HECHOS 10
10
Pedromandapash, Corneliomandapashmi villajun
1Cesarea pueblopica, Cornelio runami causajurca. Paica, “Italiano” nishca, patsaj macanajuj runacunata mandajmi carca. 2Chai runaca, paipaj tucui huasi ucupuracunandimi, Taita Diosta juyashpa, manllashpa causajurca. Shinallata, gentecunata llaquishpami, imagutapash carashpa, Taita Diostapash mañashpa causajuj carca. 3Ña quimsa pacha chishi tucujujpimi, Taita Dios cachamujpi shuj angelca, pai tiyajuj ucuman yaicushpa muscuipishna ricurirca. Shina ricurishpami: “Cornelio” nirca. 4Shina nijpi, manllarishpa ricushpami:
“¿Imatata nihuangui, Mandaj Taitalla?” nishpa tapurca.
Shina tapujpimi angelca, cashna nirca:
“Diosta, can mañajushcapash, shujcunaman imaguta carajushcapash, Taita Diospaj ñaupajman chayashcami. 5Shinallata, cunanga, Pedro nishca Simonda pushamuchun, Jope shuti puebloman runacunata cachangui, 6paica, carata jacushpa chaquichij Simonbaj huasipimi, mama cucha manñapi mingarishpa tiyajun. Pedro shamushpami, imatalla can ruranataca villanga” nircami.
7Shina nishpa ángel rijhuanmi Cornelioca, paipajta ruraj ishcai runacunatapash, paita ricuriashpa causaj, ali crij macanajuj runatapash cayarca. 8Paicunaman tucuita ña parlashca jipami, chai quimsandi runacunataca Jope shuti puebloman cacharca.
9Chai cayandi punllapica, chai runacuna rishpa chai puebloman ña chayagrinajujpimi, chaupi punlla tucujujpi, Pedroca, Diosta mañangapa pai mingarishca tiyajuj huasi jahuaman vichai rirca. 10Paica, ninanda yarjachijushpami micungapa munajurca. Paiman micunata yanungacamanmi, muscuipishnalla ricurimurca. 11Jahua pacha pascariyajtami ricujurca. Chaimandaca, chuscundi pundapi huatashca jatun fachatashnami, cai pachaman urai shamujujta ricurca. 12Chaipica, chuscu chaquita charij tucui animalcuna, alpata llucashpa rij animalcuna, jahuata rij alasyu animalcunapashmi ricurirca. 13Shina ricujujpimi:
“Pedro, jatari. Caicunata huañuchishpa micui” nij uyarimurca.
14Shina nijpimi Pedroca, cashna nirca:
“Mandaj Taitalla, chaicunataca na micupashachu. Imapash na micunalla, mapa micunacunataca napacha micushcanichu” nirca.
15Shina nijpica, cutinmi tigrachishpa cashna rimamurca:
“Taita Dios micunallami cangui nishcataca, ama yangapi churashpa micuilla” nircami.
16Chai jatun fachashna, quimsacaman ricurishpaca, cutinmi jahua pachaman apai tucurca. 17Shina muscuipishna ricushcata Pedro na yachai ushashpami: “Ima nishpata, cashna ricuchihuan” yashpa tiyajurca. Shina tiyajujpimi, Cornelio cachamushca runacunaca, tapui tapui rishpa, Simonbaj huasiman chayagrirca. 18Paicuna chayashpaca:
“Pedro nishca Simón shuti runaguca, ¿caipichu capan?” nishpami tapunajurca.
19Pedroca, muscuipishna ricushcata yarishca tiyajujpimi, Diospaj Espirituca:
“Quimsa runacunami candaca mascanajun. 20Cunanga, jatari, uriajushpa, ama ishcai shungu tucushpa paicunahuan rilla. Ñucami, paicunataca caiman cachamurcani” nirca.
21Shina nijpi, Pedro uriajushpaca, Cornelio cachamushca runacunataca cashnami nirca:
“Canguna mascajuj runaca, ñucami capani. ¿Imata ningapata shamupanguichi?” nircami.
22Shina nijpimi, paicunaca cashna ninajurca:
“Patsaj macanajuj runacunata mandaj Cornelio cachamujpimi shamupanchi. Paitaca, Taita Diosta manllashpa, alitalla rurashpa causajpimi, judiocunapash alicachin. Jucha illaj ángel, paiman ricurishpami cashna nishca: ‘Pedrotaca, cambaj huasiman shamuchun cayashpa, pai villajujta uyangui’ nishcami” ninajurcami.
23Pedroca, pai mingarishca tiyajuj huasipillatami, paicunatapash mingachirca. Cayandi punlla Pedro jatarishpa paicunahuan rijujpica, Jope shuti pueblomanda shuj crijcunapashmi cumbashpa rinajurca.
24Chai cayandi punllami, Cesarea shuti puebloman chayagrirca. Chaipimi Cornelio runaguca, paipaj ayllucunatapash, paipaj ashtahuan ali cumbacunatapash cayashpa shuyajurca. 25Pedro chaiman chayajpimi, Cornelio runaguca tuparingapa llujshimushpa, Pedropaj ñaupajpi cungurishpa alicachijurca. 26Ashtahuangarin Pedroca, paita shayachishpami:
“Shayari, ñucapash canshnallata runallatami cani” nirca.
