HECHOS 13

Bernabepash, Saulopash shuj llactacunapi villangapa rishpa callarishcamanda

1Antioquía pueblopi tandanajuj crijpurapica: Bernabepash, Niger nishca Simonbash, Cirene pueblomanda Luciopash, tetrarca nishca Herodeshuan viñashca Manaén shuti runapash, Saulopashmi, profetacuna, yachachijcunapash carca. 2Paicunaca, na micushpa Jatun Diospajta ruranajujpimi, jucha illaj Diospaj Espirituca: “Bernabetapash, Saulotapash shicanyachipaichi. Paicunataca, Ñucapajta rurachunmi agllarcani” nirca.

3Shina nijpica, Bernabepaj, Saulopaj umapi maquita churashpa, na micushpa Diosta mañashpami cachanajurca.

Apostolcunaca, Chipre llactapimi Diosmanda villanajushca

4Jucha illaj Diospaj Espíritu cachajpimi, Bernabendi, Saulondi, Seleucia shuti puebloman urai chayagrirca. Chaimandaca barcopimi, Chipre llactaman chimbarca. 5Paicunaca, Salamina puebloman chayashpaca, judiocuna tandanajuj sinagogacunapimi, Taita Diospaj Shimita villanajurca. Juanbash, paicunata yanapashpami purijurca. 6Chipre llactata yalishpaca, Pafos shuti pueblomanmi chayagrirca. Chaipimi, Barjesús shuti llulla profeta runata tuparirca. Paica, judea llactamanda llulla yachaj runami carca. 7Chai runaca, chai llactata jatun mandajpaj shutipi mandaj Sergio Paulo shuti runapaj huasipimi causajurca. Chai mandajca, aliguta yarishpa causaj cashpami, Taita Diospaj Shimita uyangapa munashpa, Bernabetapash, Saulotapash, cayachun cacharca. 8Ashtahuangarin, chai llulla yachaj runaca, chai mandajca ama crichunmi jarcajurca. (Paica, Elimas shutipashmi carca). 9Saulo runaca, Pablo shutipashmi carca. Paica, jucha illaj Diospaj Espíritu junda cashpami, chai llulla yachajtaca ñavita ricunman saquirishpa, 10cashna nirca:

“¡Canga, tucuita umachishpa na alita rurana munaihuanlla jundami cangui! ¡Diablopaj huahua cashpami, alitalla ruranataca fiñashpa causangui! ¿Imashpata Jatun Dios munashcata rurashpa causachunga na saquishpa, pandachijungui? 11Cunanga, Jatun Dios fiñashpa llaquichijpimi, ñausa tigrashpa, inditapash unaicaman na ricungui” nircami.

Shina nijhuanmi, yana yana tutashna paita quilpamujpi, paita maquimanda aisashpa pushachun muyundi mascashpa purijurca. 12Sergio Paulo shuti mandaj runaca chaita ricushpami, ninanda manllarishpa, Apunchi Jesusmanda yachachishcata crirca.

Pisidia llactapimi Pablondi, Bernabendi villanajushca

13Pabloca, paipaj cumbacunandimi, Pafos pueblomandaca, Panfilia llactapi tiyaj Perge shuti puebloman chayagrirca. Ashtahuangarin Juanga, paicunatalla saquishpami, Jerusalenman tigrarca. 14Pablopash, Bernabepash, Perge shuti pueblomandaca, Pisidia llactapi tiyaj Antioquía pueblomanmi rinajurca. Chaipimi samana punllapica, sinagogaman yaicushpa tiyarinajurca. 15Chaipica, mandashca shimitapash, profetacuna quilcashcatapash, quilcacatishca jipami, sinagogapi mandajcunaca:

“Huauquicuna, gentecunaman imata yachachina cashpapash villapaichilla” ninajurca.

