HECHOS 11

Jerusalenbi tandanajuj crijcunamanmi, Pedroca villashca

1Na Israelcunapash, Diospaj Shimita chasquishcatami apostolcunapash, Judea llactapi causanajuj crijcunapash uyarca. 2Jerusalenman Pedro vichai rijpica, circuncisionda rurashca crijcunami paitaca ninanda fiñarishpa rimai callarirca.

3“Paicunaca: ¿Imashpata circuncisionda na rurashcacunapaj huasiman yaicushpa, canga paicunahuan micujurcangui?” ninajurcami.

4Shina nijpimi, imata rurashcatapash callarishpa Pedroca, cashna villajurca:

5“Jope pueblopi, Diosta mañajushpami: Chuscundi pundapi huatashca jatun fachashna, jahua pachamanda ñucapajman urai shamujujta muscuipishna ricurcani. 6Chaita ali ricushpaca, chuscu chaquita charij animalcunatapash, sacha animalcunatapash, llucashpa rij animalcunatapash, jahuata rij animalcunatapashmi ricurcani. 7Chaita ricujujpimi: ‘Pedro, jatari. Caicunata huañuchishpa micui’ nishpa rimamuj uyarirca. 8Shina nijpimi: ‘Mandaj Taitalla, chaicunataca na micupashachu. Imapash na micunalla mapa micunataca napacha micushcanichu’ nircani. 9Shina nijpica jahua pachamanda cutin rimashpaca: ‘Taita Dios micunallami cangui’ nishcataca, ama yangapi churashpa micuilla nihuarca. 10Chaitaca quimsacaman ricuchimushpaca, jahua pachaman cutin aparcallami. 11Shuj huasipimi mingarishpa tiyajurcani. Chaimanmi, ñucata pushachun cachamushca quimsa runacunaca, Cesarea pueblomanda ñapash chayamurca. 12Chaipimi, Diospaj Espirituca: ‘Ama ishcai shungu tucushpa, paicunahuan ringuilla’ nihuarca. Shina nijpimi, cai sucta huauquicunandi rishpa shuj runapaj huasiman chayarcanchi. 13Chai runaca, paipaj huasipi ángel shayarimushpa, paiman ima nishcatami, ñucanchiman villarca. Chai angelmi, cashna nishca carca: ‘Pedro nishca Simonda, Jope shuti pueblomanda pushamuchun runacunata cachai. 14Paimi, canmambash, cambaj huasipi tucuilla causajcunandi, imashna quishpirinataca villanga’ nishpami villashca carca. 15Shinamandami, ñuca villai callarijhuanga, jucha illaj Diospaj Espírituca ñucanchipajman punda shamushcashnallata, paicunapajmambash shamurca. 16Chaipimi, Apunchi Jesús cashna nishcata yarircani: ‘Juanga, yacupillami bautizajurca. Ashtahuangarin cangunaca, jucha illaj Diospaj Espirituhuanmi bautizai tucunguichi’ nishcatami yarircani. 17Apunchi Jesucristota crijpi, ñucanchiman carashcashnami, Taita Diosca paicunamambash cararca. Taita Dios chashna paicunaman caramujujta ñuca jarcangapaca ¿pita caniyari?” nijurcami.

18Pedro chashna nijta uyanajushpami, imatapash na nishpa, Taita Diostaca ninanda alicachinajurca.

Shina cashpaca: “¡Na Israelcunapashchu, juchata saquishpa, Taita Diospajman tigrarishpaca, causaita causagrinata charinalla cashca!” ninajurcami.

Antioquía pueblopi tandanajuj crijcunamandami villajun

19Esteban runaguta huañuchishca jipaca, tucui crijcunata ninanda llaquichi callarijpimi, Fenicia llactaman, Chipre llactaman, Antioquía puebloman, caita chaita pacajushpa rinajurca. Ashtahuangarin, judiocunamanlla Jesucristomanda villanajushpami, shujcunamanga na villanajurca. 20Shina cajpipash huaquingunaca, Chipre llactamanda, Cirene pueblomandami chaipi carca. Paicunami, Antioquía puebloman shamushpaca, griego gentecunamambash, Apunchi Jesús quishpichij cajtaca villanajurca. 21Apunchi Jesús paicunaman ushaita carajpimi, ashtacacuna Apunchi Jesusta crinajurca.

22Chashna crinajujta Jerusalenbi tandanajuj crijcuna uyashpami, Bernabetaca, Antioquía puebloman cachanajurca. 23Pai chaiman chayashpaca, Taita Dios ninanda juyashpa quishpichijujta ricushpami, ninanda cushijurca. Paica: “Apunchi Jesusta catijushcata na saquishpami, tucui shunguhuambacha catina canguichi” nishpa, tucuicunaman shinllitapacha yachachijurca.

24Bernabeca, jucha illaj Diospaj Espíritu junda, alipacha crij, ali shungutapash charij runagumi carca. Pai aliguta villajujpimi, ashtaca gentecuna Apunchi Jesusta crishpa miranajurca. 25Chai jipami Bernabeca, Tarso shuti puebloman Saulota mascangapa rirca. Paita tuparishpaca, Antioquía pueblomanmi pushamurca. 26Chaipica, tandanajuj crijcunahuan shuj huatata causanajushpami, ashtaca gentecunaman yachachinajurca. Antioquía pueblopimi crijcunataca, “Cristota catijcunami” nishpa shutichi callarirca.

27Chai punllacunapimi, huaquin profetacunaca, Jerusalenmanda Antioquía puebloman urai rinajurca. 28Paicunapuramanda Agabo shuti runa shayarishpami, Diospaj Espíritu yarichijpi: “Cai pachapica, ninan yarjaimi tiyagrin” nishpa villarca. Chai llaquicunaca, Roma llactata jatun mandaj Claudio mandajui huatacunapimi pactarca. 29Shina tucujpimi Jesusta crijcunaca, paicuna carai ushanagutalla, Judea llactapi causanajuj crijcunaman, imatalla carashpa cachangapa yarinajurca. 30Paicuna carashcataca, Judea llactapi causanajuj mandaj ancianocunaman cuchunmi Bernabeman, Sauloman mingashpa cachanajurca.

Currently Selected:

HECHOS 11: QVI16

Highlight

Copy