27Pedroca, Corneliohuan parlashpandi, yaicujushpami, ashtaca gentecuna chaipi tandanajushca tiyanajujta ricurca. 28Pedroca, paicunataca cashnami nijurca:
“Judío runahuan, caru llactamanda runahuan tandanajunapash, na cashpaca paicunapaj huasiman chayanapash napacha ali cajtaca, cangunallata yachanguichimi. Ashtahuangarin, Taita Dios ñucaman ricuchishpami: ‘Pitapash, ama yangapi churashpa mapami ninguichu’ nihuarca. 29Shinamandami ñucata cayajpica, imatapash na nishpa shamurcanilla. Chaimandami: ‘¿Imapata cayahuarcanguichi?’ nishpa tapuni” nijurcami.
30Shina nijpimi Cornelioca, cashna nirca:
“Ña chuscu punllami tucupan. Cunajshna chishipimi, na micushpa cai ñuca huasipi Diosta mañajurcani. Shina mañajujpimi, punchapamba churajushca runagu ñuca ñaupajpi shayarijta ricurcani. 31Paimi, cashna nihuarca: ‘Cornelio, can mañajushcapash, shujcunaman imaguta carajushcapash, Taita Diospaj ñaupajman chayashcami. 32Cunanga, Pedro nishca Simonda pushamugrichun, Jope shuti puebloman cachangui. Paica, carata jacushpa chaquichij Simonbaj huasipimi, mama cucha manñapi mingarishpa causajun. Pedro shamushpami, can imata ruranatapash villanga’ nihuarcami. 33Shina nijpimi, canda pushamuchun cachaparcani. Can shamushcapash alipachami capan. Cunanga, tucuicunami Taita Diospaj ñaupajpi can villajujta uyangapa caipi capanchi. Taita Dios canman tucui mandashcacunata uyangapami munapanchi” nijurcami.
34Pedro villai callarishpaca, cashnami nijurca:
“Taita Diosca, na agllashpalla pitapash chasquinllu. Chaitaca, cunanga alipachami yachani. 35Tucui llactacunapimi, Paita manllashpa, alitalla rurajcunata Diosca alicachijun. 36Taita Diosca shuj villanatami, Israelcunaman villachun cachamurca. Jesucristomanda ali causaita charichunmi, quishpirinamanda villajurca. Chai Jesucristomi tucuicunata Mandajun. 37Galilea llactamanda callarishpa, Judea llactacaman ‘bautizarichi nishpa’ Juan villajushca jipamanda ima tucushcatapash cangunallata alimi yachanguichi. 38Nazaret pueblomanda Jesús ushaita charichunga, Taita Diosmi jucha illaj Paipaj Espirituta cararca. Taita Dios, Paihuan cajpimi Jesusca, tucui imata cashpapash, aliguta rurashpa purijurca. Shinallata, diablo llaquichishpa charijuj nanaicunahuan huañunajuj tucui gentecunatapashmi alichijurca. 39Judea llactapipash, Jerusalenbipash, Jesús imatalla rurashcata ricushcatami, ñucanchica villanajunchi. Paitaca, caspipi huarcushpami huañuchinajurca. 40Paitaca, quimsa punlla chayajpimi Taita Diosca, cutin causachishpa ñucanchiman ricuchimurca. 41Na tucui gentecunaman ricurishpami, Paimanda villanajuchun pundamandapacha Taita Dios agllashcacunamanlla ricurirca. Huañushcacunapaj chaupimanda causarimujpimi, ñucanchica Paihuan micushpa, ufiashpa tiyanajurcanchi. 42Jesustaca, causajcunatapash, huañushcacunatapash ricushpa llaquichijuchunmi, Taita Diosca churashca. Tucui gentecunaman chaita villanajuchunmi ñucanchitaca mandarca. 43‘Jesuspaj shutita crijpica, tucuicunapaj juchacunatami anchuchinga’ nishpami, tucui profetacunaca villanajushca” nijurcami.
44Cai shimicunata Pedro villajujpillatami, jucha illaj Diospaj Espírituca tucuilla uyajcunapajman shamurca. 45Circuncisionda rurashca crijcunami, Pedrohuan pacta shamushca carca. Paicunaca, na Israelcunamambash, jucha illaj Diospaj Espirituta talijshna cachamujujta ricushpami, ninanda manllarinajurca. 46Shuj shuj rimaicunata rimashpa, Taita Diostapash ninanda alicachinajujpimi, chashna manllarinajurca. 47Chaimandami Pedroca, cashna nirca:
“Jucha illaj Diospaj Espiritutaca, paicunapash ñucanchishnallatami chasquirca. Paicuna yacupi bautizarinataca, ¿pipash jarcai ushangachu?” nircami.
48Paicunataca: “Apunchi Jesuspaj shutipi bautizaichi” nishpami mandarca. Chai jipami, Pedrotaca: “Huaquin punllagullatapash shuyapaira” ninajurca.
Currently Selected:
HECHOS 10: QVI16
Highlight
Share
Copy
Want to have your highlights saved across all your devices? Sign up or sign in
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.