16Shina nijpi Pablo jatarishpaca, upalla cachun maquihuan ricuchishpami, cashna nijurca:

“Israel gentecunapash, Taita Diosta manllajcunapash, uyahuaichi: 17Ñucanchi ñaupa taitacunataca, Israelcunapaj Taita Diosmi agllashca. Paicunataca, caru llactamanda shamushpa, Egipto llactapi causajpipash jatumbi churashpami, Diospaj ninan ushaihuan chai llactamandaca llujchishca. 18Paicunataca, jichushca pambapimi, chuscu chunga huatatashna, Diosca na fiñashpa charishca. 19Shinallata, Canaán llactapi tiyaj canchis llactacunata tucuchishpami, chai llactataca, ñucanchi ñaupa taitacuna japichun carashca. 20Chai jipamanmi, chuscu patsaj picha chunga huatatashna mandachun, juezcunata churashca. Paicunaca, profeta Samuel mandana punllacamanmi mandanajushca. 21Chai jipaca, jatun mandaj tiyachunmi mañanajushca. Shina mañajpimi Taita Diosca, Benjamín ayllupuramanda Cis shuti runapaj churi Saúl mandachun churashca. Paica, chuscu chunga huatacamanmi mandajushca. 22Saulta llujchishca jipaca, Davidtami jatun mandaj cachun churashca. Paimandami, Diosca cashna nishpa villashca: ‘Ñuca shungu munashcashna cajpimi, Isaí shuti runapaj churi Davidtaca agllarcani. Paimi, Ñuca munashcashna imatapash rurajunga’ nishcami. 23Davidpaj miraimandami, Taita Diosca, Israelcunata quishpichij shamuchun, cachamusha nishcashnami Jesustaca cachamurca. 24Jesús nara shamujpillatami Juanga: ‘Juchayu cashcamanda llaquirishpa, Diospajman tigrarishpa bautizarichi’ nishpa tucui Israel gentecunaman villajurca. 25Juanga, cashna villashpa pactachishca jipaca, cashnami nirca: ‘Cangunaca, ¿ñucataca maijan yahuanguichita? Na canguna shuyanajuj runachu cani. Ñucapaj jipami shuj shamunga. Paitaca, chaquipi churajushcata pascachitallapash, na ushanachu cani’ nishcami carca.

26Huauquicuna, Abrahambaj miraicunami canguichi. Cangunapurapica, Taita Diosta manllajcunami canguichi. Cangunamanmi, cai quishpirinamanda villachun, Diosca cachamushca. 27Jerusalenbi causajcunapash, paicunata mandajcunapash, Jesusta na rijsishpami huañuchinajurca. Paicunaca, profetacuna quilcashca shimicunata, samana punllacunapi quilca catinajushpapash, na yachashpami chai quilcashcapi nijushcata pactachishpa huañuchinajurca. 28Jesusta huañuchingapaca, ima na alita rurashcatapash, na tarircachu. Shina cajpipash: ‘Huañuchinapachami’ nishpami Pilatotaca mañanajurca. 29Quilcashcapi, tucui imatalla Jesusmanda nijujta pactachishca jipami Jesustaca, caspimanda uriajuchishpa pambarca. 30Ashtahuangarin Taita Diosca, huañushcacunapaj chaupimandami Paitaca causachirca. 31Jesús causarishpaca, Galilea llactamandapacha Jerusalengaman Paihuan vichai rishca runacunamanmi tauca punllacunata ricurirca. Paita ricushcacunami, cunanga gentecunaman villanajun.

32Ñucanchipash, quishpirinamanda ali villanatami villanajunchi. Diosca ñucanchi ñaupa taitacunamanmi: ‘Cai villanataca pactachishapachami’ nishca carca. 33Ñaupa taitacunapaj mirai ñucanchimanmi, Taita Diosca, Jesusta causachishpa, pactachirca. Cati quilcashca Salmopipash, cashnami nijun: ‘Canga, Ñuca Churimi cangui. Cunanga, Canmanmi causaita carani’ nijunmi. 34Shinallata: ‘Davidta ninanda llaquishpa pactachishapachami’ nishcataca, Jesuspaj cuerpo amapacha ismuchun, huañushcacunapaj chaupimanda causachishpami pactachishca. 35Shinamandami shuj Salmopipash:

‘Cambajta ruraj Jucha illajtaca,

chaipi ismuchunga napacha saquishachu’ nijun.

