HECHOS 12

Jacobotaca huañuchishcami, Pedrotaca prezushcami

1Chai huatacunapimi, jatun mandaj Herodesca, tandanajushca crijcunamanda huaquingunataca, ninanda llaquichi callarirca. 2Shina cashpami, Juanbaj huauqui Jacobotaca espadahuan huañuchirca. 3Chashna rurajujta judiocuna ricushpa alicachijpimi Pedrotapash japichirca. Chai punllacunaca, levadura illaj tandata micuna punllacunami carca. 4Pedrota japichishpaca, prezuna huasipimi vicharca. Paitaca, chuscupura tandajushca macanajuj runacunata, chuscupi tandachishpami paita ricuriachun churarca. Pedrotaca, pascua punlla yalijpimi, tucuicunapaj ñaupajman llujchingapa munajurca. 5Shinami, Pedrotaca prezuna huasipi ninanda ricurianajurca. Ashtahuangarin, Pedromandaca, tandanajuj crijcunaca na cungashpami Diosta mañanajurca.

Pedrotaca, prezu cashcamandami llujchishca

6Herodesca, Pedrotaca cayandi llujchina cajpimi, chai tutaca prezuna huasipi cadenacunahuan huatashca, ishcai chapajcuna ricujpi puñujurca. Shinallata, huaquin chapajcunaca, pungupimi ricuriashpa shayanajurca. 7Ashtahuangarin, Jatun Diospaj shuj angelmi chai ucupi punchapamba ricurimushpa, costillapi tacarishpa Pedrotaca: “Ucha jatari” nishpa rijchachirca. Shina nijpimi, Pedropaj maquipi huatashca cadenacunapash urmarca. 8Chai angelca: “Aliguta chumbilirishpa, cambaj chaquipi churajunatapash aliguta huatari” nircami.

Shina nijpimi Pedroca, chai nishcataca tucuita rurajurca. Shinallata: “Jahualla churajunata churajushpa, ñucata catihuai” nircami. 9Shina nijpimi, angelta catishpa llujshirca. Ashtahuangarin Pedroca, “caica muscuillami” yashpami, chashnapacha cajtaca na crijurca. 10Paicunaca, ucu punguta ricuj chapajcunatapash, cati punguta ricurianajuj chapajcunatapash yalishpami, puebloman llujshina jatun jirru punguman chayarca. Chai punguca, paillata pascarijpimi paicunaca llujshirca. Ñanda japishpa rinajushpami, chai angelca ñapash chingarca. 11Chai jipami Pedroca, juizu japishpa cashna yajurca: “Jatun Diosca, Paipaj angelta cachamushpami, Herodespaj maquimanda, judiocuna ima na alicunatalla ruranamanda quishpichihuashca, chaitaca cunanmi yachani” yajurcami.

12Shina yashpa rijushpami Pedroca, Marcos nishca Juanbaj mama Mariapaj huasiman chayagrirca. Chai huasipica, ashtaca crijcunami tandanajushpa Diosta mañanajushca carca. 13Canlla punguta Pedro huactachijpica, Rode shuti cuitsagumi ricungapa llujshirca. 14Chai cuitsaguca, Pedropaj shimita rijsishpami, ninanda cushijushpa, pungutapash nara pascashpallata, Pedro pungupi cajta villangapa ucuman calparca.

15Shina villajpimi:

“¿Juizu illajchu cangui imata?” ninajurca.

Ashtahuangarin paica:

“Pedropachamari” nijpimi, paicunaca:

“¡Paipaj angelmari canga!” ninajurca.

16Ashtahuangarin Pedroca, punguta huajtachijurcallami. Paicuna ña punguta pascashpa, Pedrota ricushpaca ninandapachami manllarinajurca. 17Shina cajpimi Pedroca, maquihuan ricuchishpa, “upallaichi” nirca. Upalla tucujpimi, Pedroca, prezuna huasimanda Apunchi Jesús, imashna llujchishcataca villajurca. Paica:

“Caitaca Jacobomambash, caishuj crijcunamambash villanguichi” nishpallami, shuj llactaman llujshishpa rirca.

18Ña punllayajpimi, chapajcunaca ninanda manllarishpa:

“¿Pedroca imashi tucurca?” nishpa, caishuj chaishuj tapurishpa ninanda musparinajurca.

19Ashtahuangarin Herodesca, Pedrota mascashpa na tarishpami, imapacha tucushcata yachangapa munashpa, ricuriaj chapajcunata cutin cutin tapuchishca jipaca huañuchirca. Chai jipami Herodesca, Judea llactamanda urai rishpa, Cesarea pueblopi causagrirca.

Herodes huañushcamanda

20Jatun mandaj Herodesca, Tiro, Sidón pueblocunapi causajcunahuanga ninanda fiñarishcami carca. Ashtahuangarin, chai pueblocunapi causajcunaca, shujllashnalla yarishpami, jatun mandaj Herodeshuan ali canata mascanajurca. Chaipajmi, jatun mandajpajta ruraj Blasto runaman culquita pacalla cunajurca. Chai llactacunapica, jatun mandaj Herodes cachajpillami micunaca tiyan carca. 21Herodesca, pai agllashca punllapimi, jatun mandajcunapaj churajunata churajushpa, mandashpa tiyarinapi tiyarishpa paicunaman ninanda rimajurca. 22Chaipimi gentecunaca, cashna nishpa ninanda caparinajurca:

“¡Diosmari rimajun, runaca na rimajunllu!” ninajurcami.

23Shina ninajujpillatami, Jatun Dios cachamushca angelca, ninan ungüihuan llaquichirca. Taita Diostaca, na jatunyachishpa, paira jatun tucujushcamandami Herodesca jurucuna micujpi huañurca.

24Ashtahuangarin, Jatun Diospaj Shimita villanajujta uyashpami, ashtacacuna crishpa miranajurca.

25Bernabepash, Saulopash, paicuna ruranata pactachishpami Jerusalenmanda tigrarca. Marcos nishpa rijsishca Juandapash pushashpami, Antioquía puebloman tigrarca.

Currently Selected:

HECHOS 12: QVI16

Highlight

Copy