, ‘Lí khiàm jōa-chōe?’ I ìn kóng, ‘Chi̍t-pah chio̍h be̍h-á.’ Koán-ke kā i kóng, ‘Lí ê chioh-tiâu tī chia, kā kái-chòe poeh-cha̍p.’

8“Chú-lâng po-chióng chit-ê bô láu-si̍t ê koán-ke chòe-liáu chin khiáu, in-ūi sio̍k sè-kan ê lâng chhú-lí sè-sū pí sio̍k kng-bêng ê lâng khah ū piàn-khiàu.”

9Iâ-so͘ kè-sio̍k kóng, “Góa kā lín kóng: Tio̍h ēng put-gī ê chîⁿ-châi ūi-tio̍h ka-kī kiat-kau pêng-iú, án-ni chîⁿ-châi bô--khì ê sî, in ōe chiap-la̍p lín ji̍p-khì éng-oán khiā-khí ê só͘-chāi. 10Tùi chin sòe-hāng tāi-chì tiong-si̍t ê lâng, tùi tōa-hāng tāi-chì mā ōe tiong-si̍t; tùi chin sòe-hāng tāi-chì bô láu-si̍t ê lâng, tùi tōa-hāng tāi-chì mā bōe láu-si̍t. 11Só͘-í, lín tùi put-gī ê chîⁿ-châi nā bô láu-si̍t, siáⁿ-lâng beh chiong chin-chiàⁿ ê châi-pó kau-tài lín? 12Lín tùi pa̍t-lâng ê mi̍h nā bô láu-si̍t, siáⁿ-lâng beh chiong lín ê mi̍h hō͘ lín?

13“Bô chi̍t ê po̍k-jîn ōe-tàng ho̍k-sāi nn̄g ê chú-lâng; i nā m̄-sī oàn-hūn chit-ê, thiàⁿ hit-ê, chiū-sī khòaⁿ-tāng chit-ê, khòaⁿ-khin hit-ê. Lín bōe-tàng siâng-sî ho̍k-sāi Siōng-tè koh ho̍k-sāi chîⁿ-châi.”

Lu̍t-hoat kap Siōng-tè-kok

(Thài 5.31-32; 11.12-13; Khó 10.11-12)

14Hiah-ê tham-châi ê Hoat-lī-sài-phài ê lâng thiaⁿ-tio̍h Iâ-so͘ kóng chiah-ê ōe chiū kā I thí-chhiò. 15Iâ-so͘ kā in kóng, “Lín chiah-ê lâng tī lâng ê bīn-chêng chū-chheng chòe gī, m̄-kú Siōng-tè chai lín ê lāi-sim, in-ūi lâng khòaⁿ-chòe chun-kùi--ê, tùi Siōng-tè lâi khòaⁿ sī thang iàm-ò͘ⁿ--ê.

16“Mô͘-se ê Lu̍t-hoat kap sian-ti ê kà-sī kàu Si-sóe-chiá Iok-hān kiat-sok. Tùi hit-sî khí, Siōng-tè-kok ê hok-im chiū thoân--chhut-khì, lâng-lâng lóng ngī-beh chiⁿ--ji̍p-khì. 17M̄-kú thiⁿ-tōe siau-sit pí hòe-tû Lu̍t-hoat ê chi̍t-u̍ih koh-khah kán-tan.

18“Bô-lūn sím-mi̍h-lâng, lî i ê bó͘ khì chhōa pa̍t-ê hū-jîn-lâng chiū-sī hoān kan-îm; chhōa hō͘ lâng lî-hun ê hū-jîn-lâng mā-sī hoān kan-îm.”

Hó-gia̍h-lâng kap Lia̍p-sat-lō͘

19“Ū chi̍t ê lâng chin hó-gia̍h, i chhēng chí-sek chin ko-kùi ê i-ho̍k, ta̍k-ji̍t chhia-hoa iàn-lo̍k. 20Koh ū chi̍t ê khit-chia̍h, miâ kiò-chòe Lia̍p-sat-lō͘, kui seng-khu siⁿ-chhng, tó tī hit-ê hó-gia̍h-lâng ê mn̂g-kháu, 21beh khioh hó-gia̍h-lâng toh-téng lak--lo̍h-lâi ê sap-á chí-ki; káu mā lâi chī i ê chhng.