36Davidca, pai causajui punllacunapi causajcunamanga, Taita Dios munashcashna ruranajushpapash huañushpami, paipaj ñaupa taitacunahuan pambai tucushca. Shina cajpipash paipaj aichaca ismushcallami. 37Ashtahuangarin, Taita Dios causachijpimi, Jesuspaj aichaca na ismurca. 38Huauquicuna, caitaca yachanami canguichi: ‘Jesusta crijpimi, cangunapaj juchacunataca Diosca anchuchinga’ nishpami, villanajunchi. 39Cai tucui juchamandaca, Moisés mandashcata pactachinajushpapash, alitalla rurashcatashnaca na chasqui tucushcachu canguichi. Jesusta tucui crijcunatallami, alitalla rurashcatashna chasquijun. 40Profetacuna nishcashna, llaqui ama japichunga, aliguta yaringuichi. Paicunami, cashna villashca:

41‘Uyaichi, ñucata yangapi churajcuna, manllarishpa maipipash chingagrichi.

Canguna causanajui punllacunapimi, shuj ruranata rurasha.

Chai rurashcata cangunaman villajpipash,

na crishpallatami causanguichi’ nishcami carca” nijurcami.

42Judiocunapaj sinagogamanda Pablondi, Bernabendi villashpa llujshijpimi, chaipi gentecunaca: “Cayandi samana punllapipash, cutin villaj shamupanguichi” nishpa ninanda mañanajurca.

43Tucuilla chaimanda llujshishpa rijpimi, ashtaca judiocunapash, judiocuna yachachishcata ali shunguhuan pactachijcunapash Pablota, Bernabeta catishpa rinajurca. Paicuna, chai gentecunaman yachachishpaca: “Taita Dios ninanda juyajujtaca, aligutapacha yarishpami catina canguichi” ninajurcami.

44Cayandi samana punllapipash, chai pueblopi causajcunaca, Taita Diospaj Shimita uyangapaca, ashamandallami na tucuilla tandanajurca. 45Ashtahuangarin, ashtaca gentecuna tandanajujta judiocuna ricushpaca, ninandami fiñarirca. Pablo ña villajujpica: “Napacha chashnachu” nishpami, paicunaca na ali shimicunata rimanajurca. 46Ashtahuangarin, na manllashpami Pablondi, Bernabendi cashna nishpa villanajurca:

“Taita Diospaj Shimitaca, cangunamanrami villanapacha carcanchi. Ashtahuangarin, cai villajujta yangapi churashpami, causaita causagrinataca na munashcata ricuchinguichi. Shinamandami na Israelcunaman villangapa rigrinchi. 47Jatun Diospash ñucanchitaca, cashna nishpami mandashca:

‘Shuj llactacunapi causajcunata,

michashna punchayachij cachunmi, candaca churarcani.

Tucui cai pachapi causajcunaman,

can villajpi, quishpirichunmi churarcani’ nishcami carca” ninajurcami.

48Shina villajpimi na Israelcunaca: “Jatun Diospaj Shimica juyaillagumari” nishpa, ninanda cushijunajurca. Causaita causagrichun Jatun Dios agllashcacunaca tucuillami crinajurca. 49Tucui chai llactapimi, Jatun Diospaj Shimitaca maipipash villanajurca. 50Ashtahuangarin judiocunaca, Diosta yarij, alicachi tucushca huarmicunamambash, chai pueblota mandajcunamambashmi, paicunata llaquichina yuyaita cunajurca. Shinamandami, Pablotapash, Bernabetapash catiriyashpa llaquichishpa, chai llactamandaca llujchishpa cachanajurca. 51Paicunaca, chai gentecunata na alicachishpami, chaquipi catijuj alpatapash chafsishpa rinajurca. Shina rishpaca, Iconio pueblomanmi chayagrirca. 52Jesusta crishpa catijcunaca, jucha illaj Diospaj Espíritu junda cashpami ninanda cushijushpa causanajurca.

Currently Selected:

HECHOS 13: QVI16

Highlight

Copy