22“Āu-lâi, chit-ê khit-chia̍h sí--khì, thiⁿ-sài kā i chhōa-khì A-pek-la-hán ê seng-khu piⁿ. Hit-ê hó-gia̍h-lâng mā sí--khì, koh bâi-chòng. 23I tī Im-hú siū chin tōa ê thòng-khó͘, gia̍h-thâu khòaⁿ, khòaⁿ-tio̍h A-pek-la-hán tī hn̄g-hn̄g ê só͘-chāi, Lia̍p-sat-lō͘ tī i ê seng-khu piⁿ. 24I chiū chhut-siaⁿ kiò, ‘Góa ê chó͘ A-pek-la-hán, lîn-bín góa! Chhiáⁿ lí chhe Lia̍p-sat-lō͘ ēng chńg-thâu-á-bé ùn chúi lâi hō͘ góa ê chhùi-chi̍h liâng--chi̍t-ē, in-ūi góa tī chit-ê hé-iām tiong teh siū khó͘-chhó͘.’

25“M̄-kú A-pek-la-hán kóng, ‘Kiáⁿ ah, tio̍h ōe-kì-tit lí chāi-siⁿ hióng-siū it-chhè ê khoài-lo̍k, m̄-kú Lia̍p-sat-lō͘ chāi-siⁿ siū-chīn thòng-khó͘, I hiān-chāi tī chia tit-tio̍h an-ùi, lí tī hia teh siū khó͘-chhó͘. 26M̄-nā án-ni, goán kap lín ê tiong-kan ū tōa chhim-ian keh-khui, án-ni tùi chia bô lâng ōe-tàng kè-khì lín hia, mā bô lâng ōe-tàng tùi lín hia kè-lâi goán chia.’ 27Hit-ê hó-gia̍h-lâng chiū kóng, ‘Góa ê chó͘ ah, kì-jiân sī án-ni, góa khún-kiû lí chhe Lia̍p-sat-lō͘ khì goán lāu-pē ê chhù; 28góa ū gō͘ ê hiaⁿ-tī tī hia, i thang khì kā in kéng-kò, chiah bián in mā lâi kàu chit-ê hui-siông thòng-khó͘ ê só͘-chāi.’

29“M̄-kú A-pek-la-hán ìn kóng, ‘Lí ê hiaⁿ-tī ū Mô͘-se kap sian-ti, in eng-kai khì thiaⁿ in ê ōe.’ 30Hit-ê hó-gia̍h-lâng ìn kóng, ‘Góa ê chó͘ A-pek-la-hán, in bōe lah. Nā ū lâng tùi sí-lâng tiong koh-oa̍h khì chhē in, in chiū ōe hóe-kái.’ 31A-pek-la-hán kā i kóng, ‘In nā m̄ thiaⁿ Mô͘-se kap sian-ti ê ōe, ū lâng tùi sí-lâng tiong koh-oa̍h, in mā bōe siong-sìn.’”

Currently Selected:

Lō͘-ka Hok-im 16: TTVR

Highlight

Copy

Want to have your highlights saved across all your devices? Sign up or sign in

The Bible Society in Taiwan

Learn More About 現代台語譯本羅馬字版

Popular Bible Verses from
Lō͘-ka Hok-im 16

Video for Lō͘-ka Hok-im 16

Luke 10-24

The Bible Project

Lō͘-ka Hok-im 16

Popular Bible Verses from
Lō͘-ka Hok-im 16

Video for Lō͘-ka Hok-im 16

Luke 10-24

Bible:

Chinese, Min Nan

Version: 現代台語譯本羅馬字版 - TTVR

Lō͘-ka Hok-im 16

Lō͘-ka Hok-im 16

Popular Bible Verses from Lō͘-ka Hok-im 16

Video for Lō͘-ka Hok-im 16

Luke 10-24

Bible:

Chinese, Min Nan

Version: 現代台語譯本羅馬字版 - TTVR

Lō͘-ka Hok-im 16

Popular Bible Verses from
Lō͘-ka Hok-im 16